Ivon Ek Finet

(Mm. Marietta Hoarau)

Kont ek Lezann Vol 1., (1990) Lenstiti Kreol, Lans-O-Pen, pp. 5-14

En zour ti annan en msye ek en madanm ki ti annan wit zanfan. Zot ti krwar ki sa ti byen ase me ti arive ki en zour sa madanm ti ansent ankor. I ti byen ankoler akoz i ti mazinen ki son lakaz ti pti e ti napa ankor landrwa pour met en lot zanfan, selman ki ou a fer i ti bezwen siporte. Ler piti ti ne son papa ti donn li non ‘Ivon’. Tou le zour sa madanm ti gronnyen pour li okip Ivon. I ti dir,

“La la mon bezwen okip ankor en piti. Landrwa i pti, napa plas pour met li. Deza nou mizer, en bouse manze ankor an plis pour donn li.”

Tou le zour pov Ivon ti pe tann son manman dir menm parol e i ti’n fatige, me ki ou a fer i ti bezwen aksepte.

Letan ti pase e Ivon ti’n ganny 18 an. I pa ti kontan tann sa bann zafer e son leker ti fermal, me koman i ti en dimoun personnel i pa ti oule rakont son keksoz personn e i ti gard tou son problenm. Me menm sa i ti fer travay son lespri ki pou fer pour li kapab sorti la kot son manman pour li aret tann sa bann kalite remark. Son manman pa ti kontan li, ti kler pour war. Konmsi i ti en pwa lour lo li.

En zour swar letan Ivon ti lo son lili, i ti fer rezon e dir dan li menm, nesans en zour, lanmor en zour. Mwan Ivon mon a sey ale, si mon mor tanpi. Soufer la, soufer en lot landrwa, tou sa la soufrans menm.” E avek sa panse i ti tonm dan en profon sonmey. Son bomaten ler Ivon ti leve i ti al pronmnen. La i ti war en bato e ater ti annan de trwa maren. Deswit Ivon ti koz avek zot e fer zanmi. Dan konversasyon i ti dir zot ki li osi i ti a kontan navige lo lanmer parey avek zot. I ti war zot tou zwaye me li i ti annan en gran latristes. I ti dir avek enn, “Demann ou sef si i pa ti a oule pran mwan pour travay abor son bato.”

Alors sa maren ti al demann kapitenn . Li osi i ti’n byen dakor avek Ivon e i ti fer li lapenn. Kapitenn ti deswit al fer kriy Ivon. Ler i ti war li i ti’n fini kontan son mannyer akoz i ti paret li en garson byen onnet, alors kapitenn ti deside anploy li.

Ivon pa ti dir nanryen son paran an ka zot ti ava anpes li ale, menm si zot ti war li lour lo zot. I ti anbark lo bato san konnen kote i ti ape ale. Dan milye lanmer, tre tre lwen avek son pei, sa bato ki i ti lo la ti zwenn move tan e malerezman ti savire. Ivon ti naze, anmas en bout plans e mont lo la. I ti sey rod son bann lezot dalon me i pa ti war zot. Alors, menm si i ti sagren i ti sey debrouy li e kot i pa ti kapab naze i ti les flote, ziske ler i ti reisi ariv lo en zil. Ivon ti get partou me ti paret napa personn. Ki pou fer? I ti kontinyen marse pour en ban pe letan e toutakou i ti war en gran sato devan li. I ti swiv santye ziska ki i ti ariv laba.

An arivan, Ivon ti kriy, ‘Bonzour’ byen for. En pti moman apre, i ti war en gran zean pe debout devan li. Pov Ivon ti tranble avek lafreyer piske zanmen i ti’n deza war en zonm parey. Zean ti koze e dir,

“Bonzour” son lavwa menm ti fer later kot Ivon ti pe debout tranble. Ti for e pwisan.

“Ki ou vin fer isi? Depi ki mon reste la, zanmen personn in vin lo sa zil. Ki mannyer ou ou’n fer pour ariv isi?”

La Ivon ti rakont tou sa ki ti’n pase. Apre i ti azoute, “Msye mon vin rod en plas travay, sankwa mon a mor lafen isi, mon pa konn personn.”

Sa zean ki Ivon ti pe koz avek ti voras. I ti manz pour trwa zour e dormi pour trwa zour. Osi, ler i pa ti pe manze ouswa dormi, i ti al pronmnen dan bwa. La i ti dir avek Ivon, “Al dormi dan sa pti lakaz ki ou war laba. Pa bezwen per, demen mon a donn ou ou louvraz pour fer.”

Ivon ti obei.

Lannmen bomaten koman Ivon ti leve i ti al asiz lo en pti ban devan laport son pti payot. Zean ti dir li,

“Zennonm vini e mon a dir ou ki ou pou fer.” I ti kontinyen, “Mon pe sorti pour en pti moman. Pran sa balye fatak ki ou war la, balye mon lekiri e fer li byen prop, tir tou fimyen ladan. Ou tande?”

“Wi mon met,” Ivon ti reponn. Dan son leker i ti dir, “Zot mon ti krwar louvraz ti pou pli dir ki sa.” I ti get zean kot i ti ale ziska i ti perdi. Toutakou i ti ganny en lide, “Avan al netway lekiri mon pou al get en kou ki i annan dan lakaz zean. Si mon mor les li.”

Relman i ti ale. I ti antre. I ti war en gran koridor avek en kantite lasanm laport fermen. I ti sey premye, pa ti take, bon zafer. Ivon ti ouver. Zot, i ti ganny en sezisman. Lasanm ti ranpli avek lor, pe klate. Zanmen Ivon ti’n deza war sa kantite lor. Kot zean ti’n ganny tousala? I ti fermen e ouver dezyenm. Sa enn ti fer li otan sirprann akoz ti annan zis dyanman. Zot pa ti zoli! Ivon ti kontinyen get dan tou, katriyenm, senkyenm e dan tou ti annan larises kelkonk, larzan, bizou, ensi-d-swit. Anfen i ti ariv kot setyenm e dernyen lasanm. Ki i ti pou war la? I ti ouver. Zot! I ti kapab tonm sek! Lo en sez dan en lasanm byen meble e dekore ti annan en zoli fly, pli zoli ki i ti’n deza war. Ler i ti war Ivon, sa fiy pa ti ni paret sezi. Okontrer i ti dir,

“Ivon kot ou ale isi? Si papa i war ou i a touy ou.”

“Be ou kot ou konn mon non?” Ivon ti demande byen etonnen.

Fiy ti reponn, “Depi ler ou pe vini man konn ou. Papa i en gran mazisyen, i’n montre mwan son lespri e aprezan mon pe vin pli malen ki li.

Ivon ti demann li, “Be ou ki mannyer ou apele?”

“Mwan man apel Finet,” fiy ti dir e la zot de Ivon zot ti komans koze. Salerla, zot ti’n fini kontan kanmarad. Finet ti osi dir Ivon ki sa zean pa ti vreman son papa me ti’n vol li letan pti. I pa ti ni konn son vre paran. Apre ki zot ti’n koz en ban pe letan Finet ti dir avek Ivon,

“Ivon, ale aprezan, papa pre pour vini. Mon konnen ki louvraz in donn ou, i’n dir ou pran balye pour balye lekiri. Pa krwar i sitan fasil ki sa!” Sa fiy ti kontinyen,

“Si ou balye avek bout anba balye, parey ler nou balye lakaz, tou sa fimyen ki ou’n pous par laport pour reantre par lafnet. Fodre ki ou devir ou balye e balye avek latet. Lekiri pou prop vitman. Pa bliye, e osi pa dir Papa si ou’n war mwan.”

Ivon ti ale, avek portre Finet, sa zoli fiy dan son lespri, telman vivan ki i ti bliy zafer balye. Alors, i ti komans balye parey labitid, me byensir tou fimyen ti reantre par lafnet. I ti reste bet. Toutakou i ti mazin parol Finet. Vit i ti atrap lanmans balye e dan en pti moman lekiri ti’n prop. Ivon ti al asiz lo son pti ban byen satisfe e ti komans soufle.

Dan en pti moman apre son met lakaz ti arive. I ti war Ivon pe asize lo son ban. Zean ti kriy, “Vagabon ou’n fini mon louvraz?”

Ivon ti reporm, “Wi mon met.” Zean pa ti oule krwar, alors i ti al gete. Ler i ti war lekiri byen prop; i ti tre ankoler. I ti kriye, dan en lavwa ki ti fer partou tranble, “Ou pa’n fer sa tousel, ou’n war Ma Finet.” I ti dir sa trwa fwa.

Finalman Ivon ti reponn, “Mon met, kisisa Ma Finet? En zannimo, en zensek?”

Me zean ti reponn, “To ou tar ou a konnen. Ale. Ou lot latas ou a ganny demen.”

Ivon ti ale. I ti vir vire deor e mars marse dan zalantour ziska ti’n ariv ler pour al dormi. La i ti retourn dan son pti lakaz. Lannmen, Ivon ti raport kot zean. Zean ti dir li,

“Al anler lo bout montanny, ou a war en gro ros nwanr. Tape. En gro demon pou sorti. I pou demann ou ki ou bezwen. Dir li ou vin sers larzan ou met. Sa ki i donn ou a anmenn pour mwan.”

Salerla, ekspre zean ti pe anvoy Ivon laba, pour fer demon met li dan trou e koumsa, li zean ti a debaras li. Koman i ti’n fini donn li son louvraz, Zean ti ale. Ivon ankor enn fwa ti vey li ziska i ti nepli war li. Deswit i ti mont anler kot Finet.

Finet ti pe esper li. I ti dir. “Ivon, Papa in dir ou al kot demon, pour demon pran ou. Be mwan mon pou ed ou akoz mon kontan ou. Mon a eksplik ou tou sa ki ou annan pour fer. Ekout byen.”

Ivon ti ekoute.

Finet ti dir, “Ale, monte. I annan zis en semen. Get drwat devan ou. Pa get ni agos, ni adrwat. Akoz si ou gete ou pa pou reisi sa ki ou pe al fer. Ler ou ariv lo latet montanny ou a war sa gro ros nwanr, parey papa in dir ou. Tap trwa fwa e ros i ava ouver. En gro demon pou sorti, me pa bezwen per li. Mon pou obor ou pour mwan ed ou, me ou ou pa pou war mwan. Demon pou demann ou ki ou bezwen. Reponn, ‘Reveni mon met.’ I pou demann ou konbyen. Dir li, ‘Pa plis ki mon kapab anmennen.’ Sa ki i donn ou anmennen. Pa bliye sa ki mon’n dir ou.”

La Ivon ti anbras Finet, ti remersye li e ale, byen sagren pour kit li. Ivon ti mont dan pti semen e sa voyaz i pa ti bliy parol Finet. Vreman tou ti pas parey Finet ti’n dir li e menm si i ti tranble en pe ler i ti war sa gro demon sorti, i ti konplet son latas. Demon ti donn li en gro sak e Ivon ti desann avek byen kontan. I ti al asiz lo son ban avek sak ater obor li an souflan. En pe letan apre, zean ti traverse. Ler i ti war Ivon i ti dir, “Pti vagabon, ou’n fini mon louvraz?”

“Wi mon met,” Ivon ti reponn, “Lala.”

Zot ler zean ti war sak i ti fini ankoler. I ti tap son lipye ater e kriye, pli for ki premye fwa, “Ou pa’n fer sa tousel. Ou’n war Ma Finet!”

Ivon ti dir, “Mon met me dir mwan kisisa Ma Finet. Depi yer ou pe dir mon’n war li. Kisisa? En zannimo? En zensek?”

Zean ti kriye, “To ou tar ou a konnen. Ale. Demen ou a fer lot latas.”

Lannmen granmaten koman Ivon ti tir figir, zean ti pe esper li. I ti dir,

“Ivon, al dan sa vye lekiri e ou a war en femel seval. Pran sa labrid ki la, met lo li e anmenn li dan sa lot lekiri nef.”

Ivon ti reponn, “Wi mon met.”

Zean ti ale e parey tou le bomaten it i al dan bwa. Koman i ti’n disparet Ivon ti tay anler kot Finet.

Finet ti dir, “Ivon, papa in anvoy ou ganny devore par sa seval mesan. Dan son lizye i sorti zis zekler. Pa bezwen pran sa labrid ki papa in donn ou. Si ou get ater dan kwen lavarang, ou a war en vye labrid. I en labrid mazik. Pran e montre seval. Koman ou fer sa i a tonm azenou devan ou. Apre ou a fer parey papa in dir ou.”

Ler Finet ti’n fini dir sa, zot de Ivon ti koz koz en pe ziska ki Finet ti dir.

“Ivon fodre ale aprezan, Papa pros pour vini.”

Alors Ivon ti dir orevwar e i ti al fer son louvraz. Zot ler sa seval ti war Ivon pe fini i ti oule kas lekiri, me deswit Ivon ti montre li labrid mazik. Osito seval ti azenou e les Ivon fer ou sa ki ti fodre fer. Ivon ti anmenn li dan lekiri san okenn problenm. Ler zean ti retournen e war seval byen trankil dan lekiri nef i ti a kapab mor avek lakoler. I ti kriye, sitan for ki later ti sakouye anba Ivon! I ti dir,

“Ou pa’n fer sa tousel. Ou’n war Ma Finet!”

Me ankor en fwa Ivon ti fer sanblan ki i pa ti korm okenn Ma Finet. Sa voyaz zean pa ti dir li nanryen e son lannmen bomaten pa ti donn li okenn louvraz. Zis i ti pran son semen e al dan bwa. Ivon li, ti pe esper sanmenm e i ti mont direk kot Finet ki ti dir li,

“Ivon, papa pa’n donn ou nanryen pour fer ozordi. Sa pa en bon zafer. I annan keksoz pour arive, me pa trakase, mon pou la.”

Alors parey labitid le de zenn ti koz koze ziskan ti’n ariv ler pour Ivon ale. Ler zean ti retournen i ti antre direk dan son sato e al kot Finet. I ti dir,

“Ma Finet mon pe al dormi pour trwa zour. Touy Ivon e fer en bon lasoup pour mwan. Ler mon a leve fodre mon gannyen.”

Avek sa zean ti al dan son lasanm. Pli tar, ler Finet ti al gete i ti war li pe ronfle. Alors i ti sorti pour al rod Ivon e i ti rakont li tou sa ki zean ti’n dir. I ti dir, “Ivon donn en bout ou ledwa. Mon pou pike e fer trwa gout disan koule. Apre nou a sove. Selman nou pou fer lasoup avan. Ladan nou pou met soset, soulye, leba, lenz ensi-d-swit. Ler papa pou leve i pou demande si lasoup in pare. La, premye gout disan pou reponn, “Pa ankor Papa.” I pou demann ankor de fwa me dezyenm ek trwazyenm gout disan pou reponn menm zafer. Son katriyenm zour Papa pou leve e ler i pa pou war nou i pou rod nou, me les tou dan mon lanmen.”

Alors Ivon ek Finet ti fer lasoup e apre zot ti sove. Isi deryer Zean ti kontinyen dormi, me en fwa i ti sote pour demande, “Ma Finet, lasoup in pare?” Premye zour, sa premye gout disan ti reponn,

“Pa ankor papa.”

Dezyenm zour, Zean ti kriye. “Ma Finet, lasoup in pare?”

“Pa ankor papa.” Dezyenm gout disan ti dir e trwazyenm zour osi ti menm zafer.

Katriyenm zour zean ti lev net e i ti kriye, kriye me ti napa larepons. I ti leve e al get lasoup. Ler i ti pas son gran kwiyer ladan i ti war zis semiz, soset e lezot keksoz ki Ivon ek Finet ti’n met ladan. Zean ti’n fini ankoler. I ti sey rod sa de zennzan me i pa ti war zot. I ti’n fini konnen ki ti’n arive. Son fiy ti bokou pli malen ki li.

Deswit i ti met son gran bogi mazik e komans marse. Sa bogi ti fer li mars de fwa pli vit e fer gran gran lepa ki ti fer ki byento i pa ti lwen deryer Ivon ek Finet ki ti dan en bwa. Finet kot i ti ete toutakou ti arete e met son zorey ater pour ekoute. I ti dir,

“Ivon Papa pe vini. I pa lwen. La nou pou bezwen degize, ou ou pou vin e pye grenad avek en zoli grenad mir lo la, mwan mon a vin en lakaz mous zonn. Ler papa pou kas grenad, mon pou pik li. ”

Ivon ti en pe per me vi ki i ti konn pouvwar Finet i ti sey reste brav. Alors dan en pti moman dan zot plas ti annan en pye grenad avek en grenad byen mir ki pe esper en dimoun pour kas li. Parmi bann brans ti annan en lakaz mous zonn, byen kasyet. Zean ti arive. I ti war pye grenad ek grenad mir lo la. I ti anvoy lanmen. Zot pa bezwen dir ou, en pti moman pa konnen ki pou fer avek mous zonn. Zot ti pik li partou, dan son figir, son lizye, lebra. Zean ti bezwen retourn se li pour sonny li. Aprezan ki son lespri malen ti dir li ki sa ti bezwen Ivon ek Finet. I ti dir dan li menn,

“Sa Ma Finet, tro malen pour mwan. Mon pou al rod zot ankor. Sa voyaz mon pou ganny zot. ”

Vreman bogi mazik ti anmenn li e dan en pti moman i ti ariv dan sa landrwa, me ti napa okenn pye grenad. “Alors ti zot menm!” Zean ti mazinen e i ti mars pli vit ankor. Salerla, Ivon ek Finet pa ti tro lwen.

Finet ti dir, “Ivon, Papa in ariv ankor, i pre avek nou. Ou vin en per, mwan mon a vin en legliz.” Ti napa letan pour tarde. Nek deswit, Ivon ti degiz an per, pe marse deor en pti legliz avek son labib. Zean ti aprose, apenn zot ti’n sanze. I ti vin kot Ivon e demande, “Dir mwan Mon Per, ou pa’n war en zennonm ek en zenn fiy pe pase?”

Per Ivon ti reponn, “Dominoum Vobiskoum.”

Zean ti dir, “Mon pa’n demann ou sa mwan, mon’n demann ou si ou pa’n war en zennonm ek en zenn fiy.”

Me Per ti reponn ankor menm keksoz. Byen ankoler zean ti kit li e retournen. Ler i ti’n ariv en bon distans son lespri ti dir li ki sa ti bezwen Ivon ek Finet vi ki ti napa lezot dimoun dan sa landrwa. Zean ti deside retournen, “Sa voyaz man bezwen ganny zot,” I ti dir dan li menm.

Me Finet ti’n konn son panse. I ti dir, “Ivon sa voyaz Papa pe vini menm pour nou. Ou ou pou vin en gro reken e mwan en kannar dan delo. Ler papa pou war kannar i pou oule anvoy lanmen pour atrape akoz i pou konnen nou. Ou pou sot lo li e manz li, koumsa nou a kapab viv an pe.”

Vreman tou keksoz ti pas parey Finet ti’n dir. Zean ler ti war kannar ti dir, “Ar, sa voyaz pa krwar mon pou les zot!” e i ti anvoy lanmen pour atrap kannar, me deswit reken ti atrap li e devor li. Osito, Ivon ti resanze ensi ki Finet. Zot ti may kanmarad e plere avek lazwa. Alafendefen zot ti’n liber zot kont sa move zean. La, tou le de ti ale e ler zot ti ariv kot lanmer, Finet ti degiz li an en bato e ti anmenn Ivon dan son pei. La, zot ti al kot paran Ivon e zot ti plere ler zot ti war zot garson akoz zot ti krwar i ti’n mor.

Ler Ivon ti’n rakont zot tou zistwar zot ti pler ankor e demann li pardon, me Ivon ti’n fini pardonn zot. La zot ti fer tou laranzman maryaz e avek pouvwar mazik Finet zot ti ganny tou sa ki zot ti anvi pour leres zot lavi.