La leson de la fortin

La zistwar la leson de la fortin anvwaye par madanm Renette Hallock, de lans Boukenvil, Mae.

Byen lontan, enn fwa, listwar pa dir ki landrwa, ti annan en onm ris apele Nima e son madanm. Nima ti en onm mechant. Akoz son fortin i ti krwar ki i ti plis ki tou dimoun. Son madanm ti esey reprimann li pour engratitid me Nima pa ti oule ekoute. En bon pe letan apre zot maryaz son madanm ti ganny en fiy e ti donn li le non de kora. Kan kora ti’n ne, Nima son papa ti al konsilte en mazisyen nonmen Orsa, pour Orsa anpes son fiy marye. An dizan, ki i pa oule okenn garson antre dan son fanmir, pour divertir lo son fortin. Alor rod en fason ki Kora pa pou marye.

Mazisyen ti dir ek Nima, ki i byen difisil pour fer sa me si i persiste i ava fer e Nima ti dir nenport ki fason. Alor mazisyen ti dir, “Byen dan dizwit an retournen nou ava vwar sa ki annan pour fer.”

Alor Nima ti retourn chez li, i pa ti fer personn konn son lentansyon. Dan en lot landrwa lwen avek kot Richard Nima ti reste, ti annan bucheron ek son madanm. Menm lepok ki kora ti ne, sa bucheron en zour dan son pe fer dibwa dan lafore, i ti annan en piti, en pti zanfan ti ape plere. Bucheron ti al dan direksyon sa plere e ti al vwar en pti baba, en garson anvlope dan latwal ater dan brousay. Sa bucheron ti ganny pitye pour sa pti baba. I ti ranmas li i ti anmenn li dan lakour kot son madanm e koman zot ti napa zanfan zot ti byen kontan ganny sa pti garson pour zot e zot ti donn li le non Fabyen. Fabyen ti grandi ek bon konsey bucheron ek son madanm e Fabyen ti konn zot koman papa ek manman bucheron. Kan fabyen ti’n gran, papa bucheron ti donn li en pti lars pour li aprann e ganny labitid travay. Tou le zour Fabyen ti war papa bucheron ale le maten ek son sret e retourn le swar, saret plen ek dibwa. Alor ti en zour de repo pour papa bucheron, Fabyen pa ti fer tapaz dan lapremidi. Fabyen ki pran bourik papa bucheron, ti met ek saret ek son pti lars e i ti dir dan li menm, ‘Mon ava al sers dibwa pa parey papa bucheron’ e Fabyen ti ale. Ni bucheron ni son madanm pa ti konnen. Dan lafore Fabyen ti ape koup dibwa e met dan saret kan en moman donnen i ti antann konmsi en dimoun ti ape koze dousman, asasasasa e i ti akoute ek en pe lafreyer e i ti dir an li menm, ‘Fodre mon konnen sa ki ape koze.’

Fabyen ti al dousman dousman dan direksyon sa koze e la ki i ti vwar. I ti vwar en tou pti bonnonm, son labarb blan e long ti’n pri dan en lafant trou dibwa, sa bonnonm ti ape esey tir son labarb me i pa ti kapab. Alor la Fabyen ti al donn lanmen bonnonm pour tir labarb e kantmenm ki Fabyen ti esey ouver dibwa ek son lars i pa ti kapab alor i ti dir, “Espere mwa va al rod sekour.” Fabyen ti detas bourik ek saret, i ti mont lo bourik e i ti al dir papa bucheron. Laba Papa bucheron ek son madanm pa vwar saret ek bourik, zot ti trakase e la osi zot ti vwar Fabyen arive lo bourik. Zot ti oule ankoler, me kan Fabyen ti’n dir zot sa ki ti’n arive dan lafore, deswit papa Bucheron ti dir, “Annou al vwar.” Ti pran zot ti neseser e zot ti al kot aksidan. Zot ti ariv kot pti bonnonm, son labarb ti ankor pri dan dibwa.

Bucheron ek Fabyen ti travay dibwa ziska ki zot ti tir labarb dan dibwa. Ti bonnonm ti byen kontan vwar li lib e son labarb antye pa ni koupe e alors i ti asiz lo tron dibwa e i ti bucheron ek Fabyen. Bucheron ti dir ek bonnonm, “Si en remersiman pour gannyen, pa mwan me Fabyen. San li mon pa ti ava konnen si ou ti’n ganny danze.”

La pti bonnonm ti’n fikse Fabyen e ti dir li, “Mon piti, sa ki ou fer la ozordi, bonnonm pa pou zanmen bliye en zour. En zour ou ava ganny ou rekonpans. Pa bliye mark byen parol bonnonm.” E la bonnonm ti kit zot.

Bucheron ek Fabyen ti pran saret dibwa e ti retourn se zot. Alor lot bor laba kot Richard Nima kan son fiy ti’n ganny dezwit an, Nima ti retourn kot mazisyen e la mazisyen ti dir ek Nima, “Ou pou fer ou fiy malerez san en konpannyen.” Me Nima ti dir, “Malerez ou non, mon pa oule personn viv lo mon byen.”

Mazisyen ti vwar danzere ki pou arive, se pour kwa ki i ti fer tou pour detourn move lide Nima. Me alor koman ki i ti vwar Nima persiste mazisyen ti dir ek Nima, “Mon a fer sa ki ou dezir i oule me ou pou regrete.”

Mazisyen ti al dan son lafore e i ti retourn ek en seval tou nwar. I ti donn sa seval Nima an dizan, “La en kado pour ou fiy. Sa seval pou ganny en pti seval, sa pti seval ava grosi. Kan i a vin gran, i a bon pour ou fiy brid li e monte. Ou fiy i a brid seval e monte e la mon dir ou, rises ou pa, ou pou regrete.”

Akoz mesanste e lavaris dan Nima, i pa ti konpran sa ki mazisyen ti ape averti li. Sa mazisyen ti konnen ki ti pou arive me i ti rezerve dir akoz i ti vwar ki Nima i bezwen ganny en leson. Richard Nima ti retourn se li ek sa seval byen kontan akoz ki i ti byen kontan , akoz, sa ki mazinen ti’n fer, ki son fortin a reste tou son fortin. An arivan se li ek seval, i ti dir ki enn son bon zanmi ki in fer Kora kado sa seval. Kora de la i ti dir ki i pa aprann mont cheval e koman Nima ti dir son fiy sa son kado, i pa ti vwar okenn fason pour son fiy mont sa seval. Msye Nima alala koman maler, me ou pa pou kapab anpes li arive, msye Nima ou menm ki fin anmenn li dan ou lakour. Alor Nima ti oblize li menm fer tou leneseser pour prepar seval setadir prepar lasel, labrid e enswidswit pour sa seval. Kan tou ti’n pare Kora ti komans aprann mont seval e dan pe de tan Kora ti’n vin kavalyer e i ti kontan son seval.

Kek tan apre, sa seval ti ganny en pti seval. De-z-an apre, pti seval ti’n gro e nwar parey son manman. I ti ganny le non de Hirondelle. E pa ti annan lot dimoun ki Hirondelle ki konpran ki Kora. Apard Kora, personn pa ti kapab apros Hirondelle. Apre kek tan Kora ti kapab sele e mont lo Hirondelle san aksidan. En bo zour, Kora ti sel Hirondelle e Kora ti al fer en pti pronmnad dan le zanviron. An arivan dan en pti semen, i ti al kot lafore, sa seval ti pran sa semen pour en tan. Kora ti les Hirondelle ale apre ki Hirondelle ti fin fer en long lakuors, Kora ti oule fer li retournen, me Hirondelle pa ti oule retournen. I ti kontinyen al drwat, swiv sa pti semen e Kora ti war pli ale Hirondelle ti ape al pli dan fonse e en serten moman seval ti pran mordan, e Kora ti sape lo Hirondelle e tonm ater. Hirondelle partir a la kours e perdi Kora. Hirondelle ti retourn dan lakour kot Nima papa Kora. Kan Nima ti vwar seval arive byen fatige san Kora, deswit i ti mazin prediksyon mazisyen. Ki pour fer ? E la traka e sagren ti pran li. Deswit Nima ti al kot mazisyen Korsa e mazisyen ti’n disparet e Nima ti napli konnen ki ti pou fer.

Dezespwar ti pran li, Nima ti retourn se li e anferm li dan son lasanm. I pa ti oule personn vwar li. Son madanm ti reisi al vwar li e demann li, “Ki fin arive Korsa e ki fin ariv li osi e oli Kora?” La Nima ti oblize rakont son madanm sa ki i ti’n fer e son madanm ti repros li andizan, “Depi okonmansman mon ti dir ou, ase orgeye e engra e ou pa ti oule ekout mwan e la ozordi Kora in perdi e kit nou, nou dan sagren la. Ou ti konn zis ou fortin, aprezan ou fortin i kapab ed ou.”

Nima pa ti dir nanryen e a lenteryer son douler ti for. Mentnan annou ekout sa ki ape pase lot bor. Fabyen li laba tou le zour i ti al ek papa bucheron dan lafore al fer dibwa e anmenn dan lavil pour vann pour zot viv. Tou dimoun ti kontan Fabyen e i ti en garson zanmen ankoler e zanmen osi riye. Alor en zour, papa bucheron ti al dan lavil fer en kont dibwa ki zot ti’n vann. Fabyen dan lakour ti dir manman bucheron, “Ozordi mon an konze, mon ava al pronmnen en tour lo en seval papa bucheron.” Fabyen ti sel en seval e i ti ale. Plis Fabyen ti ale, plis i ti vwar gou ale ziska ki i ti ariv kot en pti lakaz, e la i ti al vwar pti bonnonm labarb. Pti bonnonm ki i ti tir son labarb dan zwen tron dibwa. Koman pti bonnonm labarb ti vwar li, ti dir an riyan, “Ar be pti zennzan, ki soley ki’n anmenn ou isi.”

E Fabyen ti reponn, “Ar be mon pe pronmnen ozordi papa.”

“O lala ou fin donn mwan en non, ki zanmen dimoun fin donn mwan. Ou resanble mwan en gayar, vin asize nou a koze.”

Fabyen ti anmar son seval e i ti al koz koze ek papa labarb. Papa labarb ti dir ek Fabyen, “Mon apel papa siprinyen. Ki bon nouvel ou’n tande dan lavil.”

E Fabyen ti reponn, “Napa papa siprinyen.”

Papa siprinyen ti reponn, “Koman nouvel i annan. I annan en maler ki fin arive dan lavil, ou pa konnen ou.”

E Fabyen ti reponn, “Non.”

La papa Siprinyen ti dir, “Fiy Richard Nima, ki’n perdi. Loter son papa, i pa le son fiy i marye akoz son larzan e la mon krwar i annan lide fer kado larzan pour trouv son fiy. Me larzan tousel pa pou kapab tir son fiy kot i ete e mon krwar ki i a oule kantmenm en mizerab zwe dan son larzan pour al sers son fiy. Ki ou dir, ou pa oule al sers sa fiy mon piti ?”

Fabyen la pour premye fwa dan son lavi ti riye andizan, “Papa siprinyen, la ou ape monk mwan. Msye Nima i en milyonner. Mwan en fezer dibwa, kot pour mon kapab al sers son fiy?”

Papa siprinyen ti dir, “Mon piti i annan en parol ki dir fot diven ou bwar delo. Msye Nima konmela i parey sa proverb. Si ou al donn li delo i pou bwar. Alor pa bezwen ou gete si ou mizer ou non. Ou rapel senk an pase, ou pa reponn mwan mon pti, akoz ou ape pez ou laz ek sa ki pour mwan. Annou koz serye aprezan. Papa labarb pou rakont ou sa ki i konnen, nouvel dan lavil ki fin pase, kan ou a vin antann sa ki papa labarb i dir ou, ou menm ava koze. Sa msye Nima i en milyonner e i pa ti oule ki son fiy ki apel Kora marye, akoz son fortin. I ti fer en mazisyen anpes son fiy marye. Sa mazisyen in donn Nima en seval. Sa seval in ganny en seval, sa pti seval ti grosi e la sa seval in al zet son fiy. Sa seval i apel Hirondelle. Ti retourn dan lakour kot Nima san Kora. La sa Hirondelle fin vin brit e feros, pour al sers sa fiy la kot i ete fodre sa seval Hirondelle, me fodre dont li avan. I pa fasil pour donte sa seval. Senk an pase ou ti vwar papa labarb, son labarb ti fin pri dan dibwa ou ti al sers ed e ou ti vin tir labarb papa labarb. Papa labarb ti dir ou pa obliye en zour papa labarb zanmen ti pou obliye e la ozordi papa labarb pou rekonpans ou la mon piti. Papa labarb pa bezwen gard lontan ankor sa ki i konnen. Son letan ape aprose. Mon pa per pour retourn kot la terre du ciel et de la terre akoz mon papa labarb mon’n fer touzour dibyen lo sa later. Papa labarb in ed bokou dimoun an byen lo sa later e la i pou ed son piti ki fin donn li sa zoli non papa labarb. Mon pa konnen si mon tronpe, me mon dernye benediksyon mon pou poz li lo ou mon piti. Pa plere mon piti, ou leker i feb, i a vin for taler.”

De la papa siprinyen ti kit Fabyen deor i ti antre dan son pti lakaz. En bon moman apre, papa siprinyen ti sorti deor ek en pti lakord e en sab dan son fouro osi. Papa siprinyen ti donn Fabyen sa lakord ek sa sab an dizan, “Ale mon piti. Ou ava al kot Richard Nima, ou ava dir avek li, ‘mon vin donn mon lavi pour sov ou fiy kot i ete e Nima ava aksepte. Ou ava demann li sa seval brit ki apel Hirondelle e ek sa lakord ki mon’n donn ou la ou ava balans devan Hirondelle, e i a vin dous. Ekout mwan byen mon piti, ou pa pou met okenn lasel, ni labrid lo li, ou ava mont li pir koumsanmenm. Zis ki ou ava pas sa lakord dan son likou e i ava anmenn ou kot fiy Nima i ete. Sa fiy la i garde dan en kavo par en dragon dan kavern. Sa mazisyen ki ti donn seval Nima. Ou ava konbat sa dragon ek sa sab. Pa sote lo ou seval. Konbat sa dragon lo ou seval menm e ou ava touy li e sa mazisyen i ava oblize donn ou fiy Nima. Pa sote lo ou seval ou ava ganny sa fiy entakt. Ou ava met li lo Hirondelle e zot a retourn kot Richard Nima, ou ava rann li son fiy e ou ava ganny ou en rekonpans. Ale mon piti, pa papa labarb a priy pour ou e Bondye a ed ou.”

Fabyen ti pran lakord ek sab, dir bonzour papa labarb, i ti mont son seval e i ti ale. Fabyen ti al premye kot son papa bucheron e papa bucheron ti ape rakont disparisyon Kora alor la Fabyen ti dir, “Mon dan mon semenn, mon pe al sers Kora. Dan detrwa zour, mon a retournen,” e Fabyen ti ale.

Laba kot Richard Nima, son madanm ti al vwar en serten fortune teller apele Farar e Farar ti dir ek madanm Nima fodre ki en dimoun i dont seval son fiy pour sa seval anmenn sa dimoun kot son fiy i ete. Fortune teller ti osi dir, “Mon vwar en zenn garson ki ape vini, me i ankor byen lwen. Mon vwar ki sa garson ki ape vini, in fer en byen fe e par sa byen fe ki sa garson in fer, i’n ganny pouvwar dont sa seval e al sers ou fiy. Me pa mel ou ladan. Gard sa ki mon’n dir ou an sekre. Les ou mari aranz sa zafer koman i fin deranze. Si ou koz sa ki mon’n dir ou, ou fiy i a perdi pour touzour. Pa trakase, ale.”

Alor madanm Nima ti retourn se li ek kouraz e osi i ti gard sekre. Nef zour apre disparisyon Kora, Fabyen ti arive e demande pour vwar Nima. Fabyen ti ganny en koze ek Nima e ti dir, “Mon vin donn mon lavi pour sov ou fiy. Pa demann mwan ki mwan parske mon nesans mon pa konnen.”

Nima ti dir, “Jeune homme, ou premye ki prezant devan mwan, pour ofer son servis. Mon aksepte li ek bonker.” Richard Nima pa ti mazin son fortin sa moman, alor Fabyen ti demann seval Kora, Hirondelle pour li al lo la e Nima ti dir, “Jeune homme, plito ou mont lo en lyon ki ou mont lo sa seval.”

Fabyen ti reponn, “Si mon pa mont lo sa seval, ou pa pou zanmen revwar ou fiy.”

Alor Nima ti dir, “Ale, pran sa seval, me zanmen ou pou kapab sel li.”

Fabyen ti al kot lekiri kot Hirondelle ti’n anfermen, koman Hirondelle ti war Fabyen deor kot lekiri, ti sorti koman laflanm dife par son nennen. Fabyen ek son lakord ti ouver laport lekiri e sa moman sa seval ti ape fouy later ek son sabo e dimoun deor ti ape pran pitye pour Fabyen. Fabyen ti debout e get Hirondelle e apel li par son non. Hirondelle ti al kot Fabyen e i ti’n vin dous. Bannla ti sezi vwar ferosite sa seval disparet e vin dous dan en klendey devan sa zennonm etranze. Fabyen ti pas son lakord dan likou Hirondelle, anmenn li deor lekiri, mont lo li, kit lakour Nima e pran larout pour kavern mazisyen.

Mazisyen dan son kavern laba ti dir dan li menm, ‘Dragon ou vey lanmenm, mwan mon ale.’ Mazisyen ti’n vwar ki sa seval in arive donte par en garson e ozordi sa garson i mont sa seval. Napa narnyen dan son pouvwar pour anpes sa garson vin pran Kora e al avek. Se pourkwa mazisyen ti kit kavern san dir dragon nanryen. Pour dir i pe ale konmsi. Selman i ti dir dragon vey byen, zis i ti dir lanmor ape vini sakenn debrouy son lavi e mazisyen ti al pour touzour.

Hirondelle ti anmenn Fabyen kot kavern mazisyen e la apre en konba, Fabyen ti ekstermin dragon, me alala en lot zafer. Kavern ti fermen e Fabyen ti dan lenposibilite pour kapab konnen koman pour ouver kavern, e Fabyen ti ape rod mazisyen. Trwa zour apre ki Fabyen ti ape rod mazisyen dan lafore i ti apersevwar en peroke ki ti’n pri dan en kalite lasenn, ki ti’n mete pour atrap zwazo. Koman Fabyen ti vwar sa peroke i ti dir, “Akoz lonm i sitan mesan koumsa? Kan zot bezwen atrap zwazo, atrap direk, pa bezwen fer lasenn pour atrape e touy de pti zwazo inosan.”

E sa peroke ti reponn, “Wi, lonm i mesan.”

Alor la Fabyen ti tir peroke e i ti koup sa lasenn par morso e zete. Koman sa peroke ti vwar li sove ti demann ek Fabyen, “Zennonm, ki ou ape fer dan lafore? Ou ape fer lasas?

E Fabyen ti reponn, “Non, mon pe rod en mazisyen. I annan en kont pour li rann ek mwan.”

Sa peroke ti dir, “Annou dan lakour kekfwa manman a kapab ed ou rod ou mazisyen.”

Fabyen ti al ek peroke, zot ti ariv kot en souteren. Peroke ti soufle en kalite soufle e laport ti ouver e Fabyen ti vwar en bonnfanm. Bonnfanm ti fer Fabyen antre dan son souteren e peroke ti rakont bonnfanm sa ki ti’n ariv li e bonnfanm ti byen kontan pourdir son peroke in ganny delivre. La peroke ti dir, “Garson i ape rod en mazisyen, ou kapab ed li manman Misar.”

E manman Misar ti dir, “Annou eseye.” Alor manman Misar ti komans fer son travay e en moman apre i ti dir ek Fabyen, “Sa seval ki ek ou pa pou kapab anmenn ou kot sa mazisyen fin pase akoz i annan en gran presipiz pour sote. Sa seval ki ek ou i annan son manman e nek son manman ki kapab sot sa presipis. Ou ava al pran sa seval, me pa les personn konnen si ou ape pran sa seval. Kan ou a’n ganny sa manman seval, ou a retourn kot mwan avek e mon a dir ou sa ki annan pour fer. Ale mon enfant.”

Fabyen ti retourn kot Nima le swar e tou dousman i ti pran manman seval i ti al avek, i ti kit Hirondelle la dan lekiri e Hirondelle ti retourn feros de nouvo. Son bomaten en serviter Nima dan pase kot lekiri ti vwar Hirondelle dan lekiri e son manman seval napa. Deswit sa serviter ti al dir Nima e kan Nima ti vwar Hirondelle la dan lekiri brit e feros parey i ti ete avan e son manman seval napa. I pa ti konnen ki pour li fer. Ki fin kapab arive personn pa konnen, ni konpran. Hirondelle la dan lekiri, feros. E sa garson oli li? Oli Kora? Mister!

Pour le moman, annou les Nima ek son lakour dan mister. Annou al swiv Fabyen. Fabyen ti retourn kot manman Misar ek son manman seval. An arivan kot manman Misar premye keksoz la, seval ti ganny non la furie. Manman Misar ti dir ek Fabyen, “Pa tarde pour al atrap sa mazisyen akoz sa fiy ki mon vwar ou ape esey al delivre i pa byen, i dan en lakord. I’n bwar en delo fer dormi e plis i dormi i ape perdi lespirasyon ziska i a mor. Mon donn ou sa lasel ek sa labrid. Sel la furie ki ava anmenn ou. Mon peroke a montre ou kot sa presipis i ete. Nek la furie ki kapab sote sa presipis. Mon a donn ou osi sa korn, kan ou ava ariv lot kote sa presipis, ou ava soufle sa korn, sa i ava en challenge pour sa mazisyen. Zanmen dimoun in deza challenge li e i pou vin zwenn ou lo son seval. Ou pa bezwen efreye. Ou la furie ek sa lasel ki ou lo la, i fer en sel keksoz. Personn pa pou tir ou lo ou seval. Zot pou konbat. Dan konba, seval mazisyen pou ganny son lanmor e la sa mazisyen pou vwar li dan en move pozisyon. E la le moman ki ou ava domin li, ou a va dir ek li, mon eparny ou lavi a en kondisyon ki ou donn mwan lakle kavern ki Kora i ladan, e mon a les ou ale. Sa mazisyen ava oblize donn ou lakle. Kan i ava donn ou lakle, ou ava mark li ek en pti bout sab, nenport ki landrwa lo li, e ou ava retourn kot mwan isi. Ale mon piti.”

Fabyen ti sel la furie e ti pran semen pour al kot mazisyen, dirize par peroke. Kan peroke ti montre Fabyen presipis, peroke ti retourn kot manman Misar e Fabyen ti fransi presipis lo la furie. An arivan dan laplenn lot kote presipis, Fabyen ti soufle son korn e en pti moman i ti vwar mazisyen vini lo en seval tou nwar, e la konba ti konmanse. Zot ti a koud sab pandan trwa-z-erdtan. En moman donnen, seval mazisyen ti mank lepa e i ti fer kaskou e Fabyen ti antann en kou, klok! Seval tonbe, mor, likou kase. Mazisyen ti debout e Fabyen lo la furie ti get mazisyen andizan, “Ou seval fin mor. Mon a eparny ou lavi si ou donn mwan lakle kavern.”

Mazisyen ti vwar ki i napa nanryen pour fer, i ti donn lakle kavern Fabyen, anpansan ki kantmenm ki Fabyen ava zwenn Kora dan kavern, i pa pou fer Kora sorti dan lanmen lanmor. Fabyen ti atrap lakle ek mazisyen ek son lanmen gos, e mazisyen ti vwar lide Fabyen me ti’n tro tar pour li sape. Fabyen ti sizle lebra gos mazisyen ek son sab, ek son lanmen drwat, andizan, “Mon eparny ou lavi, me ou ava anmenn mon mark pour ou mazin mwan Fabyen pandan ou lavi.”

Fabyen ti kit mazisyen e ti retourn kot manman Misar. Manman Misar ti repran son lasel e labrid, i ti donn en pti fyol Fabyen andizan, “Al vit mon piti, al delivre sa fiy, mon vwar li bokou feb. Ou ava fer li bwar sa latizann ki dan sa fyol, i ava byen e ou ava al rann li ek son papa. Ale mon piti. Kekfwa nou a zwenn enn lot fwa si manman Misar ava ankor la. Kan ou a’n rann sa fiy son papa, ou ava atas sa lakle kavern dan likou la furie, ou ava al larg li ansanm ek Hirondelle, kekfwa sa de seval ava kapab rann lot servis avan zot mor.”

Fabyen ti dir mersi manman Misar e ti pran larout pour kavern. Dan kavern, Fabyen dan ouver, ti vwar Kora ape dormi ater, i ti fer Kora bwar latizann fyol e Kora ti leve ek lafreyer. Me Fabyen ti dir, “Pa bezwen ou per aprezan Kora, sa ki i fin fer ou ek ou papa dimal nepli aprezan. Annou, mon a anmenn ou kot ou papa.”

Tou le de ti retourn kot Richard e la Fabyen ti rann Nima son fiy. Richard Nima ti dan lazwa, osi son madanm e tou dimoun ti vwar Kora retournen sen e sof. Kora ti atas lakle kavern dan likou la furie e ti al larg Hirondelle e ti fer lede seval ale. Kora ti sagren son seval me son papa ki ti konnen kot seval ti sorti ti byen kontan ganny debarase. I ti dir Kora, “Ma fiy, sa ki sa zennonm fin fer fin byen fer.”

I annan enn i dir ki Fabyen ti marye avek Kora. I annan ki dir ki Fabyen ti retourn kot son papa e manman bucheron. Apre ki i ti’n retourn Kora kot son papa me sa ki nou konnen personn pa konnen ki fin pase apre ki Fabyen ti rann Nima son fiy e nou’n ariv alafen sa zistwar sete en zistwar anvwaye par Madanm Renette Hallock de Boukenvil son tit la leçon de la fortûne.