Le brav tayer

La en zistwar sorti Praslin. In anvwaye par Leonel Marie ki reste Anse Boudin Praslin e Leonel i apel son zistwar Le brave tayeur. Zot menm apre a deside si sa tayer ti brav, si ti malen oubyen si ti en demi fou. An tou ka en zour en tayer ti pe asize lo son ban pre avek lafnet son latelye. En pti moman apre i vwar en tantin ki pe kriye, « vin get bon konfitir ki mon pe vann ».

Sa tayer i tir latet par lafnet i kriy ek sa tantin pour anmenn sa konfitir ki i pe vann. Tantin i anmenn son pannyen konfitir e tayer ki byen kontan i pran en kar konfitir i aste ek tantin. Ler tantin in ale i dir dan li menm, ‘Bondye i anvway mwan en benediksyon. I a donn mwan lafors ek lenerzi sa’. Alor i al dan son bife i pran en morso dipen i pas son konfitir lo la, me avan ki i komans manze i dir, “En en ! Mon al kontiny mon palto ki mon ti pe koud. » Degre ki i ti’n kontan i mazin sa konfitir ek morso dipen ki i pou al manze la taler. Sak fwa i flank gran gran koudzegwir san mazinen ki i pe fer. Me letan ki i pe fer sa, mous in santi loder konfitir e enn par enn zot vin apoze. Ler tayer i vwar tousala i komans kriye, « E bann pti demon ! Sa ki’n envit zot lo mon dipen ? Sorti ale deswit ! »

Me mous ki zanmen ti tande i apoz plis ki avan. Tayer i fini ankoler deswit i anmas en ta latwal i flank en kou lo sa bann mous. Ler i ti’n fini fer sa prezan i get ater i vwar set mous ki’n mor, kartye fannen. Prezan dan li menm i dir, “Be zot selman mon for, mon brav mwan, e!” I dir, “Gete konbyen mous mon’n touye ! Me sa lemonn antye fodre konnen!”

I pa tarde, i pran li en latwal blan parey en bann, i atas lo son zepol drwat ziska kot son zenou gos e lo la i ekrir, “Set dan en kou !” ki vedir ki in fini touy set mous dan en kou. Me tayer degre ki i ti’n kontan e i ti’n vantar, i danse, i sote parey enm pti lisyen. Ou konnen dapre en tan i’n fini krwar ki in touy set dimoun, mannyer i ti’n vantar. I dir, « En en ! Mon bezwen fer lemonn konn sa. » Alor toudswit i prepare pour li fer letour lemonn pour al fer tou dimoun konnen ki li i for, i’n touy set dan en kou. Me set kwa, set mous? Tayer in fini bliye si mous, I krwar set dimoun. Ale, avan i ale alor i regard dan son latelye si napa nanryen pour anmenn avek li. Sel keksoz ki i vwar se en morso fromaz e en sren ki i ti’n sonnyen dan en pti lakaz. I pran tou le de i met dan son pos an ka ki i lafen dan semen. Apenn ki i ti’n mars apepre senk mil distans i rankontre en zean ki pe asize lo en montanny. Degre ki tayer ti’n vantar i al kot zean e i dir ek li, « Bonjour konfrer ! La ozordi mon vwar ki ou pe asiz lo sa gro montanny pour regard lemonn antye. Be mwan osi mon kapab fer tousala parey ou. Akoz ou pa vin avek mwan, nou ava al sers nou fortin ansanm. »

Zean i reponn li, « Sorti la, pti lever! En pti zonm meg parey ou, ki ou kapa fer? »

Tayer i dir, « En ! Ou pa konnen ki kalite zonm mon ete. Mon kapab fer plen keksoz. » I dres son lestoman, « Get lo mon lestoman. Set dan en kou ! Ou kapab fer sa ou ? »

Ler zean i vwar sa kat mo lo tayer, i krwar set zonm ki tayer in touye e i dir dan li menm, ‘Me avan ki mon respekte sa tayer, fodre mon a esey son lafors.’ Alor i dir ek tayer, « Be bon annou fer de paryaz avan, mon a gete lekel ki gannyen, apre mon a gete si mon a sivre ou. » Zean i ramas en gro ros ater, i pres sa ros dan son lanmen ziska ler i sorti delo.

Tayer i get tousala, ki ti enposib pour li, me sa tan son lanmen ti dan son pos e son lanmen i tous sa bout fromaz ki dan son pos. Alor i retir sa bout fromaz i met dan son lanmen i peze ziska i sorti delwil dan fromaz e i dir ek zean, « Be pa nanryen, ou’n fer sorti delo dan ros. Mwan get ki mon fer. Pour mwan i sorti delwil.”

Zean in sezi. Zanmen in war fromaz. Toudmenm, pour pran dezyenm paryaz, zean i anmas ankor en gro ros i anvway dan lespas e o bou enn erdtan edmi ros i tonbe. Tayer li lontan in mazin son sren ki ti dan son pos, alor i avans en pti zistans ek zean e i dir, “Be konfrer, pour ou in tonbe. Pour mwan pa pou tonm zanmen ankor. Veye!” Nek i anvoy anler sa pti sren ki ti dan son lanmen, ki zean pa ni vwar, e konman i anvway anler, byensir pa bezwen dir ou ki zwazo in ganny laliberte, i pa espere. I ale, e ale e ale e kanmenm zean i veye, i veye trwa zour, pa tonm ditou. Tayer byen kontan parske li i’n ganny de paryaz avek zean.

Me zean pa ti satisfe pour tayer ale alor i aras en pli gro pye dibwa ki i war e i dir avek tayer, « Donn mwan lanmen anmenn sa. »

Tayer ki ti vantar, i reponn, « Me avek plezir konfrer ! Selman ou a pran son tron, mwan mon a vin deryer, mon a donn lanmen anmenn son bann brans ek son bann fey parske i annan pli bokou brans ek fey ki tron. I pou pli lour.”

Zean i dakor e i fer parey tayer i dir li. Dan semen, tayer li i pa donn lanmen o kontrer i asiz anler lo brans deryer zean e fer pyedibwa pli lour. Kanmenm sa, zean pa ti ganny en konpran. I ti kontinyen fer son semen. Me o bou en serten letan, i ti’n fatige e i kriye, « Mon fatige, mon pou met ater. Mon met en kou ater, ou tande ? Mon pe met ater la. »

Tayer i degaze, i desann e i fer krwar ki i pe bras pye dibwa avek tou son lafors, e i dir avek zean, « Sa gro zonm parey ou, ou pa kapab anmenn sa pti pye dibwa ou tousel ? »

Zean pov dyab, in fini kanmi. Me i pa konnen ki i pou fer. Me i gard son vanzans menm an ker. Alor zot kit pyedibwa dan kwen semen, zot kontinyen zot larout ziska nariv pre kot en pye sed, e la zean i atrap leker pye sed, i bes anba e i dir avek tayer, “Tenir.”

Me konman tayer i atrap leker pye sed pour tenir, zean i les ale e tayer sa leker pye sed i lev li e anvway li dan lezer e i al tonm en bon zistans. Me par sans i pa’n ganny nanryen.

Unfinished?