KRAB LOR

Mm. Jessie Hossen

Alors en zour ti annan en peser ek son madanm. Zot ti annan trwa piti. Tou le bomaten sa peser ti al lapes e letan i ti atrap bann zoli pwason i ti vann avek lerwa. En zour letan i ti lev son kazye i ti trouve ki i ti ‘n atrap en krab ansanm avek lezot zoli pwason. Parey labitid, i ti al kot sato pour vann bann zoli pwason avek lerwa. I ti gard enn fay fay pour Ii ansanm avek sa krab. Ler i ti ariv kot li, i ti war ki sa krab ti briye konmsi lor e i ti war sa zoli. Alor i ti pran sa krab e met Ii lo letazer vesel dan lakwizin. Apre i ti met sa de trwa pti pwason dan en pti kivet lo tabl i pour son madanm grate.

Vreman madanm ti antre lakwizin pour netway pwason pour fer bouyon. Pour Ii pa mouy son lenz avek delo pwason i ti lev son zip e trous dan son sentir e bese pour grat pwason. En pti moman i ti tann en lavwa ki dir, “Fer atansyon, bes ou zip, mon war ou mole. Atansyon !”

I ti vire, tou etonnen e i ti apersevwar sa krab anler lo letazer. “Kisisa? Ou ki pe koze! Ou en krab ensinifyan,” i ti dir. I pa ti kontan sa remark lo kestyon mole ditou. Alor i ti pran sa krab e depoz lo en pla lanmenm la lo latab manze.

Kan sa msye ti retournen zot tou le de ti met zot atab pour manze. Letan zot ti pe manze zot ti tann en lavwa ki ti dir, “Donn mwan en pe.”

Zot ti sirprann me sa madanm ti donn sa krab en pe manze. Kan i ti pe al pran lasyet ki zot ti’n donn krab manze ladan pour al lave, i ti remarke ki lasyet ti ranpli avek pyes lor. Menm zafer ti arive tou le zour. Anfen sa msye ek sa madanm ti’n abitye e byen kontan sa krab akoz par son lentermed yer zot ti’n vin ris.

En zour sa krab ti dir avek sa madanm,”Al kot lerwa e al dir Ii ki mon anvi marye avek son dernyen fiy.”

San demande ki per i dir, sa madanm ti al drwat kot lerwa. I ti al diskit sa kestyon maryaz. Lerwa ti riye letan i ti mazin sa lide en krab marye avek son fiy. Me i pa ti refiz sa demann akoz i ti en lerwa ki ti fer bokou atansyon e i ti doute ki sa ti swa en prens ouswa en lerwa ki ti’n degize. I ti dir avek sa madanm peser,”Retourn kot sa krab e dir Ii ki mon dakor pour mon fiy marye avek Ii. Me mon annan en kondisyon. Avan demen bomaten fodre ki i’n konstri en miray devan mon sato ki pli o ki lakour sato. Lo la fodre i annan tou bann fler dan lemonn ki pouse e fleri.”

Madanm peser ti retournen e fer sa konmisyon avek krab. La krab ti donn Ii en badin an or e i ti dir li, “Ale pran sa badin e tap trwa fwa la kot lerwa i dir ou i ti anvi sa miray. Demen bomaten i ava war son miray.”

La madanm ti ale e ti fer parey krab ti’n dir Ii. Lannmen bomaten kan lerwa ti leve, ki i ti war? Sa gran miray ti la devan son lizye parey i ti swete avek tou sort kalite fler. Apre sa madanm ti retourn kot lerwa e ti dir li,”Mazeste nou’n obei ou lord.”

“Tre byen, me mon pa kapab donn mon fiy an maryaz avan ki dan mon zarden i annan trwa fontenn. Premye i bezwen an or, dezyenm an dyanman e trwazyenm an bann zetwal briyan.”

Sa madanm ti pran sa badin ki krab ti’n donn Ii e tap trwa fwa dan zarden. Lannmen bomaten sa trwa fontenn ti la dan zarden lerwa. Ti napa zarden pli zoli ki sa dan lemonn antye. Alor lerwa ti donn son konsantman pour prenses marye avek krab e maryaz ti fikse pour lannmen.

Krab ti dir avek peser, “Prezan ou, pran sa badin e al tap lo sa montanny ki ou trouve laba. En zonm abiye an nwar i a sorti e demann ou ki ou oule. Dir Ii sa, “Ou met, lerwa, in anvoy mwan dir ou anvoy son resanz an or ki briye parey soley.” Demann Ii osi rob lor larenn garni avek bann pyer presye. Anmenn isi e anmenn osi sa kousen an or ki i ava donn ou.”

Sa vye peser ti fer parey krab ti’n dir Ii. Apre ki i ti’n anmenn sa de lenz, krab ti abiye e apre mont lo kousen. Peser ti pran sa kousen avek krab lo la e anmenn kot lerwa dan son sato. La krab ti prezant son fitir madanm avek son zoli rob maryaz.

Apre seremoni maryaz, kan sa de nouvo marye ti tousel, krab ti dir son madanm ki i ti ete. I ti garson pli gran lerwa dan lemonn. En mazisyen ti’n sanz Ii an krab. Lizour i ti en krab me aswar i ti en prens. I ti osi annan pouvwar fer Ii vin en leg kan i ti anvi. Osito ki i ti’n dir sa nek i ti sakouy Ii e vin en zoli prens. Me lannmen bomaten i ti bezwen antre dan son lakok krab. Menm zafer ti arive tou le zour.

Sa prenses ti byen kontan son prens krab e sa ti sirprann lafanmir rwayal. Zot ti soupsonn keksoz me menm si zot ti misouk zot pa ti kapab dekouver naryen. Enn an ti pase e prenses ti ganny en garson ki ti apel Bezanmen. Son manman ti trouv sa drol. En zour i ti dir avek lerwa demann son fiy si i pa ti a kontan marye avek en prens olye sa krab. Me sa fiy ti reponn,”Mon’n marye avek mon krab, limenm Ii mon msye.”

La lerwa ti dir li, “Mon pou organiz en tournwa pour ou. Mon pou envit tou bann prens dan lemonn antye e si ladan i annan enn ki ou kontan, ou ava marye avek Ii.”

Aswar, prenses ti rakont sa krab e krab ti dir li,”Pran sa badin, al dan baro sato e tap baro avek. La en zonm abiye an nwar ava vin demann ou ki ou bezwen. Dir li, “Mon met lerwa in anvoy mwan isi pour dir ou anvoy son lenz lager an or ek son lepe an arzan ek son ponm an arzan.” I ava donn ou e ou anmenn isi pour mwan.”

Prenses ti fer parey son msye ti’n dir Ii e anmenn sa bann zafer pour Ii. Lannmen swar prens ti abiy Ii pour tournwa. Avan i ti ale i ti dir avek son madanm,”Letan ou war mwan, tansyon ou dir ki mon menm mwan krab. Si ou dir, sa pou port nou prezidis. Ou, debout par lafnet ansanm avek ou bann ser. Mon ava pas devan ou lafnet e anvoy sa ponm larzan avek ou. Gobe. Me si zot demann ou ki mwan, dir zot ki ou pa konnen.” La i ti anbras son madanm, dir Ii fer atansyon e i ti ale.

Vreman prenses ek son bann ser ti debout par lafnet pour get tournwa. En pti moman son msye ti pase lo son seval e anvoy ponm larzan avek Ii. I ti gobe e anmenn dan son lasanm e apre son msye ti arive. Me son papa ti sirprann ler prenses ti dir ki i pa ti kontan okenn sa bann prens. Alor i ti organiz en lot tournwa.

Krab ti donn menm konsey son madanm me sa voyaz sa ponm ti an or. Son msye ti dir avek li,”Ozordi mon konnen ki ou pou trai mwan.”

Prenses ti fer serman ki i pa ti pou dir ki i ete. Son msye ti dir Ii fer atansyon e i ti ale. Sa zour swar, pandan ki prenses, son manman ek son bann ser ti pe debout par lafnet, prens ti galope lo son seval e anvoy ponm lor avek Ii. Son manman ti ankoler e donn Ii en kalot dan latet an dizan, “Eski sa zoli prens pa tous ou leker? Enbesil!”

Prenses dan lafreyer son manman ti reponn,”Sa prens limenm Ii krab.”

Son manman ti pli ankoler ankor akoz son fiy pa ti’n dir Ii sa depi avan. I ti al dan lasanm son fiy e la i ti war lakok krab. I ti pran e zet dan dife pour brile. Prenses ti plere tou son leker, me son prens pa ti retournen.

Prezan annou kit prens e annou al war en kou lezot dimoun dan sa zistwar. En zour en vye tonton ti al dan larivyer pour tranp en lakourt dipen pour Ii manze. I ti war en lisyen ki ti sorti dan delo, aras li son dipen e tay avek. Sa tonton ti tay deryer li me sa lisyen ti diriz ankouri kot en lakaz, ouver laport e antre, sa vye tonton deryer Ii. Zot ti ariv kot en leskalye ki ti desann anba, lisyen devan, tonton deryer. San konnen ki ti’n arive, nek i ti war Ii dan en gran sato. Dan sa gran lasal kot i ti ete i ti war en latab avek pour douz dimoun. Ler i ti tann tapaz marse i ti per e kasyet deryer en gran portre.

Ler midi ti arive, i ti tann en gro tapaz. I ti tranble avek lafreyer. Kot i ti ete deryer portre i ti trouv douz leg pe anvol anndan. I ti pli per ankor. Sa bann leg ti anvol dan en basen ki ti dan fon lasal. En pti moman zot ti sanze e vin douz zoli prens. Zot ti asize e manze. Enn ti pran en goble an or e leve pour bwar en lasante. “Mon bwar lasante mon manman, mon papa.”

En lot ti dir,”Mon bwar lasante mon manman.”

Tou lezot ti bwar lasante enn apre lot. Finalman dernyen ti dir, “Mon bwar lasante mon zoli madanm, ki i ava viv lontan, me malediksyon lo son manman ki’n bril mon lakok.”

Apre, ler i ti’n dir sa, i ti plere. Apre sa zot ti leve lo latab, al dan sa basen, sanz an leg e zot ti ale.

Ler tou zafer ti’n fini, sa tonton ti sorti deryer sa portre e al dan lakour. Pa tro lontan apre i ti tande ki prenses ti malad e sel keksoz ki ti fer Ii dibyen sete kan dimoun ti rakont Ii zistwar. Alor i ti al dan sato e rakont prenses ki ti’n ariv Ii. Konman i ti fini rakont Ii sa zistwar leg, prenses ti demann Ii si i rapel kote sa sato souteren ti ete.

“Wi, sertennman,” i ti reponn.

Prenses ti dir Ii anmenn Ii laba deswit. Sa vye tonton ti dakor. Ler zot ti ariv dan sato zot ti kasyet deryer sa gran portre. En pti moman apre bann leg ti arive, sanz an prens, e deswit prenses ti rekonnet son msye parmi zot. Zot ti asize e setaki ti bwar lasante an loner en dimoun dan zot fanmir. Tour prens krab ti arive.

I ti dir: “Mon bwar lasante mon zoli madanm, ki i ava viv lontan. Me malediksyon lo son manman ki’n bril mon lakok.”

Prenses kot i ti ete, ti nepli kapab tenir. Nek i ti sorti e may son msye. Deswit i ti rekonnet son prenses. I ti dir li, “Eski ou rapel zour mon ti dir ou ou pou trai mwan? Ou krwar prezan ki mon ti pe koz laverite? Me tousala in fini. Prezan ekout mwan byen. Fodre ki mon reste koumsa pandan ankor trwa mwan. Ou dakor pour reste isi avek mwan ziska mon ava’n delivre?”

Alor prenses ti reste avek Ii. I ti dir sa tonton retournen e al rakont son paran ki ti ‘n arive. Zot ti ankoler kan zot ti tann sa me trwa mwan ti pas vit. Prens ti delivre e i ti arete vin leg. La zot tou le de zot ti retourn kot zot e zot ti viv ere ansanm . Nou ki lir sa zistwar nou pli kontan ankor.