EN RIZ SOUNGOULA

Soungoula i kontan mars marse dan bwa. Ki i pe rode, li menm i pa konnen. Alors dan son pe marse, i war rousay in mir. Letan i avanse pour li kas rousay, nek i santi keksoz i pik li. I anvoy lanmen i kraze me prezan ki i ganny pike. I taye. Letan i pet aye, i realize poudir mous zonn ki pe pik li. Dan en pti moman, son lekor in anfle. I santi koman en lasaler ki mont partou dan son lekor. I kouri, i al se li.

« Tal mon payas bonnfanm, toudswit ! »

« Me mon mari, » bonnfanm i reponn, « I ankor ne-v-er bomaten. Zanmen ou al dormi sa ler ! »

« Ferm ou labous. Fer sa ki mon dir ou ».

Son bonnfanm pa tarde, i deroul son payas. Me avan i sorti pour li al larivyer, i dir ek son mari,

« Ou a esplik mwan sa ki’n ariv ou ler ou a leve ? »

Soungoula i fer, « Mm ! »

Apre en pti moman, sonmey i pyen li. I dormi pandan senk erdtan. Ler i leve, i kalkil en kou ki i ti devret fer. Toudswit, i’n ganny en plan dan son latet. I ava al en pti kou kot Zako. I leve, i tonm deor, i koste son bonnfanm, i dir li,

“Mon pe al en kou kot Frer Zako. Mon’n war en bonbard mous laba.”

“Be akoz ou pa al tir ou menm ? Nou ti a ganny tou dimyel pour nou menm. »

« Landrwa kot sa i été i tro danzere pour mwan. Zako ki abitye mont dibwa. »

« Mon mari, sa ki ou pe rakont mwan, pa li sa enn ! »

« Koumsanmenm ki Labarb Ble ti koup zot likou. Tro fournen ! »

E koman i fini dir sa, Soungoula i pran son semen pour li al kot Zako.

Dek ki i ariv laba, i komans rakont Zako sa zafer dimyel ki i’n trouve dan bwa. I dir ek Zako,

« Mon frer ! I annan en gro bonbard mous dimyel lao laba.”

Pa bezwen dir ou Zako i sot anler.

« Dimyel ! Eski i lwen bokou sa, Frer Soungoula ? Si pa tro lwen, nou apab al tire toudswit. Nou ava al sers sa, nou a partaze. »

« Lanmenm la deryer sa pti montanny. Nou ava’n retournen avan soley i kouse. »

Le de zanmi zot monte zot al laba. La prezan zot in ariv o bor touf rousay. Zako i dir ek Soungoula,

“Esper mwan en pti moman. Mon pa pou tarde, mon al kas enn de pti rousay lanmenm la. »

Soungoula i ouver son lizye gran, i fer konmsi ryenete.

“Kote? La? Isi rousay pa ankor byen byen mir. Get laba o bor sa gro ros. Sa wi… ou pa war ki mannyer in roz laba? Isi i ankor en pe ver.”

Zako i al kot Soungoula in montre li. Zot, koman i anvoy lanmen pour kas en gro grap mir ki’n mouste, nek i tan,

“Van! Ving! Von! Vong!”

En pti kou i santi en lasaler deryer son likou, dan son zorey, anba keklkel, lo son nennen, lo son lapo lizye, ziska lo son penpen. Pov dyab !

Saler li Soungoula kot i’n debout nek i ape riye. I pa ni fer nanryen pour li soz Zako. An plis i komans sante e dir,

« I dou, i dou, koman li bon sa lasir dimyel 

I dou, i dou, koman li bon sa lasir dimyel ».

Zako i kriye,

« Tire mon frer ! I pik mwan !”

Me Frer Soungoula i kontinyen sante. Li Zako, tou son lekor in komans anfle. Taye i pa kapab, pov dyab, i tonbe i roule ater. Dan son soufrans, i bliye poudir i’n vin rod dimyel.