INOSAN, KOUPAB, MARDI

PAR: Elinor Aglae

Ti annan ene ome. Bé li i ti en vié bonome. Alor bé létan ki i ti la, son madanm ti mor. Létan son madanm ti mor, i ti oulé trouv en dimoune konmsi pou ed li morso dan son louvraz. Kanmeme en marmay kelkonk. I pa ti gangnen. Son louvraz li fer kazié tranpé. Bé en zour dan pé mars, marsé, i zouene troua marmay. Ti annan Inosan, ti annan Koupab, ti annan Mardi. I démane zot;

• “Zot pa ti a kontan vine resté kot mouan, fer fer mon pti louvraz?” zot dir li – oui.

Alor bonnome i done zot kazié. Zot tranpé, zot amene pouason, bonnome li i anmas zot larzan. Zot resté lameme kot sa bonnome. Bien, alor zot la kot bonnome. Bonnome i kontan zot. Zot lenz ti tou désir desire. Bonnome i dir zot:

• “La mon ouar zot desire, mon a aste ene pti lenz mon a done zot. Mé selman, zot a pran ouasko zot a al dan dilo sale, bane bon bon lenz dan dimans zot a al lanmes”.

Marmay bien dakor. Kazié zot tranp lendi ziska sanmdi. Dimans bonnome I défane zot alé. Sa bonome i resté li toultan obor sémen. Tou sa ki i pasé i konnen. Bien. Ene zour sa troua garson zot sorti lev kazié. Pane gangnen pouason. Zot traverse. Ine pas en krim koté ovan laba.

Koman zot traverse, gard ban. Zot démande ki zot ine fer. I dir zot ki zot ine fer krim. Bé krime kine fer i annan sasiner, I annan touyé.

Bonnome i véyé. Senk er i sonnen. I désane bor lanmer i al kot saloup. Saloup i bien kot in anmaré: ine soué lo lans. Mé napa marmay. Bonome ine enkiet. Pa ni manzé ni narien pov diab.

I gété. I dir:

• “Mon bane zanfan? Kot ine alé ségner?”

Anfen i pa dormi, i fer son kazié. Létan ki i pé fer son kazié, bane dimoune i monté. I demane zot:

• “Zot pa ouar mon troua marmay”?

• Zot répone li:

• “Ou troua marmay? Bé zot an konsine”.

• “An konsine? Kisisa!”

• “Bé pa zot ine fer krim?”

• “Mon piti ine fer krime? Mouan mon konnen ekel”.

Anfen, marmay bomaten i larg zot. Zot mont kot tonton. Tonton i démane zot:

• Mé mon bane zanfan, koté zot sorti”?

• “Zot in met nou an konsine. Zot dir noune fer krim”.

Bonnome i dir:

• “En!

E! li touyé ler ine fer krim i pran son lanmen i souiy avek son nanver kanson. Tonton ti tane bien konversasion touyé ek asasiné:

• Tansion ou lanmen disan. Napa dilo”.

• Mone souiy ek mon nanver kanson”.

I marké. Bonome i dir ek sa bane marmay:

• Zour zot zafer i prézanté sinifié mouan”

Ti novanm. Toudmenm zafer i prézant an kour. Bonnome i dir zot alé. Zafer I anvoy pou lé trantéen désanm. Tonton i bouzé Katrer bomaten.

Tonton i alé, tonton i alé. Ler i ariv kot maternité bélo, i tonm en gren lapli. Tonton i bag anba lavarang maternité avek son troua garson, i dir:

“Bonzour, bonzour”.

• “Bonzour bonnome”.

• “Mon bézouen ouar sa mis ki an sef”.

Sa ners i alé i rod li. I dir:

I annan en msié i bézouen ou”.

“Bé zistéman. Mon présé, i annan en madanm mon bézouen al résévouar li (pou fer li gagne son pti baba). I inosan i pa kone narien. Mon bézouen al résévouar li”.

Tonton i marké. I dir: “Anou alé marmay”.

Relman zot désane. Zot pas bazar. Tonton i pran en grog. Zafer i ziz louen. I ziz kot safo. Touyé ek sasiner i pa ladan li. Prézanté zafer, zafer i anvoy pou never bomaten. Tonton i dir:

• “Mouan mon pa pou al okene par mouan”

Zot manz zot galet. Never i sonnen, prézant ankor zafer. I anvoy pou ene er. Marmay pé pléré asodlarm. I dir:

• “Pa pléré marmay”.

• Zafer i prézant an kour. La pou terminen zafer. Tonton avan sa i bour lanmen dan son pos. I tir sa papié i prezant ziz, i géte, i gété. I gété. I demane tonton:

• “Ki louvraz ou fer”?

Tonton i dir:

• “Mon grat banbou mon fer kazié.

I dir:

“Bé an enstan, ou troua garson ki louvraz zot fer?

Tonton i dir:

• “Mon done zot mon kazié pou tranpe. Zot vini gard i tionbo zot. Mé pa zot ki ti fer krim. Ti annan sasiner ek touyé.

Ziz I dir:

• “Bé bon, ou kapab montré mouan avek disifé?”

• “Kot ine souiy son lanmen mon a montré ou tou”.

I sinifié li. Vré i vini. Son lenz i ankor lo li. Ankour (I annan lanmores) ziz i dir li:

• “Tir ou kaneson lo ou”.

• I tiré, i dir lala. Son kat droua disan i marké. Ziz i dir:

• “Bé bon, avan sa, toudmeme, gard ine aret ou troua garson. Bé mon a touy Mardi. ”

• Tonton i dir:

• “Pa kapab touy Mardi, i a mank en zour dan lasemene”.

Ziz i dir:

“Mou a touy Inosan.”

Tonton i dir:

“Bé bomaten i annan en madame fek gagne baba, ou a touy li osi? Bé li I pa kone narien. Sa ene osi I pa kone narien, mon piti. ”

I resté ene la. Ziz i dir:

• “Touy Koupab”.

I dir:

• “Lakourone pa kapab sipled koupab”.

La prézan i dir ek li:

“Bonnome, ki louvraz ki ou fer dan ou lavi ki oune kapab kone tou sa zafer”?

Bonnome i dir:

“Mouan, mon travay ek persone mouan. Tou sa ki pas dan sémen mon konnen. Sanmeme mon louvraz mouan – zis fer kazié?

Ziz i dir:

• “Ou pa travay ek persone? Bé la prézan mon a done ou en pansion R 500. ”