Laenn antre de Kaptenn

Zistwar laenn antre de kaptenn par Paul Pool de Mont Buxton.

En zour ti annan de kaptenn. Enn ti apel kaptenn Ferdinan e lot kaptenn Edwar. Sa de kaptenn zot ti tre byen ansanm e zot ti osi travay ansanm. En swar pandan ki zot ti pe manze atab zot ti koz lo zot lavenir. Kaptenn Ferdinan ti demann Kaptenn Edwar. ‘‘Kaptenn si konmela ou marye ek ki ou ti a kontan marye ?’’ Kaptenn Edwar ti reponn, ‘‘si en zour mon deside marye, mon pou marye avek en fiy mizer.’’ Kaptenn Ferdinan ti etonne avek larepons kaptenn Edwar e i ti dir, ‘‘mwan si mon marye mon pou marye ek en pli zoli fiy ris ki annan o monn.’’ Epi zot konversasyon ti arete apre zot tou le de zot ti al dormi e la zot tou zot ti konmans reflesir lo sa ki zot ti fek dir ler zot ti atab. En zour ti arive ki kaptenn Edwar ti deside pour li vin Sesel, alor i ti pran son spidbot e konmans fer son larout pour Sesel. Apre en semenn kaptenn ti ariv o bor later. Isi Mae Kaptenn i konmans fer en pe agogo e dan son marse i ti ariv ziska Por Glo. Laba pandan ki i ti pe pronmnen, i ti vwar ki i ti ariv dan en gran plantasyon mayok e la i ti vwar en madanm avek son pti fiy. Sa madanm ti’n antortiy li dan en morso goni ki nou apel senbou e son pti fiy ti dan en rob desire e son de sen ti deor. Pa oule dir ou ti en zoli fiy. O moman ki sa pti fiy ti apersevwar sa kaptenn i ti santi li tou kanmi e alor i ti pran son de lanmenm e i ti met lo son de sen angiz pour kasyet son sen. Kaptenn li pa ti santi li anbarase me o kontrer i ti apros kot sa zenn fiy avek son manman. I ti dir sa madanm ki i kontan son fiy e ki i ti a kontan marye avek son fiy. Sa madanm ti etonne e dir li ki zot mizer e ki enposib en dimoun demann maryaz en lot dimoun o premye moman ki in vwar sa dimoun. Me kaptenn ti ensiste me alafen sa madanm ti dakor pour son fiy marye avek sa kaptenn. Alor sa madanm, sa kaptenn avek sa fiy ti al kot lakour. An arivan dan lakaz sa madanm, sa madanm pour lonnekte ti ofer kaptenn en pe dite me konman i ti napa en tas avek en soukoup, i ti met dite kaptenn dan en kafoul e dir sa kaptenn ekskiz li akoz son pozisyon pa permet li aste vesel. Kaptenn ti dir li pa bezwen ki i trakase e i ti osi dir sa madanm ki i ti a kontan si i ti a les son fiy al avek li anvil pour aste lenz pour li sa madanm e osi sa fiy, san oubliy rob maryaz e bag. Alors sa madanm ti dakor e sa fiy ti tir sa rob desire lo li e met en lot rob. Me sa lot rob ki i ti mete ti annan gran morso pyes. Apre sa zot ti al anvil. La zot ti al dan pli gran magazen e zot ti aste bann trouso maryaz e apre zot ti retourn Por Glo kot manman sa fiy. Manman sa fiy ti kontan war tou sa bann keksoz ki kaptenn ti’n aste e en mwa pli tar zot ti marye. (Valz maryaz) ‘Napa keksoz ki pli zoli ki sa ler mon vwar nouvo avek nouvel marye, bradsou bradsou pe desann sa gran peron. Ranpli mon ver mwa bwar enm pti lasante. Ranpli mon ver mwa bwar enn pti lasante avek nouvo avek nouvel marye’. (lanmizik enstrimantal i kontinyen) zot ti al fer zot lindemyel dan en gran lakaz ki ti plizoumwen parey en lotel. Apre de semenn maryaz kaptenn ti bezwen retournen parske son konze ti pres pour fini e alor i ti dir sa fiy ki i ava reste avek son manman pour trwa mwan e apre sa trwa mwan i ava vin sers li pour anmenn li dan son pei. Sa kaptenn, apard sa lalyans ki i ti donn sa fiy le zour ki zot ti marye, i ti osi donn sa fiy en sennon e dan sa sennon ti annan en coeur, e lo sa coeur ti annan non kaptenn Edwar. Alor lannmen Kaptenn i pran son spidbot e konmans son larout pour retourn kot son travay. Apre ki i ti’n arive, i ti santi li dan lapenn akoz son madanm pa ti la pre o bor li. Alor ler zot atab, kaptenn Ferdinan ki ti’n remarke ki kaptenn Edwar pa ti parey labitid, ti dir avek kaptenn Edwar. ‘‘Kaptenn konmsi mon vwar ou pa parey labitid, eski i annan keksoz ki fin arive pandan ki ou’n laba Sesel ouswa i annan keksoz ki pa’n mars byen pandan labsans ?’’Kaptenn Edwar alor ti rakont li i son lavantir e dir ki in marye avek en zoli fiy me enn mizer parey i ti’n deza dir li. Kaptenn Ferdinan ti dir li, ‘‘ha har, ou’n gard ou promes en e alor mon swet ou bonn sans dan ou lavi maryaz.’’ Pa bezwen dir ou ki sa nouvel ti’n fer leker kaptenn Ferdinan anfle e i dir ek Kaptenn Edwar ki i li osi demen i pou bezwen al en kou Sesel pour li rod en fiy. Alor lannmen ti tour Kaptenn Ferdinan pour li vin Sesel. Menm zour ki i ti ariv Sesel i ti enformen kot madanm kaptenn Edwar ti reste. En zonm ti montre li lakaz madanm kaptenn Edwar epi i ti dir avek sa zonm si i ti kapab vol en keksoz valer pour madanm kaptenn Edwar e donn li e pour son rekonpans ya donn li trant roupi. Konman zot konnen ki sa letan la trant roupi ti en gran larzan alor deswit sa zonm ti aksepte. Alors i vin tranpe o bor lakaz sa madanm e vey lanbeli pour li vole. Lasans ti dan son semen. Pandan ki i ti la, madanm kaptenn Edwar ti al dan la chambre de bain pour li al pran son ben e i ti tir son sennon e poz o bor sa miray otour ki i ti osi pre kot la chambre de bain. Apenn ki madanm Edwar ti poz son sennon lo sa miray e al dan lasanmben, sa zonm ki ti la deswit i grenp miray e vol sa sennon. Kan madanm Edwar i sorti dan lasamben i al kot miray pour li pran son sennon me sennon pa ti la. I konmans plere parske i konnen ki kaptenn Edwar pour ankoler si i pa vwar sa sennon ler i vini. Pandan sa letan la sa zonm in al donn sennon kaptenn Ferdinan e i ti pran son sennon e avek en gran souriy lo son figir i ti dir, ‘‘har mon’n ganny sa ki mon ti ape rode.’’ Zonm li ti ganny son rekonpans trant roupi. Pov fiy laba deryer ti oule fol e i ti dir son manman ki son sennon ti’n disparet e son manman ti konmans donn li lanmen rode me ti anven. Lannmen kaptenn Ferdinan i al dan son pei pour rezwenn kaptenn Edwar. Ler i ti’n arive i dir kaptenn Edwar bonzour e fer parey son labitid. Aswar ler zot ti atab kaptenn Edwar i demann li si in vwar son fiy pour li marye e i ti reponn non. Apre Kaptenn Ferdinan ti konmans demann Kaptenn Edwar i demann kaptenn Edwar en pil kestyon konsernan son madanm. Enn sa bann kestyon ti, ‘‘en kaptenn, eski ou fye kit ou madanm Sesel e ou, ou isi? ’’ Kaptenn Edwar ti reponn, ‘‘mon madanm i enn de fanm ki pli fidel lo later e mon san poursan sir ki zanmen i ava enfidel anver mwan. ’’ Ler kaptenn Ferdinan i antann sa i dres en kou lo son sez e i dir dan li menm, ‘la en bon moman pour mwan montre li sa sennon.’ Alor i ti pran sa sennon ki ti’n byen anvlope dan en morso latwal velour e i montre kaptenn Edwar an dizan, ‘‘Kaptenn eski ou rekonnet sa sennon ?’’ Ler Kaptenn Edwar i vwar sa sennon son figir i sanz kouler e i transpire e avek lakoler i dir, ‘‘wi sa mon sennon e regarde mon non lo sa leker. ’’ I ti osi azoute, ‘‘kote ou ganny sa ?’’ Kaptenn Ferdinan ti reponn, ‘‘ou madanm ki swadizan fidel anver ou ki’n donn mwan.’’ Kaptenn Edwar ti pran son sennon e lanmenm avek en lakoler terib i ti al Sesel. An arivan Sesel i fer konmsi son labitid me i pa ti montre si i ti ankoler. Alor i dir manman sa fiy ki in deside vin sers son madanm menm ki trwa mwa pankor pase akoz i pa kapab reste tousel. Manman byen kontan e alor dakor pour les sa fiy ale. Salerla sa fiy pa santi byen ditou. Ennler i anvi dir son mari ki son sennon in perdi me apre i dir non akoz i santi ki son mari pou ankoler. Alor menm sa fiy avek son mari ti dir orevwar belmer e manman. Sa fiy ti dan lapenn akoz premye fwa i kit son manman e osi akoz sennon in perdi. Ler speedboat ti’n ariv lwen dan milye kannal, Kaptenn Edwar i dir avek son madanm, ‘‘met ou rob maryaz.’’ Sa zenn fanm ti etonnen e reponn, ‘‘be akoz ou dir mwan met ou rob maryaz ? Mon rob i ava gate.’’ Me kaptenn Edwar ti ankoler i dir li ankor enn fwa, ‘‘mon dir ou met ou rob maryaz.’’ Alor sa fiy pa ti kapab fer otreman e i ti tir son rob maryaz dan son valiz e met lo li. Apre ki i ti’n fini met son rob, Kaptenn Edwar ti fer li desann dan en softaz ki ti deryer sa speedboat. Sa fiy pa ti oule e i demann son mari pour ki rezon i oule fer li desann dan sa softaz. Kaptenn Edwar pa ti reponn me o kontrer ek lakoler i lev sa fiy dan son lebra e met li dan softaz. Sa fiy i konmans plere me kaptenn degree i ti’n ankoler ti inyor son plere e o kontrer i ti koup lakord aforsi son vites e kontinyen son larout ziska ki i ti ariv dan son pei. (lanmizik enstrimantal) salerla sa pov fiy dan sa softaz i pe pas martir. Aswar i dan sa gro lafreser. Pour son nouritir i vey bann pwason volan ki tonm dan softaz e i manz sanmenm. Pour delo i ranmas delo lapli dan en kokosye ki ti lanmenm la. Dan sa softaz ti osi annan en resanz matlo alor sa fiy ti retir son rob maryaz e met sa resanz matlo. Apre enn an en zour sa softaz ti ariv o bor later. Ti arive ki menm zour ki sa softaz ti ariv o bor later, ti osi lanniverser de garson ki ti zimo, alor sa de garson ti al o bor lanmer parey zot ti annan labitid fer. Ler zot ti lo lans zot ti apersevwar sa softaz ki ti pe drive dan zot direksyon e alors zot ti espere pour vwar lekel ki ladan. Ler softaz ti koste avek lans sa de garson ti vwar sa fiy ki ti’n anbiy konman matlo e zot ti krwar en pti garson. Zot ti dir li, ‘‘annou al dan lakour,’’ e sa garson ki ti sa fiy ti dakor. Ler sot ti ariv kot zot, zot manman ti byen kontan e dir zot la zot in ganny en bon kado lanniverser. Bondye in anvway en dalon pour zot. Sa pei kot sa softaz ti’n tonbe sete sa menm pti kot Kaptenn Edwar ti reste. Sa de garson ti travay avek Kaptenn Edwar e alor zot ti deside pour rod en plas travay kot Kaptenn Edwar pour zot nouvo kanmarad. Zot dalon ti dormi dan en lasanm li tousel e alor sa ti en gran lavantaz pour sa fiy parske i ti nobou sanze san personn vwar li. Sa fiy ki zot ti krwar en garson ti ganny plas travay kot Kaptenn Edwar e alor sa fiy ti rekonnet son mari, me son mari pa ti rekonnet li. Tou le zour sa fiy i al travay e ou le zour i vwar son mari me son mari pa konn ditou. En zour ti arive ki sa fiy i tonm malad e sa madanm, manman sa de pti garson pa ti okouran de sa me i ti remarke ki i pa ti ankor leve e alor sa madanm ti deside al ouver laport son lasanm e vwar kin arive. Ler i ouver laport sa madnam ti etonnen sa ki i ti vwar. I ti vwar ki cheveux swadizan en pti garson ti long e tout an dezord e son de sen ki ti’n sorti deor akoz son kanmizol ti’n deboutonnen. Sa madanm pa ti fer tapaz me i ti ferm laport deswit e al fer son louvraz. Pandan ki i ti pe travay i dir dan li menm, ‘mon pou fer li reste pa al travay, mon a fer li kas sa gro ronden dibwa sed, mwan gete ki i a dir mwan.’ Alor apre ki sa garson ti’n leve sa madanm san konnen ki sa fiy pa ti santi li byen i dir li, ‘‘ozordi ou pa pou al travay me ou ava reste pour ou kas sa ronde dibwa.’’ Me i ti reponn, ‘‘mon pa pou kapab, akoz mon pa santi mwan byen. ’’ Me sa madanm ti dir li, ‘‘pa bezwen manti avek mwan, mon konn tou. ’’ Alors sa fiy ti rakont li ki ti arive. Sa madanm i demann li si i ti a kontan retournen avek son mari. Sa fiy i dir wi akoz i ti ankor kontan son mari. Me i dir sa madanm pa bezwen dir son mari naryen akoz i pou ankoler si i konnen ki i ankor vivan e i pou riske touy li. Me sa madanm ti asir li ki Kaptenn Edwar pa pou fer li nanryen akoz i ava koz byen avek li e osi i byen li avek Kaptenn Edwar. Lannmen sa madanm ti al vwar Kaptenn Edwar e ti demann li si i ti ava anvi vwar son madanm. Kaptenn Edwar ti reponn an dizan, ‘‘mon ti a kontan vwar li me mon konnen ki zanmen pour arive akoz in fini pour li.’’ Me sa madanm ti asir li ki son madanm ti ankor vivan e ki i a kapab anmenn li kot li. Alor lannmen sa fiy ti met li en rob ki sa madanm ti’n aste e i ti al kot Kaptenn Edwar avek sa madanm. Ler Kaptenn Edwar ti vwar li i ti plere avek lakontantman e la sa fiy ti rakont li son martir ki i ti’n pase e sa ti fer leker sa Kaptenn fermal. Kaptenn Edwar apre ki i ti’n ekout tousala, i ti ekri en let lewa e i ti demann li permisyon pour li met de trwa ranze madanm dan en laplenn e fer kaptenn Ferdinan retir son madanm ladan e si Kaptenn Ferdinan pa ti kapab retir son madanm, li i a shoot kaptenn Ferdinan. Alor i ti ganny permisyon lewa e i ti fer aranz kat ranze avek bann zoli fanm e dan premye ranze i plas son madanm devan e apre i fer apel Kaptenn Ferdinan pour retir son madanm parmi sa kat ranze fanm. Kaptenn Ferdinan i pas dan premye ranze e i dir napa ladan. I pas dan dezyenm i dir menm zafer e osi dan trwazyenm e ler i ariv dan katriyenm i pa vwar. I dir ou pan’n met ou madanm dan okenn sa kat ranze. Ler kaptenn Edwar i antann sa, i avanse, i al dan premye ranze i atrap son fanm dan son leren e i dir, ‘‘sanmenm sa mon fanm.’’ E i azoute, ‘‘ou pa ti zanmen vwar mon fanm, e mon fanm pa’n zanmen enfidel anver mwan e akoz tou sa bann martir ki ou’n fer mwan fer li, la pour ou, ’’ e kaptenn Ferdinan i fini.

Sa i montre nou ki pa bon met diskord dan maryaz en dimoun e sa zistwar ti anvoye par Paul Pool de Mont Buxton.