A poor girl tries to get her old mother a gift for Christmas but is robbed on her way to the shop, she catches a fever on Christmas night and dies just after seeing a vision of angels and Father Christmas who have finally come to give her a gift.
A poor girl tries to get her old mother a gift for Christmas but is robbed on her way to the shop, she catches a fever on Christmas night and dies just after seeing a vision of angels and Father Christmas who have finally come to give her a gift.
A poor girl tries to get her old mother a gift for Christmas but is robbed on her way to the shop, she catches a fever on Christmas night and dies just after seeing a vision of angels and Father Christmas who have finally come to give her a gift.
All Right Reserved To UNISEY & CI
Laklos Minwi
Laklos minwi (lanmizik). Lao lo montanny Kopolya, ti annan en vye tantin e son pti fiy, Mari. Sa vye tantin ti apel Tantin Berta e sa pti fiy Mari. Zot ti reste ansanm me zot ti bokou mizer. Tantin Berta ti’n nepli kapab travay alor i ti ganny en pti pansyon trant roupi tou le mwan, ki pa ti preske nanryen, pour li kapab viv. Alor Mari avek Tantin Berta ti bokou malerez. Tou le zour, zot ti manz zis diri, avek enm pti aroze bouyon bred lo la. Pwason, sa ti en keksoz ki zot ti vwar tre rar. Tantin Berta ti al anvil annan ler, ler pwason ti bonmarse, si i ti antann me apard sa zour, pwason in ser zot ti bezwen manz zot diri aroze avek bouyon bred ou menm annandeler, diri sek avek disel. Zot lenz ti vye, vye, vye, vye, vye. Desire, desire, ranpli avek en kantite pyes. Annandeler pyes tou sord kouler. Mari ti annan selman di-z-an e i pa ti al lekol akoz i ti napa lenz konvenab pour li al lekol. Alor i ti reste dan lakour e i ti netway lakaz e lav lenz. Dan apremidi, Tantin Berta ek Mari ti asiz devan laport lakaz, koz koze pour en kantite letan. Tantin Berta pandan sa letan i akont Mari bann zistwar lontan e osi konman i ti viv kan i ti ankor jeune. Ti napa bokou dimoun ki ti reste Kopolya alor Mari ti napa zanmi. Bann vwazen pa ti antren zot akoz zot ti pov. Alor Mari ti toultan tousel. Son sel zouzou ki i ti annan ti en vye poupet ki Tantin Berta ti’n tire dan en vye desbin en zour. Nou ti’n ariv dan mwa desanm e nwel ti pe aprose (lanmizik nwel). Pandan sa letan ki nwel ti pe aprose, ti reste zis en semenn pour sa gran lafet arive e déjà ti annan en ler lafet partou. Tou dimoun ti zwaye. Tou dimoun, eksepte Tantin Berta ek Mari. Zot tou le de zot ti pe mazin en sel keksoz menm ki zot pa ti dir kanmarad ki zot pe mazinen. Mari ti pe mazinen ki i pou kapab fer kado Tantin Berta pour nwel e Tantin Berta osi ti pe sey fer son nide ki i pou kapab donn Mari pour nwel. Zot ti telman mizer ki sa ti en gran traka lo zot tou le de. Zot bann vwazen ti pe komans netway lakaz, dekore, fer larbdenoel, penn, ensidswit. Mari, letan i vwar tousala, son lizye ti ranpli avek larm. Son leker ti fermal akoz li i pa ti kapab fer parey. Koman i ti a kontan si selman i ti a ganny zis enn sa bann pti girlann rouz e en pti balon zonn. I ti mazin tousala e son leker ti lour. Selman lo lot kote, Mari ti konnen ki pa zis kado e dekorasyon ki enportan. Menm ki i ti annan zis di-z-an, i ti konnen ki nesans Jesus la venue du Sauveur ti bokou pli enportan ki kado. Son leker ti rezouir ler i ti mazin sa. Me malgre sa, parey tou zanfan, i ti a kontan si i ti a kapab ganny en pti zouzou. Me per noel zanmen ti pas kot li. I ti konnen ki sa lannen osi per noel ti pou bliy li akoz toultan i ti ganny obliye e Mari i asiz li tousel, i demann li menm sa kestyon ‘Akoz toultan per noel i obliy mwan?’
De ou trwa jour avan lafet noel ler Mari ti pe lav lenz tantin Berta, i ti remarke ki sa zip ti dan en leta deplorab. I ti’n tou desire, ranpli avek pyes. Ou ti nepli konnen avek ki latwal sa zip ti’n fer, degre ti annan pyes lo la. Alor Mari ti ganny en lide i mazinen ki si i ti a kapab aste en bout latwal pour tantin Berta, sa ti a fer en bon kado. I ti annan li senk roupi ki i ti’n gannyen rafal son premyer konmiyon. Alor i ti kalkile ki sa senk roupi si i desann avek anvil, petet ya kapab ganny en pti bout latwal. Lannmen i desann pour li al kot vye magazen Touboul. I ti bezwen mars en kantite letan avan i arive. I pa ti kapab al pran sa larzan pour li aste, pour li pey camion, parske sa larzan ti preske pa ase pour li ganny en bout latwal. Dan semen i zwenn zwazo, zwenn fler, i zwenn bann pti bebet. Lesyel ti ble e ti annan bann gro nyaz blan ki ti parey koton. Me toutakou, Mari i antann en pti tapaz deryer li. I arete pour li ekoute me ler i arete, i pa antann nanryen. Alor i kontiny son chemin. De fwa ankor i antann ankor menm kalite tapaz me sak fwa i arete, i pa vwar nanryen. I kontiny son semen avek en pti pe lafreyer. I mazin Tantin Berta e ki mannyer tantin Berta pou kontan ler i a donn li son kado, sa i donn li kouraz pour desann. I tir en pe son lafreyer. Me toutakou i vwar en dimoun ki aparet devan li. En gran zonm labarb e sa zonm i fer hahahahahar. Mari in per e sa lafreyer ki in gannyen in tranble son lazanm anpes li taye. Sa zonm nek i vini, i tap Mari en gro kou e zet li ater e aras li son larzan e zonm i bate. Apre en serten letan, Mari i revnir. I leve. La ki i konmans konpran ki’n ariv li e son latet i konmans fermal. I pa ni konnen ki i pour fer degre i ti’n ganny en nespes sok. I pa mazin nanryen me in fini realize ki i pa pou kapab ganny kado Tantin Berta. Tout an pleran, Mari i reprann semen i retourn dan lakour parske pa vo lapenn i al laboutik, i nepli annan larzan. An montan i demann son lekor, “Ki mon pou donn Tantin Berta?”
Ti’n ariv le vennkat Desanm ler Mari ti malad. Mari ti annan li en lafyev ki olye desan, lafyev i monte. Nanryen pa ti paret bon pour sa gerizon, pa ni menm en bon enfizyon sitronnel. Tantin Berta li o kontrer i ti trakase. I ti kontan Mari, kontan Mari en kantite e i pa ti kontan pour vwar Mari malad. Tou le minit sa lafyev i vin pli for, touzour pli for. Mari i vin pli so, pli so e i vin pli malad. En ler i menm komans rabase. Personn pa konpran ki i pe dir. Deor i ti antann son bann vwazen ki ti pe al asiste lanmes minwi. Byento tou keksoz ti’n trankil ou ti kapab antann zis Mari pe respire e pe plennyen avek sa douler ki ti avek li. Son lafyev ti telman for. Tantin Berta pa ti’n kapab konpran kisisa ki Mari pe dir, alor Tantin Berta, ler i ti vwar Mari dan sa nespes delir e rabase, lafyev pe vin pli for e pli for, i ti’n fini dezespere. Li osi son larm i koule gro konman lapli. I esey koz avek Mari me anven. Mari pa konpran personn. Chaplet dan lanmen Tantin Berta. I fer letour tantin Berta pe priye pour Mari byen. Apre en serten letan, minwi i sonnen e toutakou Mari ti ouver son lizye. I regard kot laport e i dir avek tantin Berta an souriyan, “Tantin Berta, get sa bann zoli lanz o bor laport. Ar koman zot jolie e per noel osi i avek zot. Vini, vin dormi la o bor mwan. Pti Jesus ozordi ou osi ou a ganny en landrwa pour ranmas pour ou repoz ou latet. La aprezan per noel pe donn mwan en poupet. I jolie Tantin Berta. Ou vwar sa lannen per noel pa’n obliy mwan.” Me dan lwen ou ti kapab antann laklos minwi pe sonnen. Mari ti ankor pe koz tousel. “Jesus pe donn mwan son lanmen, mon kapab al avek li? Dir mwan silvouple, pa ale, mwa retournen. Non mon bezwen ale byento, mon promet ou. Orevwar, orevwar Tantin Berta.” E la leker Mari ti ale dan lesyel ansanm avek la cloche kot Mari pa pou zanmen pov ankor, kot i pou vwar zis lafwa, pli gran kado de noel e avek sa nou termin sa zistwar Laklos Minwi (lanmizik).