LAVERITE I FERMAL

Alors koblo ine get isi ine get laba I pa oir persone. En dimoune tine amar son bef dan sa landroi. Nenk koblo I larg sa zanimo, I trene li derier en gro ros é I kas son latet.

Dan ene ti moman , ine fini kros bef, ine kasiet tou signe komkoi ine touy sa bef la. I désane I amene en parti kot son bonfame.

• Vine ek mouan nou aval sers léres.

• Ene ti moman zot ine fini fer sa é koman zot pa ti voras, zot ti partaz en pé ek bane voizen, sal en pé é zot ti kui dékoi pou zot manzé sa zour.

Mé li koblo I ti kontan al légliz. Tou dimoune ti pran li pour en bon krétien é tou lé Samdi I ti anan labitid al konfésé. Bé la sanmdi ine arive, koblo ine begnen, sanz li bien é I anbras son madame avan I tome déor pour li al kot légliz.

Mé Mavlo I dir li :

• Fer bien atansion ou pa dir sa ki ou ti fer lendi.

Akont per nou dispit, nou lakoler, nou grognen mé pa mansion li ditou sa zafer bef. Oune tandé?

• Oui mon Sonia, mouan, mon pa pé al dir sa.

• Ou konnen toultan nou labitié al konfes ansame. Mé ozordi, koman mon malad, ou bézouen al ou tousel.

• Pa trakasé. Tou zafer I a bien. Taler moua ane tournen.

Bonome I désane I alé. I ariv kot légliz, I antré é I prépar li pou lakonfésion . Parey son labitid, per I vine gété si I annan dimoun pou konfésé. Bien sir Koblo ti la. Per I antré dan konfésional é Koblo I pran en koté.

I komans akont son bane pti forfé ki ine fer dan lasémene.

Apre I dir ek per ine fini. Mé li per I dir ek Koblo:

• Mazine bien si samene tou.

• Anfen ti annan ankor ene ti zafer lasene.

• Mon pa konpran ou. Sey eksplik mouan bien.

• Mon per eskiz mouan, mon’n, mon’n vol en lasene!

• En lasene?

• Oui, en lasene bef.

• En lasene pir?

• Anfen mon per ou konnen ou meme. Dan bout en lasene….

• Bé ki ti annan dan bout sa lasene?

• Mon per sa i pli difisil pou dir.

• Alé mon anfan, ou konnen fodré ou avoué tou pour kapab reservoir labsolision. Fer ene ti zéfor dir mouan.

• Mon per, ti en lasene bef.

• Alors mon anfan, oune vol en bef?

• Elas! Oui, mon per é mon’n manzé.

Per I grogne en pé ek li, done li labsolision. Mé fodré ki Koblo I fer pénitans pou sa gran fot ki ine fer. Per I done li dis tour saplé pou résité. Koman ti napa persone ankor légliz, per I sorti I alé. Koblo isi derier I konmansé. Alé li, alé li. Prézan ki annan lapriyer pou fer. Saler son zénou ine an katkat. Pov diab, ine san pozision.

Afen lo pti senker, Koblo ine fini fer son pénitans. I sey lévé dan ban kot I tine azénou, mé son bane mame tine tou fermal. Konmsi ou a kroir mangouak ki ti a pé mord li. Mé I trennen trennen kan meme é I pran son sémen pou al kot li. Ler I apros kot lakour, I rémarké poudir I anan konpannien kot li. Pli I avans lo bor lakaz I komans rékonnet per. I dir dan limeme. Ou a dir mouan per ine vine oir mon bonefame? Malgré trou, Koblo I avans kot son lakaz. I kosté obor per pou done li en pognendmen. I antré anndan pou li met son lenz lakour.

Koman I met son lipié dan lavarang, nenk dé zome I sézi li. Koblo I vine tou dékonserté. Son madame I perdi laparol ek sézisman. Aprézan per osi I met son kuiyer sal ladan é I komans fer lamoral Koblo. Li Koblo I mazinen ki bétiz ine al fer, kan son madame, Mavlo, tine bien prévnir li avan I ti al kot légliz pou al konfésé. Mé la zafer ine sal. Per ine fer lâpolis mel ladan.

Sa dé gard I anmene pov Koblo é zot met li an konsine. Asoir, ler moutia ine ouver, li Koblo I dan tiok. Son dé larm I marsé dan son lizié. I régrété li Koblo ki ine anvoy lanmen koumsa. La nenk démen bomaten ki zot pou larg li. Ler zot ane fini pran lanket ek li.

Dé troi sémene I pasé. Zafer I prézanté. Ziz I anvoy Koblo anndan pou troi mouan.