KAZIMIR

Informant: Mrs. Elina Brioche François, Anse Boudin, Praslin. 71 yrs. Recorded 25/07/2021. Researchers: Penda T. Choppy & Cindy Moka. Transcribed by Cindy Moka, Sept. 2021.

Be ti annan enn en garson. En manman, li sa manman I ti annan li en zenn fiy.

I ti annan li en zenn fiy. Be sa manman ti kontan siperstisyon. Tou son keksoz ti fini dan siperstisyon. Ti annan en msye zot ti apel li Kazimir. Li sa Kazimir la I ti vreman bandi, I ti sorsye, ekwaryab, fer en bann pake keksoz sa. Be li sa madanm I ti annan en msye. Sa msye ti annan li en lot madanm. Li, son msye ek son fiy.

Prezan li tou letan I pour al kot kasimir pou al rod dibwa, konmsi pour fer msye par al avek okenn madanm pour reste la kot lakaz. In pran dibwa, in pran dibwa ek Kazimir in dwa Kazimir. Kazimir I anvoy apel li. I dir li pou dir “Be ou dwa fodre ou peye.

“Wi sa semenn mon a pey ou be monn anbarase”.

Kazimir I anvoy konmisyon ek dimoun I dir “Dir li, mon dir li vinn pey mwan; akoz si I pa vin pey mwan. I anan en keksoz ki pe al arive la”

Veye pa vini, veye pa vini. Ki I pou fer li. I pou ganny kontak ek Kazimir I dir ek Kazimir I a donn li son fiy. Prezan pti fiy la bomaten in leve. I dir ek son piti, prepar ou sanze, met tou zafer, met ou pare.

Prezan Kazimir I demann li, I dir “Be mon pou vin pran li kot ou?”

I dir “Non”. I dir “Mon pour desann ek li mwan. Ler mwan mon pou desann mon pou dir avek li pou dir mon anvi pise. Li I a maske kot lapay…”

Akoz zans lontan pa ti parey dimoun konmela. Kot zot ti arive I fer son pti bezwen. Apre osi la konmela, parey si oun anvi soz la. Twalet I soz. Reelman in fini prepar li bomaten. Prezan fiy ti vwar konmsi en keksoz en pe soz, I vwar mon manman I dir li, pou leve bomaten pour ale. Reelman bonn li morso dite pour li… I don li morso dite, zot sanze zot toulede zot desann. Zis mazinen ou konmsi, en manman sa. Zot desann, zot desann, in fini donn landwar, zot in desann zot in ariv ko ten gro ros.

Li dir ek son fiy “ Debout lanmenm, esper mwan. Mon al en pti kou lanmenm mon al pise.”

Vreman sa fiy I debout lanmenm, li I ale I al fer son bezwen, ler I sorti pise laba deryer en ros, rod fiy napa ditou. Fiy in fini ale. Kazimir in fini pran piti. Prezan li ki kont ki I pou rann. I ale ki kont ki pou ran. Ler I ariv kot li laba I pe plere. Prezan son bann fanmiy, I vini. Ler son bann fanmiy I vini I dir son piti in perdi.

I dir “Be piti kote ti ete?”

I dir zot in desann ansanm pour li al soz, pou li al anvil. La I anvi pise la I rod piti, piti pan trouve. La prezan ler I rod piti napa.

Prezan bannla I dir li “Si ou piti in perdi, fodre ou al kordgard”. La prezan lanmenm ler zot in desann zot in al kortgard, be gard kantmenm in fini in rode, I pan vwar ptiti zanmen.

Pa fini, I ankor pe dwa Kazimir. Kazimir I dir li “Be la ou donn mwan ou piti. Donn mwan mon larzan ki reste.” Prezan li I napa larzan. Be ki pou arive.

Bomaten, I les li apepre en semenn. Dezyenm semenn, I ale, I al travay, I pran lapel. Kasimir I dir li “Ou donn mwan ou piti, ou ankor dwa mwan. Savoyaz mon pou pran ou mari.”

Zot inn fini pran lapel sa zour bomaten. Tou bann madanm ek zot pyos. Ler madanm pe bese pe travay, I vwar son mari anler lo son ledo. Prezan bannla I kri lasasen. I dir pa pe kapab travay. Prezan bann la I dir “Be ki I arive?”

I dir “Be msye nou pa pe kapab travay la akoz sa soz la, gete ki I arive”.

Sa msye I touni li, anler lo ledo son fanm. La son bourzwa; sa msye ti bezwen kri sa fanm en kote e demann li ki son problenm.

I dir “Ar msye ed mwan, mon dwa”.

“Be ou dwa ki oun fer?”

“Be soz, mon ti al rod enn de pti keksoz kot msye Kazimir, I ti dir mwan pour dir mwan dwa li pou soz.”

Prezan sa msye, I pa’n oule sa bann keksoz arive. I dir “ Be konbyen ou dwa li?”

La I dir konbyen I dwa li. Sa fanm, sa msye I pran larzan I donn li, I fer li siny en papye, I dir li I pou rann sa larzan tou le mwan koz I pa anvi sa sitiasyon I ariv koumsa. La apre I pran sa larzan I donn Kazimir. La zot pa vwar sa bann keksoz ankor in fini.