KOUPER BOUT PA KONN SON TONAZ

Ti annan en onm ki ti kontan bwar bout larak son kanmarad. Si in konnen son kanmarad in ganny lapey le kenz ou lafendimwan, I al kot zot i dir avek zot, “My friend, ou’n gannyen ozordi pa ou lod, fer keksoz. Mwan demen ki mon pou ganny mon lapey parske mon’n ariv an retar kot biro ler ti pe peye. Ler mon arive, pay master in dir mwan ki in tro tar prezan. Mon’n fini fer lapey, pas demen e ou a ganny sa ki pour ou.”

Alor o komansman, kanmarad pa ti ankor konpran li, si i ti en lakle ki i ti pe kase pour li ganny bout bwar avek zot. Ler i’n byen koup bout avek son bann kanmarad, e ki in nepli konn son tonaz, i dir avek zot, “Mon bann zanmi, mon ale. Demen menm ler en nou a zwenn e mon a fer zot parey zot in fer mwan ozordi.”

Landmen i konnen ler tou son bann kanmarad ki i ti pe koup bout avek ti dan travay, i pas anba anba i al pran son lapey. I ranpli byen son vant avek son gines epi i deklar malad, i pran leave i al raport ‘sick’ son apremidi. Dokter i donn li de zour, trwa zour konze. Ler in fini fer fize tou son larzan, ler i vwar tou son bann kanmarad ankor, ler i vwar zot pe bwar, i dir avek zot, “Mon bann zanmi, sa malad vant in tres mwan. Sa detrwa zour mon ti oblize al raport ‘sick’ e mon’n ganny de zour konze. Mon pa’n kapab tous labwason ditou pandan sa de zour la. Ladan menm bonnfanm dan malad in kaptir tou mon larzan, i’n kit zis trwa roupi pour mwan aste sigaret, e la mon napa en sou lo mwan pour fer latizann. Kontrer fer keksoz. Mon dan en anvi tap enn ptipti ozordi.”

Sa bann dalon i konmans kraz li an krwayan ki i vre son bonnfanm in kaptir tou son larzan e donn li zis trwa roupi pour aste sigaret. Zot riy li, zot kraz li mannyer zot oule. I reste obeisan menm e i riye menm. Zot tap li kalot deryer son likou e kanmenm sa i kontan menm, i riye menm li. Zot dir avek li, “Ou boy fanm ou. Fanm i domin ou ki mannyer i oule. Ki sa kalite zonm parey ou ki fanm i aras ou tou ou larzan.”

Kanmenm zot dir li tousala, i fer konmsi i san fason. Ler son bann kanmarad in byen kraz li e fatige tap tap li kalot deryer son ledo, la setaki i dir, “En la en bout, koupe.”

I pa demande ki per i dir, i koupe menm e afors koup bout, i arive sou ankor parske koup bout larak ou pa konn ou tonaz. Ler i’n byen koupe, i dir avek zot, “Bann zanmi, i tar. Mon bezwen ale akoz mon annan lwen pour mwan ale.”

Alor la i kontinyen vin dan menm landrwa ki son kanmarad i kontan vin bwar e i kontinyen demann bout ankor. I fer sa tou le zour ziska lot mwan i ariv ankor. Ler lot mwan i arive, i oule rezwe ankor menm rol, me par maler enn parmi son bann kanmarad ki ti pe koup bout avek li, i vwar li dan kwen dan en magazen, i pe tap son gines li tousel. Son kanmarad i fer konmsi i pa vwar li. I les li sorti andeor magazen i dir avek li, “Ki i dir zanmi? La ou’n sarze ozordi, fer keksoz!”

Akoz i annan larzan lo li, i deklar li en lakoler avek son zanmi. I dir, “be la kote ou trouv larzan lo mwan? Ou pa ni konnen ki pozisyon mon été, zis ou dir mwan mon a fer keksoz? Koman mon ganny mon lapey, bonnfanm i komans dir mwan ki manrmay i‘n oblize lev tou mon lapey donn li. Ni en pti grog mon pa’n tape avek mon larzan lapey. Okontrer ou fer keksoz!”

Son zanmi i dir avek li, “Mwan pase ou ti zwe ou rol e mon ti’n byen krwar sa ki ou ti dir mwan ti vre. Me ozordi mon’n dekouver ou lakle e ki ou pe sey kase ankor avek mwan.” I dir avek li, “ou’n fek dir mwan ki en pti grog ou pa’n goute avek ou larzan e mon fek vwar ou kwense dan kwen magazen sa Sinwan ou pe antonn en gro boutey gines. Me ou rol pa ek mwan. Pa vin zwe ou rol ankor ek mwan.”

Ler son kanmarad ti’n dir li sa, ti napa pli gran ofans pour li. Ti annan en pti bout feray dan son lanmen. I anvoy lo son zanmi e par kanmizri, i rann li byen ankoler e i ale, i kit son zanmi lanmenm o bor magazen sa Sinwan. Apre ki ti’n ariv sa, son zanmi i al vwar son bann kanmarad avan e dir zot, “Zot ozordi mon’n dekouver mon boug ki tou le zour i vin bwar bout avek mwan. Mon vwar ki in kwense dan kwen en magazen Sinwan. I pe antonn en gro boutey gines li tousel. Mon fer konmsi mon pa vwar li, mon les li fini bwar son gines. Koman i sorti dan sa magazen mon dir avek li, ‘me ki ou dir zanmi, fer keksoz. Ou konnen i dir avek mwan e ou la mon dalon ou konnen dan ki tangaz mon ete la? Mon lo serk. Koman mon’n ganny peye, mon pa ni tap enn pti grog e bonnfanm in fouy dan mon pos in kaptir tou mon larzan. Tou mon larzan bwar e mon larzan sigaret ki mon ti’n met akote.” Son kanmarad i kontinyen rakonte i dir, “ler mon dir avek li dalon pa koz manti. Mon pa i fek vwar ou pe antonn en gro boutey gines ou tousel? Ler mon dir li sa, sa kanmi ki i ti’n ete ti rann li byen ankoler. Ti annan en pti bout feray dan son lanmen, i anvoy avek mwan. Si mon pa bare, ti’n kas mon lizye.” I demann avek son bann kanmarad, “ki mannyer nou pou kapab aranz en boug koumsa?”

Son bann kanmarad i dir, “Annou apel li kouper bout”, e la zot tou zot ti apel li kouper bout e sa non ti reste avek li ziska ozordi. Zot tou zot konnen ki i en gran baif, alor zot tou zot ti mefyan li e pa donn li bout bwar parey labitid. Ler son bann dalon ti’n diskontinyen donn li bout, i ti santi li byen anbarase e prezan koman i ganny son larzan, i fer fiz tou sa ki I kapab. Sa ki i ariv avek kot son lakour dan son pos, sanmenm. I dir, ‘Mon pa mayn, demen mon a ganny bout avek lezot zanmi ki pa ankor konn mon nouvel poudir mon baif avek mon bann zanmi avan.’ Sa ler i pa konnen si sa enn ki ti son zanmi avan, in al rakont tou son bann kanmarad son degre baif ki i baif e ki son bann kanmarad in al rakont lezot bann kanmarad dan en fason ki ti napa byen byen dimoun ki pa ti konn son defo. Ler tou son larzan lafendimwan ti’n fini, i esey apros en lot bann zanmi pour li koup bout parey i ti’n fer avek son bann zanmi avan. Me initil zot osi zot in aprann ki defo ki i annan e ki i en gran kouper bout e an menm tan en gran baif. Sa bann nouvo zanmi ki i esey aprose, tousala i dir avek li, “Initil, mon tann sa kalite rol ki ou’n zwe avek ou bann zanmi avan, avek nou ou pa pou zwe ditou sa. Nou’n konn tou ou defo.” Partou kot i al zwe son nouvo rol zot tou zot dir li menm soz. I kalkile ki i pou fer prezan. “Mon bann bon bon vas letyer ki mon ti abitye nektar avek, zot in komans tap mwan koudpat,” i dir. “La mon fes sek. Ni pwason pour mwan anmenn dan lakour mon napa. Ki tangaz mon pou al gannyen avek mon bonnfanm?”

Toudmenm i pa tro perdi tou lespwar. I koste o bor bazar pwason kot bann peser ti pe vann zot pwason. I vey lanbeli koman en peser i bat son lizye, i ris en pake pwason sa peser i met dan son gran tant vakwa e i dir mon lipye anmenn mwan dan lakour. Pov peser pa konnen si i annan son pake pwason ki’n ganny eskamote par Kouper Bout, malgre ki i ti’n rente li pour al lapes son pwason pour li ganny manze pour son bonnfanm ek son bann zanfan. Alor bonnfanm Kouper Bout, li osi pov dyab, i pa konnen si son bonnonm in al zwe sa kalite trik kot bazar ki in anmenn sa zoli pake pwason kot lakour. Telman ki i ti en zoli pake, sa menm zour ki son bonnfanm ti pli cheri son bonnonm. I dir avek li, “Aprezan wi. Mon’n war ki ou komans pran zentere ou lakour. Ou komans anmenn zoli pake pwason ki zanmen ou’n deza anmennen depi ki nou ansanm. Si ou mars koumsanmnem, nou a tonm dakor.” Kouper Bout dan son leker i dir, ‘Mmm. Ou pe dir sa, me ou pa konnen letan ki mon ti pe ris sa pake pwason sa peser pour mwan met dan mon tant, mon ponnyen drwat ti riske reste dan sa plas.’ Aswar ler zot ti’n fini dinen son bonnfanm ti dir avek li, “Ar ozordi wi. Mon’n bwar en bon bouyon blan, me mon pa konnen la kan ankor.” Kouper Bout pa dir li nanryen. Dan son leker i dir, ‘Ou rabase ou. Mwan ki konnen ki lanbeli, si lanbeli a donn ankor ou non parske sa ki mon’n fer i pa en dyob fasil. Ant lavi ou perdi ponnyen sa.’

Toudemenm de zour apre ki sa pake pwason ti’n fini, Kouper Bout i desann ankor anvil. I komans fer ankor son lespri ki mannyer i pou zwe son rol ozordi pour li ganny son bouyon san rente. I esey mandyan en pti larzan ki i mazinen pa konn son defo me tousala i dir avek li, “Me ou ki kalite dimoun ki travay ki zanmen ou bourzwa i pey ou? Depi le premye ziska le tranteen ou bourzwa pa ankor pey ou menm? Kisisa i gard tou larzan i met dan lakrwa rouz!”

Ler i fini ganny sa bann koze mirak koumsa, i glis trankil e i ale. Me kanmenm sa, me i pe mazinen, ‘me zot ki bouyon tanto?’ Apre ki i ti’n fini fer son lide, i pa trouv lot keksoz ki al esey ankor enn fwa vey lanbeli dan bazar pour li ganny son bouyon parey i ti fer avek sa peser avan yer. Alor i pa ti tro tarde, i ti diriz ver Lari Bazar. Ler i rantre dan bazar, i remarke ki dan bazar zafer pa mars tro byen. I annan zis Madanm Paton lo bazar ek en sel peser ki pe vann marswen sale e ti napa lot keksoz koman bouyon pour tanto dan bazar. Alor Kouper Bout i get partou dan bazar, pwason i pa vwar. I vwar sa peser ki pe vann son marswen sale e i koste o bor. Letan ki bann dimoun pe dir donn mwan en liv, lot donn mwan en demi liv, Kouper Bout pa dir nanryen li. Son lizye in kler, i pa bat ditou. I get sa peser menm e i vey son lanbeli pour li pran en ta en liv sa marswen sale. En moman ki sa peser in al bat son lizye dan pe sanz larzan, Kouper Bout i dir dan li menm, ‘la lanbeli in donnen. Mwa ekspoz mon ponnyen drwat avek gran kouto sa peser. I anvway son lanmen drwat i ris en ta edmi sa marswen sale, i pa ganny sans pour li met dan son tant nek i glis dan son pos.

Kanmenm ki i’n met sa dan son pos, en bout in depase deor e i pa’n port atansyon. Ler i pe kit bazar kot i ti’n debout pour li ale, sa peser son lizye ti frap lo li e i remarke ki sa zonm pa’n aste marswen sale avek li e i dir dan li menm sirman ki in vol en ta mon marswen. I tay deryer Kouper Bout avek son gran kouto e i dir avek li, “E ou la, ou pa onte ou vin vol mon marswen sale lo bazar?” I ris sa bout ki ti’n depase e i dir avek li, “Ou oule mon anmenn ou lapolis pour vol mon marswen sale?”

Kouper Bout avek son kanmizri i oule fer son pti debat pour fer krwar dimoun ki i pa’n vole. Me sa peser i konnen ki Kouper Bout pa’n aste marswen avek li. Alor i fer li pli dir ankor. Afors diskite li ek sa peser, bann dimoun dan bazar i dir avek Kouper Bout, “Ase diskite. Soumet e aksepte ki reelman ou’n vol marswen sale sa peser. Aksepte avan lapolis i arive pour pran ou kontrovansyon epi i ava en laont pour ou avek ou madanm e ou fanmir, e sa ki pou pli move Kouper bout, zot a osi apel ou marswen sale.”

Alor la i rilaks e sa peser i dir avek li, “Mon ti a byen kapab les ou ale avek sa marswen sale me ou tro fer dir an dizan ki ou’n aste e dan sa ka ou’n oule pran mwan pour en manter. Se pour sa ki mon pa pou donn ou mon marswen.”

Pa bezwen dir ou Kouper Bout devan tou sa bann dimoun ki ti dan bazar in ganny gro latet pti likou. I sorti dan bazar i ale tou kanmi e san en gout bouyon pour anmenn dan lakour tanto. An arivan se li, son bonnfanm i demann avek li, “Me kwa, napa bouyon tanto?”

I dir, “bazar i prop parey ou trouv la dan lari i ete. Mon pa’n trouv ni en peser dan bazar. Mon’n trouv zis Madanm Paton lo bazar.” Salerla i pa dir avek son bonnfanm ki i napa larzan lo li e ki tangaz in gannyen avek sa peser pour son marswen sale ki i ti’n vole. Me parmi sa bann dimoun ki ti pe debout dan bazar sa zour ti annan en fanm ki ti bon zanmi avek madanm Kouper Bout. Sa fanm son landmen i zwenn madanm Kouper Bout e i dir avek li, “Mon ser vini.” Ler madanm Kouper Bout i vini i debout o bor li, sa fanm i dir avek li avwa bas, “Mon ser, mon a frot ou en pti nouvel me pa met mwan dan dezagreman. Gard li pour ou e pa dir ou bonnonm.”

Madanm Kouper Bout i demann avek li, “ki’n arive mon ser? Dir mwan. Mon promet ou ki mon pa pou dir li narnyen.” Sa fanm i dir avek li, “Mon ser i annan ler mon oule dir ou me en ler mon pa fye. Mon per ki ou al dir li apre demen sa zonm a zwenn mwan dan semen e a zir mwan e a dir mwan pa bezwen vey son zafer.”

Ler sa fanm ti’n fini dir sa, sa i fer leker madanm Kouper Bout sote. I’n fer li mazin lot keksoz ki sa fanm in vwar son bonnonm pe fer. I dir avek sa fanm, “Ki sa keksoz ki ou’n vwar li fer ki ou pa kapab dir mwan. Pa posib, ou’n bezwen vwar li pe fer kek pti kazinar avek en pti rondel!”

Sa fanm i dir avek li, “Non mon ser. Mon pa’n vwar li pe fer okenn kazinar avek personn me senpleman sa ki in fer konmsi mon en pti pe kanmi pour mwan akont ou.”

Madanm Kouper Bout i dir avek li, “Si ou ti kanmi pour ou dir mwan, ou pa ti a’n komans dir mwan narnyen. La koman ou’n komans dir mwan ki ou per pour rakont mwan tousala. Ou’n met mon lespri dan en gran traka e si ou pa dir mwan ki ou’n vwar mon bonnonm fer, zanmen ouver ou labous avek mwan ankor.”

Sa fanm i dir avek li ankor, “Mon ser mon a dir ou me pangar demen mon pas zaviron milye dan sa zafer en.”

Madanm Kouper Bout i dir avek li, “Mon dir ou kont lo mwan mon ser. Sa ki ou dir mwan i fini lanmenm. Zis mwan avek ou ki konnen e personn ankor pa pou konn sa.”

Sa fanm i dir, “Bon mon ser. Si ou gard ou lalang parey ou’n dir mwan, alor mon a rakont ou.” I dir avek li, “Mon ser yer mon’n onte pour ou par dan bazar. Ou konnen ki ou bonnonm in arive fer yer?”

Madanm Kouper Bout i dir, “En donn mwan mon ser, ki i’n fer?”

Sa fanm i dir, “I al dan bazar kot en peser ti pe vann son marswen sale, i pran en gran bout sa marswen, i glis dan son pos. Ler i devire pour li ale, sa peser i vwar son marswen sale dan son pos e tay deryer li e aras li sa bout marswen ki ti dan son pos e dir avek li si ou pa rann mwan mon marswen sale, mon sot ou lebra avek mon gran kouto. Mon ser, mon ti’n pli kanmi ki li, sirtou devan tou sa bann dimoun ki ti dan bazar e li ou bonnonm, li osi i ti’n tou kanmi. Kan ou vwar ni en parol i pa ti kapab dir sa peser. I zis gete kat kote si dimoun pe get li e i pran son semen i ale.”

Ler sa fanm ti’n fini dir li sa, madanm Kouper Bout i komans tranble avek lakoler. I dir, “En alor koumsa ki i fer! Ler i’n fini bwar tou son larzan, i al vol marswen peser dan bazar. Pour fini i ava anmenn mwan lanmor dan lakour san ki mon pe pans apre parski mon krwar ki kan i anmenn bouyon dan lakour, i pe aste. Salerla i pe vole, vol marswen peser dan bazar. Sepa si avan yer sa zoli pake pwason blan ki i ti anmennen, i pa ti’n vole menm ankor.”

Ler sa fanm ti’n remarke ki madanm Kouper Bout ti pe komans tranble avek lakoler, i dir, “E mon ser i tar. Mon bezwen al aroz mon lenz. Konmela mon mazinen in sek dan soley.” I dir, “Mon ser, parey mon’n dir ou en, pa bezwen met mwan dan kankan avek ou bonnonm.”

Madanm Kouper Bout i dir avek li, “Pa traka ou mon ser. Mon pa pou dir personn nanryen ki ou dir mwan.”

Alor tou le de i kit kanmarad e zot al se zot. An arivan se li, madanm Kouper Bout pa demande ki per i dir. I kriye, “E ou la zonm, ou pa onte? Ou bwar tou ou larzan epi ou al vol marswen sale peser pour vin donn mwan pour manze! Me ou zonm menm ou? La mon dir ou si mon antann ankor enn fwa ki ou’n vol swa marswen sale ouswa pwason peser lo bazar pour vin donn mwan pour manze, mon pou kite avek ou sa menm zour parske ou’n fer mwan ganny gro latet apre ki mon’n aprann vilen manni ki ou’n al fer dan bazar e tou dimoun in konnen ki ou’n al vol marswen sale sa peser lo bazar.” Brizin i kontinyen dispit avek li e i dir li, “Sa pa premye fwa ki mon’n ganny sa bann move rapor lo ou. Selman akoz mon pa dir ou nanryen ou krwar ki mon pa konnen en?” e i dir avek son bonnonm ankor, “ou krwar ki mon pa konnen ki ou pas ou letan nek koup bout larak avek ou kanmarad e ou kan ou ganny ou larzan, ou rann ou mesan pangar ou kanmarad a kapab dir ou ozordi fer keksoz e apre ki ou’n fini bwar ou larzan ki ou’n al bwar an kasyet, la ou pas kot ou bann kanmarad, ou rann ou dosil kanmenm zot koz ou mirak, kanmenm zot zwe tape avek ou, ou rann ou dosil menm pour ou ganny bout bwar e la prezan, tou bann zanmi ki ti abitye donn ou bout bwar, zot in arete, e plis zot in donn ou en nickname Kouper Bout’. Ou a dir mwan ou pa onte pour ou kouler lapo?”

Kouper Bout ti’n fini kanmi ler bonnfanm ti’n fini dir, dir li tou son defo e depi sa, kanmenm i ankor annan son move labitid koup bwar avek son kanmarad me pa parey i ti pe ale oparavan parski i byen difisil si en dimoun in konn son metye pour li obliye. I annandeler ki apre en maler i fer en boner e gras a aksidan marswen sale avek sa peser, ki son madanm in repros li, ki’n aret bokou lelis Kouper Bout e in fer li diminye bokou sa kalite koup bout larak ki i pa ti zanmen kapab konn son tonaz.