En fwa ti annan trwa gran zanmi; Frer Soungoula, Frer Torti ek Frer Sousouri. Frer Soungoula li ti reste anler dan lafore, Frer Sousouri ti reste lanmwatye semen e Frer Torti li ti reste obor lanmer. Tou le swar sa trwa zanmi ti zwenn ansanm pour koz koze e rakont tou kalite zistwar ek en bann mansonz tou ansanm.
En zour letan zot ti pe koze parey labitid Frer Soungoula ti dir, “Mwan zanmen personn i kapab fer mwan per.”
Frer Torti ek Frer Sousouri pa ti dir naryen. Zot ti konnen ki Soungoula ti vantar e zot ti anvi geri li!
En swar Frer Soungoula pa ti santi li tro tro byen. Son lekor ti fermal e i pa ti kapab desann pour al zwenn son de dalon. Zot ti esper li, napa, espere napa. Alors alafen Sousouri ti dir, “Frer Torti o, konmsi nou dalon pa pe vini ozordi.”
“Dwatet i malad,” Torti ti reponn, “Mon ti dir li sa ta bannann ver pa pou fer byen dan son vant.”
Frer Sousouri ti dir, “Torti o, mon’ n ganny en bon lide. Ou rapel lot fwa Soungoula ti dir li napa en boug fer li per? Be nou byento nou pou fer li per.”
Frer Torti ti dir, “Mon frer kimannyer ou pou kapab fer sa fezer per? I en gran malen li.”
Frer Sousouri ti pran laparol, “Ler Frer Soungoula i a byen i a konmans vin ankor li. En zour mon a fouy en trou zis dan semen pre kot mon reste. Mon ava antre ladan e mon a kit zis mon ledan deor. Ler Frer Soungoula i desann i pa pou war mwan e i pou kriy mwan plizyer fwa me mwan mon pa pou reponn. Alors Soungoula pou krwar mon malad e i pou vin kot mon reste. Ler i a war zis en bann ledan anba later i a bezwen per.”
Zot! Ler Sousouri ti’n fini koze Torti ti konmans riye, “Ho ho ho, sa en bon lide, Frer Sousouri. Si vre nou kapab fer nou dalon per i ava arete son vantar.”
Vreman de trwa zour apre, Soungoula ki ti ‘n repran lekor, ti desann parey labitid pour al zwenn son de dalon. I ti mazinen i ti a war Frer Sousouri pe esper li parey labitid, me sa zour ti napa li. Frer Soungoula ti konmans kriye, “Frer Sousouri, Frer Sousouri!” Napa larepons. I ti kriy ankor plizyer fwa me napa larepons menm. Alors i ti dir dan limenm, “Dwatet Frer Sousouri i bezwen malad. Mon ava al gete.” I ti pran lale ki al kot Frer Sousouri. Toutakou i ti get ater devan li. I ti sot en kou. “Kisisa sa?” i ti dir dan limenm. I ti bese pour get pli byen. La i ti war en bann ledan pe klate anba later. Soungoula ti konmans per. I ti tranble e son ledan ti tap ansanm. I ti sey taye me i pa ti kapab. I ti kriye, “Frer Torti o, Frer Torti o, vin get mirak. Later in pous ledan.”
Frer Torti pli ba ki ti okouran tou laranzman, ti riy dan limenm. I ti reponn, “Pa kapab, pa kapab. Pa bezwen taye, esper mwan, mon ape vini.” Salerla i pa ti bouz ditou kot i ti ete. Frer Soungoula ti kriy ankor pli feb sa voyaz, telman i ti’n per, “Frer Torti o vin get mirak, later in pous ledan.”
“Esper mwan, mon ape vini,” Torti ti reponn me byensir i pa ti ni bouze.
Pov Soungoula ti nepli kapab tenir. Nek i ti tonm ater sek. Deswit Frer Sousouri ti sorti anba later kot i ti ete. I ti al dan son lakaz e anmenn en pe delo disel e fer Soungoula bwar. La Soungoula ti en pti pe. I ti dir, “Frer Sousouri, kot ou ti ete? I annan zafer isi.”
“Ki annan? Akoz ou’n tonm feb mon frer?”
Soungoula ti pran respirasyon avan koze, “Sousouri mon frer, later in pous ledan, gete,” e la i ti montre ledwa ater. Me ler i ti gete ti annan zis en trou vid. I ti’n fi ni ebete. I ti get Frer Sousouri ki ti pe mor riye. Telman i ti pe riye son larm ti koule. Soungoula ti war sa drol. I ti demande, “Be ki ou pe riye Sousouri? Ki sa, ou pa krwar mwan? Mon dir ou taler mon’n fek war, later in pous ledan.”
Sousouri ti dir an riyan menm, “Mon frer be pa nou de Frer Torti ki’n aranze pour fer ou per? Mwan ki ‘n antre dan trou, kit zis mon ledan deor. Nou ‘n fer sa akoz ou ti tro dir ou napa en boug fer ou per.”
Ler i ti tann tousala, Frer Soungoula ti bezwen riye li osi. Zot ti desann ansanm pour al zwenn Torti e Soungoula ti dir, “Mon bann frer mon fer serman koz vantar ankor, vre mwan osi mon kapab per,” e tou le trwa ti tonm laba mor riye!