Lazistis ek lenzistis

En fwa ti annan en bonnonm ek son madanm ki ti reste dan en vilaz e zot ti annan en fiy. Plizyer garson in esey demann maryaz sa fiy, me kondwit e mannyer sa bann garson ti fer ti montre ki zot napa en bon tenir e osi i pa ti fer plezir bonnonm papa. En zour Bonnonm papa i dir ek son madanm, “Sa bann garson zot malelve, zot plito vin fer baraz e lonbraz se mwan.” I ti osi azoute ki en zour, zour i a vwar en garson ki zis, alor son fiy a marye avek.

Tou le zour sa bonnonm ti kontan pran son baton e fer en pti pronmnad dan lezanviron. En zour pandan enn son pronmnad, i ti rankontre en zenn garson ki ti dir li bouzour, e demann li kot i pe ale byen poliman. Bonnonm i dir ki i kontan tou le zour fer en pti pronmnad e sa i en pastan pour li, e anmenmtan i fer sa konman en legzersis e distrer li osi. Sa zenn garson ti dir avek li, “I byen bon ki ou fer sa pti pronmnad, me pa bezwen al tro lwen kote isi akoz pour ou laz ki ou’n arive ou a kapab fatig bokou e ou riske ganny atake par le bandi.”

Saler kantmenm i ti pe fer sa pronmnad, bonnonm ti’n sitan vye ki letan i marse i tranble. Sa zenn garson ti dir li, “Annou mars kote isi, kot i annan plis dimoun. Nou ava asize lo sa ban ki laba, nou ava koze, sa i a distrer ou pli byen.”

Sa bonnonm i swiv sa zenn garson, zot asize, zot koze. Sa bonnonm i ekout sa parol ki sa zenn garson pe koze avek li, i vwar sa bann parol i gou, i enteres li e sirtou le bon konsey, parol ki annan de bon sans e parol dous. Napa ni en parol sal ti sorti dan labous sa garson. Tou son parol ti onnet e enteresan. Sa bonnonm i regard mannyer sa garson e dir dan li menm, ‘me sa zennonm i sanble mwan ki i en garson onnet, byen elve e zis.’ Sa bonnonm i vwar ki tar ti pe vini alor i dir avek sa garson ki in ler pour ale avan ki soley i kouse. Sa zenn onm i dir, “Wi, annou mon a kondir ou ziska pre se ou.”

Alor tou le de zot in ale. Ler ti’n ariv pre se li, zot ti dir bonswar kanmarad e zot ti fiske randevou ki demen zot a rakontre lo menm ler. Sa garson i ale i dir bay bay. Sa bonnonm ler i rantre se li i ti byen zwaye. I pa dir nanryen son bonnfanm. Sa i pou rakont demen bomaten. Tantin osi i remarke ki pa labitid bonnonm me li i osi i gard pour li menm, i pa dir nanryen. I pa ni demann nanryen son bonnonm ki’n arive. Sa bonnonm aswar i priye kan lizour pour fer e ler lizour ti’n fer, i priye keler letan pou pase pour li kapab al zwenn son dalon. Kan ler ti’n arive, bonnonm i pran son baton parey labitid e i al pronmnen e i zwenn sa garson, dan menm landrwa e alor zot asize ankor e zot koze. Bonnonm i ekout sa bann zoli parol ki sa garson pe senmen, i pas en gran lazwa dan son leker. Kan ler ti’n arive pour zot ale sa garson i kondir li ankor ziska pre se li apre zot dir bonswar e randevou ankor pour demen. Sa swar sa bonnonm i rakont son bonnfanm e i dir, “De zour ki nou pa al pronmnen mon’n rankontre en zennonm byen elve e onnet e i zis e tou son parol i enteresan. Sa ti a kapab marye avek nou fiy. Mon annan en lide envit sa garson en zour Dimans pour vin pronmnen se nou.”

Alor tantin ti osi byen kontan i dir, “Me wi mon mari, sa i en bon lide.” E lannmen swar ler i al pronmnen ankor, i rankontre sa garson e zot koze, e i dir avek sa garson si i pa andezir pour vin pas lazournen Dimans kot li dan son lakour. Sa garson ti dir ek li “Wi, mon aksepte ou lenvitasyon avek en gran plezir e mon a vini nou ava rakonte. Nou a rankontre dan menm plas dimans maten a di-z-er.”

Alor tou ti’n aranze, me sa bonnonm pa konn non sa garson, e tou le swar kantmenm zot in koze zanmen zot in demann kanmarad zot non. Sa bonnonm i apel sa garson zennonm e sa garson ti apel bonnonm levye. Kantmenm sa, bonnonm tou le zour in mars avek sa garson in koze, zot in diskite i pa konn ditou ki salerla Zezikri ki pe mars ansanm ek li. Sa bonnonm ek son bonnfanm fin aste tou kalite bon manze pour resevwar sa garson Dimans e osi labwason bon kalite ziska divendtab e krenm de mant ti annan (lanmizik lenstrimantal).

Dimans bomaten in met son resanz, i ti’n abiy li kare kare pour zwenn sa garson. Bonnonm i zwenn garson, zot in vin ansanm bonnfanm ek fiy in met tou pla pare apre zot ti’n osi byen abiye pour welcome sa garson. Sa zour ti napa pli gran zwa dan sa lakour e konversasyon sa garson ti parey lalimyer se zot. Kan manze ti’n servi zot mont atab zot ti byen servi sa garson, ryen a dir. Apre dezennen zot ti’n asize tou ansanm dan salon ler sa garson i koze, i ti donn zot kelke verse dan labib e avek son konsey sa ti’n ranpli zot leker avek lakontantman. Alor bonnonm i dir ek sa garson, “Mon kontan ou mannyer e ou konversasyon. Mon war ki ou en garson zis, onnet e byen elve, e mon ti a kontan si en zour ou ti ava marye avek mon fiy, e mon krwar ki mon fiy ti a kontan.”

E salerla kote maryaz. Alor sa garson i dir ek sa bonnonm, “ I ankor tro boner pour mwan rann ou larepons san ki mon vwar mon papa ek mon manman ki zot dir pour zot rezon. Apre avwar konsilte zot, si tou le de i kontan e ensi tou dimoun dan lakour, e san dout mwan, mon kontan, alor apre mon a kapab rann ou larepons. Me sa i a pran en pti pe letan.” (lanmizik enstrimantal)

Ler sa garson ti ale, i ti remersi zot bokou pour sa bon lazournen ki i’n pase se zot. Le landemen, bonnonm i rankontre sa garson ankor e zot i’n marse dan detrwa landrwa ankor kot zot pa ti ankor pronmnen ek koze ansanm. Kat zour apre, sa garson i dir ek sa bonnonm ki in pronmnen ek li dan plizyer landrwa depi ki zot in fer konnesans, alor prezan mon envit ou pour vin marse e pronmnen dan en lot landrwa ki zanmen ou’n deza vwar. Randevou pour demen maten. Lannmen byen boner sa garson ti’n arive pour rankontre bonnonm. Apre ki zot ti’n mars anviron en mil, sa garson i kas en kontour, bonnonm pa vwar kot i ti vini me zis i ti vwar li dan en lot monn. Sa garson ti’n anmenn li pronmnen dan en gran zarden fler. Ti annan en gran basen delo ek lafon ek en lafontenn ladan. Zoli ban anba pye dibwa e plizyer zoli fler ki zanmen i ti’n deza vwar dan son lavi. Apre zot in asiz lo en ban zot in koze ziska en pti pe tar. En pti moman bonnonm i vwar ki i’n ariv se li. I trouv sa drol me salerla sa garson ti’n transport li annespri me li i pa ti konnen. Bonnonm byen ansante ek son pronmnad i rakont son bonnfanm sa zoli zarden fler.

Dezyenm zour sa garson ti vin sers li ankor e sa voyaz sa garson ti anmenn li pronmnen dan en gran zarden fri ek tout sord espes ki zanmen i ti’n deza vwar. E sa garson ti kas enn de fri e donn li pour manze e osi dir li, “Ou kapab anmenn enn de se ou.” Apre zot in asize zot in koze. Bonnonm in pli ansante dan son voyaz. Sa garson i dir li ki demen mon a anmenn ou pronmnen dan lavil sa landrwa ki nou ete. Pli tar, zot retournen, i dir bay bay e zot fer randevou pour demen. Ler bonnonm i ariv se li, i donn sa bonnfanm e son fiy osi sa bann fri pour manze e i rakont zot son pronmnad dan zarden fri. Demen le trwazyenm zour, sa garson i vin sers bonnonm e zot ale e dan en pti moman zot kas ankor en kontour e bonnonm i vwar li dan en gran lavil ki zanmen i ti’n deza vwar. Sa garson i anmenn li pronmnen dan plizyer lari sa lavil avek zoli batiman dan tou le de kote. Bonnonm i regard labote sa lavil i dir, “Mon ti a kontan pour vin reste dan sa lavil.”

“Me pa bezwen per,” sa garson ti dir li. “Dan detrwa zour ou a vin reste dan sa lavil.” E tou sa tan bonnonm pa konpran menm si Zezikri i ape mars avek. Ler ti’n fini montre li sa landrwa dan sa lavil Zezikri, sa garson i anmenn li dan en laplenn. Sa bonnonm i vwar en lakaz menm oter ek tou lakaz ordiner me larzer sa lakaz i pli gran ki lavil Viktorya. Sa lakaz ti sitan long ki ziska kot lizye sa bonnonm ti kapab vwar. Alor i demann ek sa garson kisennla ki reste dan sa gran lakaz. Sa garson i dir li, “Napa personn ki reste dan sa lakaz. Me dan sa lakaz i kontyen lavi dimoun.”

Bonnonm ti’n etonnen ler i tann sa parol. E son fournen par son kiryozite i demann ek sa garson, “Ki mannyer lavi dimoun i kapab ete?” E i anvi vwar. Alor la aujourd’hui sa garson pour fer sa bonnonm pas son premye tes pour vwar si sa bonnonm i zis. Sa garson i dir li, “Pa tou dimoun ki annan drwa antre dan sa lakaz me pour satisfer ou kiryozite mwa fer ou vwar, me nou pa pour reste plis ki en demi erdtan e si nou reste plis ki en demi erstan anndan nou pa pou zanmen sorti. Nou pou reste touzour anndan ziska leternite.” Alor Krist i ouver laport e zot antre. Sa bonnonm i war en bann gran gran latab long e plizyer labouzi tout sort longer pe alimen lo sa bann latab. I demann avek sa garson kisisa sa bann labouzi ki pe alimen. Sa garson i dir avek li, “Sa bann labouzi ki ou trouve la sanmenm ki apel lavi dimoun.” Krist ti fer li fer letour e montre li labouzi ki ti’n alim lanmwatye e dir li, “Sa bann, sa zot annan senkant an. Sa lot ki en pe pli kourt sa katreven-z-an.” E i anmenn li kot en bann ki’n alime en kar i dir, “Sa depi ki zot in ne i annan vennsenk an.” E i dir, “Tousala a mor ler zot labouzi ava brile.”

Sa garson i anmenn li kot en bann labouzi ki fek alimen e i dir li, “Sa bann zot fek ne, zot pa ankor ganny enn an e zot lavi i long.” Apre sa garson i fer bonnonm war en lot labouzi ki ti’n brile e reste zis en pti kar pous longer ek en pti lanmes kourt. Mannyer sa enn ti ete en pti divan ti pase i soufle krwar mwan i ti tennyen. Alor sa bonnonm fournen mannyer i ti ete, i demann sa garson, “Kisisa, sa pti labouzi kourt?” Kris ti responn li, “Sa pour en dimoun ki depi ki i’n ne i’n byen pas son lavi, i’n viv lontan, e i pa ankor mor. Alor zour ki sa pti bout labouzi i fini brile e i tennyen, sa menm zour ki sa dimoun pou mor.”

I ti kontinyen, “Sa pti bout labouzi la, ou konnen pour ki sa?” Bonnonm i dir, “Non.” I dir, “Me sa pour ou sa. Ou konnen zour i tennyen ou osi ou pou mor.” Ayayay! Vomye pa ti’n montre li sa labouzi ditou e dir li nanryen. La sa bonnonm in konmans trakase, in ganny lafreyer avek laper ler i get sa pti bout labouzi, me son legoizm ti tro for pour li e ti demann ek Kris, “Mon frer si ou estim mwan koman en zanmi, rann mwan sa servis, sanz sa gran labouzi ki’n fek alimen dan plas sa ki pour mwan, alor mon a kapab viv pli lontan.”

Kris ti reponn li, “Me le vye mon pa kapab fer en keksoz koumsa e si mon fer sa savedir ki mon pa zis e Bondye osi a pini mwan si mon fer sa. La mon vwar ki ou, ou pa zis. Ou montre ki ou napa lazistis dan ou e ou posed ryen ki lenzistis e legoizm.”

Sa bonnonm i dir, “Lavi i ankor tro gou, i regretan pour mor koumsa.” Sa garson i vwar ki mannyer sa bonnonm ti pe enkyet e sagren, alor pour kalmi li morso, i dir li, “Bon la mon sanz sa labouzi avek pour ou.” Ler bonnonm i vwar sa, sa gro pwa lo son leker i sorti. I ganny en pe konsolasyon. Me Kris ti fer sa tanporerman pour li akoz i ti pres pour tonbe avek lafreyer e sa labouzi la met li kot ou kontan i pa fer okenn diferans. Met isi, met laba tousala menm zafer menm i pa ni afekte lavi sa pti zanfan, ni lavi sa gran dimoun. Savedir si ou labouzi i pour ou, i pour ou menm. Kris i dir ek li, “Levye annou sorti akoz pres en demi er pangar nou ava reste la pour touzour.”

Alor zot sorti e ferm laport. Ler ti’n ariv deor bonnonm i dir ek sa garson la relman mon vwar ki ou en garson zis. Kris ti reponn li, “Depi mon nesans e tou long lannen mon lavi e ziska laz ki mon’n arive konmela, mon’n touzour zis e onnet anver tou dimoun, me mon vwar ou menm ki pa zis ou pa kontante avek sa ki Bondye in donn ou e oule pretann ganny lavi ou kanmarad, e avek sa, ou oule ganny lavi en pti nouvo ne. Kan ou ler, ou ler in fin arive, alor kisisa ou oule ne ankor.” Sa garson i dir, “Ou mars avek lenzistis.”

Sa bonnonm pa konpran menm si Zezikri ki pe koz avek li. I krwar en garson ordiner. Alor sa garson i kondir li ziska dan son lakour e dir li demen. “Repoz ou e mwan osi mon pe al repoze. En lot zour nou ava zwenn ankor,” e sa garson ti dir li, orevwar e i ti ale. Apre pli tar Kris i pase, i pran sa labouzi e i retourn dan son plas. E de zour apre, sa pti bout labouzi sa bonnonm i fini brile e tennyen. Bonnonm i kas lapay lo later, i mor. Me la mwan mon remarke ki deryer sa zistwar i annan en moral e vre parey sa dimoun ki’n ekri sa moral i dir, sa zistwar se pour montre ki annan plizyer dimoun lo later zot met zot reklanm ki zot zis e onnet anver zot kanmarad me sa ler lenzistis e ipokrizi i dan zot leker e zot menm ki pli gran fripon ki sa later i kapab siporte e se tou.