KARI BLE EK LALANG MELANNI

Informant: Mrs. Elina Brioche François, Anse Boudin, Praslin. 71 yrs. Recorded 25/07/2021. Researchers : Penda T. Choppy & Cindy Moka. Transcribed by Cindy Moka, Sept. 2021.

Be ti annan en Madanm ek son Msye zot ti kontan marsaye. Konmsi zot ti travay zot. Apre travay, zot ti kontan bwar zot pti bwar. Ler zot mont kot zot, toultan zot sou.

Be ler nariv kot lakaz sakenn pour debourye pour prepar manze. Madanm I dir ek Msye, i dir “Be mon anvi en kari ozordi”.

Msye I dir “Ar pa ti a move, mon seri. Nou a fer en kari”.

Be zot in koup pwason, koup tou son bann zafer in prepare. Msye in met diri, Madanm pour al fer bouyon. An menm enstan zot pe tap zot pti bwar. Reelman kari in fini koup tou pwason. Sa ler zot pa konnen zot in koup en bout lalang melanie. Annan en gro lalang Melanie dan zot pwason. In koupe tousala in aranz kari tou. Kari in fini prepare. Msye I dir “Ar la nou pou al dinnen, mon ker”.

Reelman in mont lo latab. Zot in tir sakenn son lasyet manze, zot in manze. Prezan, deryen er, dan sa bout ki, ki msye in atrape in santi, konmsi sa bout I pli red ki sa pwason. Prezan I demann ek son madanm i dir “Be, komsi ou kwar I annan keksoz ekstraordiner la”.

“Ki kalite?”.

“Be konmsi ou kwar monn manz kek keksoz ou dire I red”.

I dir “Be non, seri, Pwason menm sa”.

Vreman fin manze tou dimoun, in lav lanmen, nal dan zot plas, nal dormi.

Be bomaten, ki zot pour konnen, lekel keksoz ki zot in manze. Prezan msye I dir,

“Nou pou al travay bomaten. Sa morso kari nou a vid dan bol pournou ganny, pour anmenn ek nou”. La ler msye pe al lakwizin, Madanm pe al lakwizin, dekouver marmit zot vwar en gran bout Lalang Melanie.

I dir “Be seri, yer swar nou manz melani” I dir “Be sanmenm, mon ti vwar, letan mon ti pe manze, mon tis anti sa lavyanm konmsi I red pa parey, konmsi I annan en diferan avek pwason.”

Prezan madanm I dir “Be seri, be en lot keksoz ankor, be yer swar eki nou’n fer kari nou?”.

Be zot pan fer kari ek masala, zot in fer kari avek ble.

P. Choppy: Mon deza tande sa zistwar. Solman ti napa sa bout Lalang melanie. Ti annan sa bout, olye pran masala zot in pran ble. Ti kontan akonte lo radyo sa.

Mm. Elina: Prezan la I al dekouver, I dir “Be ki in arive la yer swar?“ I dir “Nou fer kari ble’”

P. Choppy: In fer kari ble

Mm. Elina: Be zot in fer kari ble. I dir “Be” I dir “Be pa en problenm ankor sa”

I dir” Be mon fanm o. Depi mon pe dir ou, la konmansman ozordi la. Nou pou bezwen aranz nou enpe. Met sa bwar de kote. Akoz la yer swar, noun manz Lalang melanie, noun fer kari ek ble. Be la kot I annan en problenm avek nou la. Nou bezwen al rezord nou problenm, pli vit posib”.

Prezan son madanm I dir “Wi seri, mon kwar oun donn mwan en bon lide, mon kwar la nou pou bezwen met bwar ater, e konsantre lo nou lakaz pour nou konnen kwa ki noun manze aswar.”

Prezan mwan, letan zot, zot pe dir sa. Mon ti lanmenm la deor mwan. Be la mon dir “Be ki fot zot nal fer. Zot in fer kari ble. Zot fer kari ble apre zot manz Lalang melani?”

Be melani, daler mwan li I ti dan kastrol, be zot, zot in fini sou. Zot in met dan lasyet, ler zot in vini dan sa sou. Zot in koup pwason pti ti, pti ti, Lalang melani osi in al dan kastrol.

Prezan mon dir “Mon osi, mon ti a kontan gout sa kari ble”