KONTAN BOKOU

Alors en foi ti trouv anan en bonome ek son bonefame. Zot tine né La Digue é zot zot tine marié laba meme . Apré en e louvraz pou li al travay lo zil Marianne. Sa lépok laba Marianne, en konpagnen ki lime ti en famiy, ti fer disel. Alors, Joseph ek son bonefame, Marie, ti al resté laba. Li Joseph I ti travay lo popriété tandis ki son bonefanme ti resté kot lakour pou li fer tou lokipasion lakaz.

Salerla, vane souet ine vanté. Tou dimounn ine komanms santi lafen bouyon. Ton Joseph ek Tane Marie zot ine fer ene ti konsey asoir. Zot fer rézon bouyon. Bonome I dir ek bonefame:

• Bé la koman mon oir, nou ava al lapes en kou.

• Joseph o, asé kozé. Ou pa i konen la i asoir?

• Vant ler I lafen napa ler kozé.

• Mouan osi mon dakor, mé fodré fer atansion.

• Alors ki ou ti a dir si nou ti koup likou Mizoune?

• Ou pa bet ou Zézé. Sa nou bouyon lannen.

• Dan sa ka fodré nou a fer en lot débouy.

• Mé Zézé, mon pa toutafé konpran ou. Nou pa i annan en pé poison sale dan kes? Nou a manz sameme. Ki ou dir?

• Tou lézour nenk poison sale meme! Mon kroir fodré nou a al Lapes.

• Dan sa ka ou pa pou al répone lapel démen.

• Dan sa ka ou pa pou al répone lapel démen. Bé oui, mon pa fer sa tou lézour.

• Bé bon, nou ava al lapes démen.

Bardzour ine arive, kok ine fini santé. Tantine ek Tonton zot roul zot payas zot met dan kouen. Zot tome déor. Zot prépar zot gadiak avan ki zot kit lakour. Zot pane tro mal désidé parské sa létan lamer i désane bien bomaten. Alors i a fasil pou gagne bernik lo ros pou labouet ek lasomir.

Vir ki vir, zot ine fini pare. Zot ine gagne tou sa ki zot bézouen. Joseph ek Marie prézan zot al fouet laligne. Dan zot panien madiroté, zot ine met sa lasomir bernik krazé kot zot kine brouye ek disab. Sa loder ki sa i donnen i apel bane poison kot zot été.

Apré ene pti moman, zot ariv trou koumba. Lameme la lo sa koray ki poison i mord bien. Nenk tou lé dé zot poz zot panien ater pou zot komansé. Golet I souflé. Golet I souflé dan divan. Saler zot ine fini seme en pé lasomir avan komansé. Prémié, Tane Marie i rié é dir ek Joseph:

• Zézé o, mon kroir i tousé.

Saler Zézé i pa tro kontan ki son bonefanme i kros en poison avan li. Mé i pa dir narien. Nenk i resté la ndou. Vréman ine tousé meme. Tane Marie i pike, i ale. Son golet i ploye. Tantine i kanbré. Bonome i kit son lalingne i vine done en koudmen son bonefame. Ler sa i monté, zot oir, en gro kakatoi kine siké. Apré sa bonome i kros dé gro bouéter disab, ene derier lot. Telman poison i mordé, ene ti moman panien madiroté ine débordé. Pou Joseph ek son bonfanme, napa keksoz ki ti pli gou ler zot get sa bane poison pé bouzé dan panien. Zot oir boueter, bef, kakatoi, panp, zob, pti karang ek zékler.

La prézan, zot léker ine kler. Zot komans tat taté pou zot al kot lakour.

Dérétour sé zot, zot done ene ti bouyon zot vwazen é I resté zot ankor asé poison. Dabor zot grat tou. Zot sal sa ki pou sale, griy sa ki pou griyé, touf sa ki pou toufé, fri sa ki pou fri, fer kari sa ki pou fer kari, bouyone sa ki pou bouyonen é anfen boukane sa ki pou boukane pour létan dir. Ler zot ine fini fer tou sa louvraz, fernoir ine preski fini fer. Zansla zot manzé zot pran zot en bon ben, zot tal zot payas é, koman zot poz zot latet lo zorié, somey I gagne zot.

Lanmen bomaten, zot lévé, avan ki Joseph I kit lakour, Ti Marie I dir li:

• Zézé o, mon pou al lapes taler, mouan.

• A non Ti Marie ou pa pou fer mouan sa! Ler nou fek alé!

• Mon bézouen al ankor, Zézé.

• Ti Marie, olié ou resté kot lakour, okip okipé parey ou labitid .

Saler Ti Marie I fer lasourdorey. Dek ki son mari ine vir lédo, i pran son pti panien madiroté ek son golet é i kit lakour i al lapes. Ou a dir trou koumba pé apel li ……

An arivan borlamer, i fer parey ier. I rod son labouet. I kraz son dékoi lasomir avan ki i al lo koray.

Telman i présé, i bliy son golet ater kot i ti apé kraz lasomir.

Ine déza mars détroi pa ler i pran kont poudir son golet pa ek li.

Bé la, I rétourne an tayan pou li al sers son golet.

Maler pa averti. Ti Marie, ine ariv trou koumba. Laba lamer ine ankoler bomaten. Laroul i brizé lo ros. Zanbren i anvolé partou. Pov Ti Marie i pa pran okene ka. I pa ni antren. Son sel nidé sé ranpli son panien madiroté. Mé i vine li en lanvi pran en pris taba. I ser son serviette lo son latet, i get en kou lamer devan li.

Prézan i pou komans zoué son golet. Prémié koud lanmson, i souk en madame béri. I riy li tousel é i dir:

• Ki ou kroir ou Joseph, mon a ranpli mon panien.

Saler pli soley i monté, pli laroul i anforsi an mézir ki i grosi. Ti Marie i kros ankor en bouéter ek en virsini. Mé malerezman, létan ki i apé tir sa dernien poison dan laligne, ene sa maman laroul i balié li lo ros kot i ti été é i zet li dan kannal. Koman i pa ti kone nazé, I désane en kou dan fon, i rémonté. Ine boir détroi bon gorzé délo. I sey débat pou sov lavi, napa narien.

Kouran i bat li ek ros, épi trene li é amene li déor.

Joseph i sorti travay i ariv sé li. I trouv lakour tris… ni en mous, ni en kankréla pa vole. Napa okene lafimen ki sorti lakuizine. Laport lakaz ine pousé parey labitid. Joseph i anvoy en koud lavoi:

• Ti Marie, oli ou ?

I pa gagne okene répons. Zis léko son prop lavoi ki répone li. Mé toudsuit, I mazine sa konversasion bomaten ki i ti fer zot dé Ti Marie. Nenk i viré, I pran direksion Trou koumba. Ler i ariv laba, i mont lo sa ros, Prézan i komans lamanté:

• Ti Marie o, rode, rode, rod ti Marie.

• Zanmen mon a trouvé

• Rode ki zamen mon a trouvé.

• Ti marie o, Ti Marie o, rode, rod Ti Marie.

Ki zanmen mon a trouve.

Fourmi lalanp, fourmi lalanp

Lalanp madaé, lalanp madaé.

Kang, kang, ding, ding

Rode, rode, ki zanmen mon a trouvé

Pov bonome i rod son bonefame partou kote, mé i pa oir li. Ler ine fatigé rode, i retournen i al fer konen tou dimoune ki viv lo sa zil ki Ti Marie pov diab ine al lapes lo ros mé i pa ankor rétournen. Alors i démane son bourzoi pou done li détroi zome pou al rod son bonefame. Bourzoi i ralié asé zome pou al rod Ti Marie. Létan zot pé rod Ti Marie Joseph li i sant ankor son sanson. Mé son zéfor ti an ven. Ti Marie in alé i pa pou zanmen rétournen.