Fodre travay avek pasyans pour ganny ton pen

Samuel Accouche (SBC Radio)

Fodre travay avek pasyans pour ganny ton pen.

Ti annan en onm ki ti’n marye. I ti annan trwa garson. Ler son trwa garson ti’n ganny en bon laz konesans, tou le swar zot papa i apel zot kot li e i dir avek zot, “Zanfan, mwan ek zot manman nou pe vye e byento nou a mor e nou a kit zot lo later. Alor konsey ki mon donn zot avan mon mor se ki zot dwatet viv poli anver tou dimoun. Pa bezwen servi sa bann gro gro betiz kan zot koze. Pa bezwen groker keksoz zot kanmarad. Travay a lasyer de zot fron pour zot ganny zot pen. Pa bezwen lager keksoz ki pa pour zot. Travay touzour avek pasyans pour ganny zot lavi. Kanmenm en louvraz i dir, si ou’n konmans fer li pour ganny ou pen, kontinyen fer li ziska ou a fini. Swaye touzour obeisan e respektab anver zot paran e anver vyeyar. Si en vyeyar ou en pov i demann zot en pti lasarite, si zot annan, zanmen refiz zot. Si ou zwenn zot, zot in tonbe dan semen oubyen si zot fay ki zot pa byen kapab marse, lev zot, antrap zot lanmen e kondir zot se zot. Si zot demann en ed, kanmenm sa louvraz ki zot in demande pour fer i dir, pa bezwen dispit oubyen kite me kontinyen fer pour zot ziska zot a fini, e pli tar zot rekonpans i a gran.”

I dir avek son trwa garson, “Mes enfants, si zot ekout tou mon bann bon konsey ki mon’n donn zot, zot a ere en zour lo later pandan mon labsans.”

Alor i demann avek zot, “Eski zot pou obeir mon bann konsey, wi ou non?”

Tou le trwa i reponn li, “Wi papa. Nou pou obeir tou ou bon konsey ki ou’n donn nou.”

Sa trwa garson, lene ti apel Bosan, dezyenm ti apel Makabe e trwazyenm ti apel Dayo. Me sa premye garson Beauchamp ti pli bon ki son de lezot frer. Me zot tou le trwa zot papa ti’n montre zot plante e zot ti trwa bon planter malgre zot ti ankor zenn. Zot ti plant tou sord keksoz konman patat, manyok, bannann, kanbar eksetera. Kan zot papa ek zot manman ti’n mor e ki zot tou le trwa ti’n kit lekol, tou le trwa frer zot ti’n adopte plante konman zot metye. En zour Sanmdi ki tou le trwa ti pe al bazar pour al vann zot viv ki zot ti’n plante, zot rankontre en vye bonnonm ki son labarb blan in bat lo son lestoman. Sa vye bonnonm ti’n asize lo en siko dibwa lo bor semen. Sa pli pti frer ki apel Dayo ti devan, apepre san yard par devan son de pli gran frer e Makabe dezyenm frer ti en pe pli lwen par deryer Dayo e zot gran frer Beauchamp ti pli deryer son de pti frer.

Ler sa dernye frer Dayo i zwenn sa vye bonnonm premye, sa bonnonm i dir avek li, “Mon pti, mon vye, mon pa kapab travay. Mon napa en pti morso manze pour mwan manze ozordi. Ou pa kapab donn mwan en pti patat ki dan ou pannyen pour mwan manze tanto?” I dir, “Mon fen. I annan de zour mon pa manze.”

Dayo i reponn sa vye bonnonm, i dir avek li, “E ou la per, mon konn ou mwan? Mwan ou papa pour mwan donn ou manze?”

Sa vye bonnonm i dir li, “Ale ou mon pti! Pa fer nanryen kanmenm ou pa donn mwan, ou pa donn mwan lasarite en pti patat,” e Dayo i kontinye son semen. I al vann son bann viv ki ti dan son pannyen.

En pti moman apre son dezyenm frer Makabe i pas o bor sa vye bonnonm. Sa vye bonnonm i dir avek li, “Mon pti ou pa kapab donn mwan lasarite en pti patat dan ou pannyen? Mon lafen, i annan de zour mon pa manze.”

Sa dezyenm frer Makabe i tir kat patat dan son pannyen e i dir, “La kat patat pour ou, tonton.”

Sa vyeyar i dir, “Mersi mon pti,” e i dir avek li ankor, “Monm pti, mon lanmen i angourdi e mon tranble, alor mon pa kapab anmenn mon patat ki ou’n donn mwan dan lakour. Eski ou pa ti a kapab rann mwan en servis, atrap mon lanmen e anmenn mwan ek mon patat dan lakour?”

Alor sa dezyenm frer Makabe i mazinen e i dir dan li menm, ‘Touzour papa ti dir nou donn lasarite en vyeyar ki demann nou e ed li si i vye e si i pa byen kapab marse atrap son lanmen e anmenn li se li.’ Alor i dir avek sa vye bonnonm, “Wi tonton, mon a ed ou ziska se ou.” I atrap lanmen sa vyeyar, i anmenn li se li e i donn li son kat patat.

Sa vye bonnonm i dir avek li ankor, “Mersi mon pti pour sa ki ou’n fer pour mwan,” e sa vye bonnonm i dir li, “Mon pti o, mon reste tousel, mon napa okenn fanmir. Mon napa personn pour ed mwan. Mon trou latrin in plen e sanniter in donn mwan zis de zour pour mwan fouy en lot, sankwa mon ava an kontrovansyon. Eski ou pa ti a kapab rann mwan sa servis fouy mon trou latrin?”

Makabe i mazinen, i get lo son mont. Ti trwa-z-er edmi apre midi. I dir “Wi tonton, mon a rann ou sa servis.”

Alors sa vye bonnonm i dir li, “Mon pti get anba lakav ou a trouv en vye pyos ek en vye lapel. Al konmans fouye.”

Alor Makabe i konmans fouy trou latrin. Ler ti’n ariv senk er edmi, ti reste forse trwa pye ankor pour li fini fouy sa trou dapre lord ki sanniter ti’n donnen, me Makabe ti’n tro fatige pour li kontinyen fouye, fouy sa trou ziska i ti a’n fini. Me i dir dan li menm, ‘Zot mon’n ed sa tonton ase aprezan. Les en lot dimoun i a vin ede li osi. Mon pa kapab rann tou servis mon tousel. Mon’n ed sa tonton ase e prezan i tar, mon bezwen al dan lakour,” e i dir avek sa vyeyar, “Tonton, mon krwar ki mon’n ase ed ou e aprezan sa pti morso ki reste pour fouye, esey ganny en lot dimoun ki a fer pour ou.”

“Mersi mon pti pour tou sa ki ou’n fer pour mwan,” sa tonton i dir li. I dir avek li, “Me selman les mwan dir ou ki pasyans i geri lagal.”

Makabe i demann avek sa vyeyar ki i oule dir par sa parol la tonton. Sa vyeyar i dir li, “Ou pa en zanfan, ou dwatet fer travay ou lespri pour sa ki mon’n dir ou.”

Makabe i dir li, “Dir sa ki ou oule tonton, be mon’n fer ase pour ou ozordi. Mon pa pou kapab fouy ankor ou trou latrin plis ki sa. Parey mon’n dir ou, fer ou debrouy pour ganny en lot dimoun pour fouye, sa pti morso ki reste fer en lot dimoun fouye, parske, sa pti morso ki reste fer en lot dimoun fouye parske i tar, mon bezwen al dan lakour.”

Alor sa vyeyar i dir li, “Byen mon pti. Si ou’n vwar in ler pour ou al se ou, ou kapab ale e mon remersye ou bokou. Bonswar.”

E Makabe i al seli. An arivan se li i rakont son de frer tou sa ki’n arive e akoz ki i’n an retar. Son dernyen pti frer Dayo i dir avek li, “Ou tro gaga, sanmenm ki’n ariv ou sa. Tou sa ki sa bann vye lakord i dir ou fer pour zot, ou al fer! Ou pa vwar mwan i ti pe sey vin fer sa enbesil ek mwan e mon’n met li dan son plas deswit!”

Son gran frer Bosan i dir li, “Pa bezwen koz koumsa anver en vyeyar don, Dayo! En zour ou osi ou pou vye e ou a bezwen led ou kanmarad.”

Dayo i dir, “En, la telman ki mon ankoler ki sa vye bonnonm in demann mon patat, mon ava al aras tou e mon pa pou plant ankor!” Alor vreman i al dan son bitasyon e i al aras tou son viv ki i ti’n plante pour ki okenn vyeyar pa pou demann li nanryen ankor.

Lannmen menm ler zot premye frer Bosan dan son pe al bazar pour li al vann son bann viv ki ti dan son pannyen, an arivan menm landrwa, i zwenn sa vye bonnonm labarb blan asize lo menm siko dibwa ek son baton. Sa vyeyar i dir avek Bosan parey i ti dir ek Dayo ek Makabe osi, an demandan en pti lasarite patat. Beauchamp i mazin parol son papa e i donn li kat gro patat. Sa vyeyar i remersye li e i demann li si i pa kapab anmenn son patat se li parske i tranble e i pa kapab anmennen. Deswit Bosan i remet son patat dan son pannyen i antrap son lanmen, lanmen sa vyeyar, e kondir li se li. An arivan se li, sa vye bonnonm i al montre Bosan en lot landrwa e demann li si i pa kapab rann li en servis fouy son trou latrin, e i dir li parey i ti dir avek son dezyenm frer Makabe. Trwa-z-er edmi ti’n sonnen e Bosan i komans fouy sa trou latrin. Ler ti’n ariv senk er edmi menm, ler ki Makabe ti’n aret fouye, Bosan i dir dan li menm, ‘Arr malgre i tar e mon lwen avek dan lakour, me konm sa pov bonnonm napa personn pour kontinyen fouy sa latrin, alor mon a kontinyen ziska mon a fini, parske i pa reste bokou pour mwan fouye. Zis apepre trwa pye ankor.’

Alor Bosan i kontinyen fouy trou latrin sa bonnonm avek kouraz ek pasyans. I mazin parol ki son defen papa ti touzour dir li ki i fodre travay dir e avek pasyans e bonn volonte pour kapab vin ere en zour dan lavi. Konman i tap ankor trwa koudpyos i santi son pyos i tap lo en keksoz ki dir dan fon. I dir avek sa vyeyar, “Tonton, mon’n zwenn ros dan fon, me si mon kontinyen tap ou pyos lo la, i a kraz ou enn menm vye pyos ki ou annan.”

Sa tonton i dir avek li, “Get anba lakav mon pti, ou a trouv en vye lapens. Kas sa ros avek, mon pti.”

Bosan i ale i rod lapens, i tap sa lapens lo sa keksoz dir e sa keksoz i defonse. I vwar ki ti annan dan fon en gro potis lor ki groser en gro barik diven. I kriye, “Tonton, vin get sa!”

Sa tonton i dir avek li, “Tout penn i merit son saler. Sa ki ou’n gannyen, pran li pour ou.” I dir avek li, “Mon pti, dan lavi il faut travailler dure à la suaire de ton front pour avoir ton pain. Si ou egois ou ava mor egois menm.”

Sa bonnonm ti ris li. I ti annan de sa potis lor ki ti’n antere. Enn i ti oule donn Makabe, me Makabe pa’n ganny pasyans pour li fouy ziska i ti a’n zwenn sa ki pour li. Salerla ti reste zis ankor trwa pye. Alor Bosan ti vin ris, son dezyenm frer Makabe ti viv ase byen avek son plantasyon e pti frer Dayo ti viv dan en mizer terib apre ki i ti’n aras tou son viv.

Nou’n ariv a lafen sa zistwar, anvwaye par Samuel Accouche.