EN FEZER IDOL

Ti annan en lewa. I ti annan son fiy. Be ti annan en lot msie ki ti annan en garson. Be sa msie in mor. Sa lewa I pran sa garson pou reste avek li dan son pale. In grandi ansanm avek prenses koman ser ek frer. Be en zour, nennenn I dir avek lewa:

• Mon rwa, sa de zans I annan en konvansyon sa. I annan en pti lanmour ki zot pe fer.

Lewa I dir:

• Non, pa pou kapab. Zot in grandi ansanm koman frer ek ser. Be ki lanmour zot pe fer?

Sa nennenn I dir ek lewa:

• Mon asir ou ki sa de zans I annan en pti lanmour. Veye en zour mon a fer ou fer en remark.

Relman, lewa en zour I donn en parti. Be sa fiy I zwe piano. Sa garson I zwe violon. Sa fiy ti demann son papa permisyon pou sa garson akonpagn li ek son violon. Lewa I dir wi san mazinen ki pou arive. Be letan pe zwe sa de zans pe fer zes ek kanmarad. Be sa nennenn pe veye, I war. I ale I al dir ek lewa:

• Be gete mon rwa.

La lewa I gete I war sa de zans pe dod menm. Fini vin de zanmoure menm. La, lewa in fini anmerde. Lannmen bonmaten I dir ek sa garson:

• Be mon a transfer ou dan en lot pei. Be ki metie ou anvi al aprann? Mon a tir ou isi dan mon pale mon a anvoy ou al aprann en metie.

Sa garson I dir:

• Mon a al aprann fer idol.

Be alor relman sa lewa I rod en landwa kot I montre fer sa zafer. I al anbarke. Lewa I pran son kales de seval ladan. I met li ladan pou desann. Letan ki I a pe ale dan simen, I pe fer orewar sa fiy. Sa fiy li I dan dernyen letaz pe fer orewar. Lewa I war tou le de in lev lanmen pe fer orewar. Zot ale, zot ale. Fiy deryer an pleran. De zour I pa manze.

Ariv laba I antre dan sa latelie. Son premie louvraz I dekor pale kot I ti pou reste ek sa lewa, ek sa fiy dan letaz pe dir li orewar, li dan son kales, son kat seval, lale tou zafer, I anvoy pou lewa. Lewa I reste ebete. I pey en pasaz I al sers sa garson pou vin marye ek son fiy.