KILIBEN EK PTI ZWAZO

Informant: Mrs. Elina Brioche François, Anse Boudin, Praslin. 71 yrs. Recorded 25/07/2021. Researchers: Penda T. Choppy & Cindy Moka. Transcribed by Cindy Moka, Sept. 2021.

Ti annan en msye ki ti apel Kiliben. Be li sa Kiliben I ti en saser. Son louvraz toultan I ti pas dan bwa al rod zwazo, al isi al laba, al rod, be sa zour, kantmenm in la, in vir vire, vir vire, napa narnyen, in la in tranp tranpe, tranp tranpe, napa lavi. Prezan ler I ti pres pour li anmas son soz.

(Lapli ti pe tonmbe enformen I adres intervenan. “ou napa narnyen deor ker”)

In la in vir vire, in vir vire napa narnyen, I pa vwar lavi. Prezan I pa enn pti zwazo obor li. Prezan, I pran son fizi. I menas sa zwazo.

Prezan I dir, “Ar be ou en pti ti zafer”.

Prezan I dir “be touy mwan”.

I tir en kout fizi, I tap sa pti zwazo. Zwazo i sape i tonm ater. Prezan li, i pa pe okip sa li. In

fer dan soz laba in ale. Prezan ler pour li retournen I war pti zwazo ater.

Aprezan I dir “ou pa anmas mwan?”

Be prezan li kantmenm zwazo pe koz ek li. I pa pe pran sa o serye. I pran sa pti zwazo I met dan son karnasyer lo son zepol. I desann, an arivan kot lakaz, “ Zot ozordi, mon pa’n ganny narnyen mon ganny en nespes pti zafer.”

In la in fer son morso dite in bwar.

Be zwazo I dir “ou kit mwan la ou pa plim mwan?”

Prezan in met delo.

I dir, “Be met delo, lo dife”

I pran en pti kastrol delo, I met lo dife.

I dir “ be delo in bwi, plim mwan”

Kiliben I vini I atrap sa pti sren. Plimen byen, fini lave.

I dir, “ Be. koup, koup mwan”

Zwazo pe donn li konmann, I pa konpran menm. Reelman konman zwazo I ouver I koupe. Prezan sa pti zwazo I dir “ Be met mwan dan kastrol. Met mwan bwi.”

Konman zwazo I pran I met dan kastrol. I met en pti gin disel avek en pti morso zepis. Ler pe I bwi, bwi, bwi. Ler pre pour sek.

Zwazo I dir “ be rousi mwan”

Fini rousi zwazo tou.

I dir “ be met mwan dan pla laba pou ou al manze”.

I pran zwazo I pran I met dan pla. I konmans manze. Zwazo I dir “ler ou manz mwan pa zet mon lezo en. Manz mwan avek mon lezo tou.”

Reelman I manze I pran tou sa bann pti lezo I kraze. Fini kraze in la. Asiz asize dan son foyet.

Zwazo I dir li “Be ou pa le dormi?”

Mazinen ou I dan son vant; zwazo pe koze en. I ale I al tonm ater I al dormi. I ti abitye vir vire lo son soz. Prezan li I dormi enpe par kote.

I dir “ pa dormi koumsa. dormi koumsa!”.

I sanz kote. I dormi vant anba. I ti apel Kiliben li sa boug.

I dir “Kiliben, pa dormi koumsa, dormi koumsa.”

I sanz kote I dormi konmsi en nespes konmsi pour pwenti.

I dir “koumsan menm. Dormi Koumsan menm.”

Ler zwazo I dir, dormi koumsan menm, I bes anba menm I pwenti. Fer Ii bes anba zis I santi zwazo kot i pete I ale. Li gro lanmori bag li lanmenm red ater. Tou zafer fini desire, trip tousala. Tousala in fini I la ater in mor zwazo I ale. La apre la son bann fanmiy I vinn vwar li la ater, dan soz in fini mor. Zwazo in fini ek li.

Prezan letan mon pase I dir mwan “ Tasyon ou, ou osi ou kapab ganny en kout bal en.”