DIFE DAN SIMITYER

Georgine Robert

Dan pti delo fre anba en gran pye bodanmyen ki ti’n tale par lao larivyer, pa lwen deryer lakaz, en seremoni bennyen ti pe ganny akonpli. Ti plis en rityel ki en ben . Tazi ti’n asize dan zis son ba kannson lo en ros glise, son de lazanm tale dan delo. Mimi son dalon ti pe frot son ledo avek en bout servyet kimen avek savonnet. Lekim savon ti desann dan kre ledo. Mimi ti en pe pli modes. Son rob zendyenn afler ti’n kole lo Ii. De gran servyet blan ti anpandan lo brans kannel zis akote.

Seremoni ti deroul koumsa. Premyerman ledo ti ganny frote e imerse. Ledan ti sibir en brose avek labour koko.

Dernyen ti lipye. Sak pti zong ti ganny brose avek labour.

Talon zot, zot ti pas lo ros ziska ler zot ti’n byen blan pour pa fer soulye kanmi.

Ben terminen zot ti kit delo pour al pran servyet. E! Servyet ti nepli lo brans kannel. Zot ti lo brans mazanbik. Pourtan zot ti sir ki zot ti’n met zot servyet lo brans kannel. Zot ti get kanmarad. En pti frison ti pran Mimi. Laserpoul ti’n pitakle lapo Tazi.

“Mimi, mon ser, sa en trik . Se pa si pa sa pti gard ki ti pas la lot zour. I’n vin la zis pour fer nou per.”

Me anndan zot ti konnen ki si en dimoun ti’n vini zot ti pou’n bezwen war Ii. Mimi ti balans son latet e dir, “kekfwa en siny.”

Zot ti mont kot lakaz. Pandil ti sonn senk er. Zot ti pe tro tarde. Dan pti lakwizin zis akote, dinen ti pe esper zot, en bon lasoup tektek. Sakenn ti ranpli son bol emaye e asiz kot a kot lo en pti ban. Ti napa letan koze. Lasoup ti zis glise. Lasoup ti swiv par deser en trans dipen avek papay tournen.

Pandil ti endik zot ki ti senk er edmi. En loder pisanli ti ranpli lakwizin. En dimoun ti deor. Tazi ti’n enplor Mimi pour aras sa bann kosonnyen. Zot ti telman pi. Me Mimi pa ti oule tann parle. Tazi ti kontan son roz mari antwanet. Me zanmen ou ti santi son parfen. Sa loder pisanli ti touf tou lezot.

Tazi ti sorti. Ti napa personn. Pourtan i ti sir ti annan en dimoun ki ti’n vini. I ti get isi get laba. Mimi dan lakwizin ti dir, “Tazi lekel?” Tazi pa ti reponn. Ti drol, vreman drol. I ti antre ankor dan lakwizin. “Napa personn,” i ti dir Mimi. “Petet ti zis en lisyen.”

Toudmenm zot pa ti fatig zot. Vant byen plen zot ti antre sakenn dan son lasanm.

Lo lili Tazi ti en manifik rob saten rouz, avek en kol debout lanmod sinwaz. Ti desann drwat ziska par lao zenou avek en fann lo kote pour montre son zoli lazanm. Son gran lazanm ti paret lo kote par louvertir. Son likou ek lazanm ti ase pour fer latet tournen. I ti zet en kou-d-ey dan laglas. Son seve ti demann en kantite swen. I ti ouver en pti po vazlin dan lekel i ti toultan gard bann petal roz. Sa lakrenm ti’n parfimen ek roz.

I ti servi sa pour son seve, en krepi rouz, difisil pour donte. Tazi ti en albinos, gran, rouz, me byen bati. En laform pour fer lezot fanm bave, menm Mimi ki ti en zoli malbares.

Penny ti plennyen dan krepi Tazi. Me labitid i en segonn natir. Apre detrwa minit, i ti’n ganny en konpran. Tou ti’n gal avek en kanboul dan milye latet ki ti fer son likou ankor pli long.

Son refleksyon dan laglas ti dir li tou sa ki i ti anvi tande. I ti fer en souriy. Pa bezwen personn dir li i ti zoli, son laglas ti’n rasir li. Met li lo bazar avek Mimi i ti pou vann avan. Prezan ti mank Ii zis son far ek kreyon nwanr, epi son bou-d-orey rouz trwa fey ki ti tonm preske lo son zepol. I ti balans son latet. Prezan ki i ti mazin Mimi.

“Mimi, anmenn ou bann zafer isi. I annan plis laklerte.

Deswit Mimi ti antre konmsi i ti pe esper Tazi kriy Ii. Dan en rob krepdesin blan, bouyonnen avek lastik, avek zis en kote bretel, i ti konpletman diferan avek Tazi. I ti paret frazil. Son gran seve tale lo son ledo.

Lagl as ti reflekete en portre siperb. Ti reste en dernyen keksoz, parfen. Pour sa swar, Mimi ti servi en gout ponpeya deryer son zorey, dan son ponnyen ek likou. Zis en pti gout pour pa tro for. Tazi ti servi renndefler. I ti espere ki son loder ti a reste ziska minwi.

En dernyen pti preparatif ti swiv. Tou le de ti fer sir zot mouswar ti dan zot kaba, zot far pa ti’n barbote, zot seve ti byen annord, en dernyen kou-d-ey dan laglas.

Mimi ti sote ler i ti zet dernyen regar dan laglas. Ti annan zis refleksyon Tazi, pa sa ki pour li. Petet ti en trik lalimyer. I ti get ankor enn fwa. I ti la, e pourtan i ti sir ki taler ti napa li. Me ti napa naryen pour per. Selman son leker ti kontinyen bat for. I pa ti oze dir Tazi nanryen. Son zanmi ti pou riy li.

Ti pre set er, ler pour tenny fannal, ferm laport e pran pti desant sorti kot lakaz pour tonm lo grannrout. Zot ti desann lantman pour fer sir ki talon soulye pa kase. Tazi pa ti bezwen redi son rob anler. Sa fanm lo kote ti donn son lazanm ase bataz. Mimi li ti’n redi son rob krepdesin en pti pe pli o ki labitid pour talon soulye pa may ladan. Zot ti konnen ki sa swar zot ti pou fer fraka.

Korvet ti dan por. Ti letan pli aktif dan lavil sirtou dan set er diswar. Dimoun ti pe ale vini lasose. Ti difisil pour dir si ti refleksyon lalin ou soley ki ti donn sa lalimyer roze akoz soley ti fek kouse e lalin fek leve. Dan sa lalimyer roze Seselwa ti pe pas isi, pas laba, pe pran ler lanmer. Ti en landrwa spesyal, lasose. Melanze parmi bann Seselwa, bann matlo Franse ti parey bann fler blan kouronnen par en ponpon rouz.

Parfwa bann gran riye ti trouble trankilite. Tou dimoun la ti konnen ki kote sa kalite riye ti sorti. Bann delannos, en menas pour sosyete. Zot ti la. Abiye dan fason provokan, zot far pli rouz ki pour lezot fanm, ki ti en pe per zot. E zot ti annan rezon. Anba zot laparans ge zot ti toultan arme. Dan zot kaba ti annan swa kouto, swa ros anmare dan mouswar.

De dalon delannos ti’n ganny sakenn en zanmi matlo e zot ti pe fer direksyon sant lavil. Lebra otour leren kanmarad, fanm ti pe touy sa langaz Franse san okenn pitye e zot ti fini sak fraz avek en gran riye. Lezot bann konpatriyot ti swiv zot ek lizye kot zot ti pe ale esperan ki zot osi taler zot ava kros enn.

Ti napa bokou pour fer lasose, sof marse e pran ler lanmer. Zafer ti dan lavil. Alors dan en pti moman en laprosesyon ti mont ver “Lotel Anpir.” Laba apre set er tou keksoz ti lo la. Bwar, manze, lanmizik, danse. Tousala ti swiv par en larzan par kote si ou ti ase malen pour dekouver ou lasans.

Dan lotel, lanmizik ti dou, santimantal. Mizisyen dan kwen ti pe larg sa ki bon. Vyolon ti pe plennyen. “A rendez moi mes beaux jours.” En koup ti pe valse.

Bann latab ti’n preski ranpli menm dan sa wit er diswar. Sa ti le ka sak fwa ki ti annan bato dan por. Tou kalite labiyman ti an parad; rob afler, dekolte, gode, kole, brode. En ventenn papiyon ti’n apoze, tandis ki barmenn ti pe fer tou dimoun kontan. En gran souriy plake lo son figir i ti bese zantiyman e pran komann. Kreol melanze ek Franse ti ranpli lasal. Lanmizik, labwason, sigaret ti anmenn tou sa ki ti la, dan en lot monn. Tou traka ti’n ganny eliminen. Sa, zot ti les pour lannmen.

Apre ki mizisyen ti’n zwe pour apepre katreven minit ti annan en lenterval kot zot ti al aroz lagorz. Ti pandan sanmenm sa letan ki Tazi avek Mimi ti fer zot laparans. Dan zot talon o zot ti monte parey envite doner dan en gran selebrasyon. En silans total ti desann lo lasanble. I annan ki t i reste labous ouver, ti napa en mous anvole. Tou le de ti avans kot en latab okipe par de zonm akoz tou lezot ti’n fini plen. Sa de zantiyonm ti leve, redi lezot de sez e envit sa de demwazel pour asize. Ti zis apre sa ki silans ki kase e bann konversasyon ti kontinyen. Barmenn ti diriz dan zot direksyon. Zot ti napa bokou larzan, zis ase pour aste sakenn en grog diven. Apre zot ti pou zwe zot lasans.

Diven ti arive. Zot ti peye. Tou le de ti pe mazinen pour fer sa diven reste osi lontan posib. Tazi ek Mimi ti satisfe ki zot lasans ti’n monte. Sa de zonm ti paret byen sarze. Zot ti de zonm blan, enn abiye an nwanr, lot an blan. Sa enn an blan ti pli smart. Son pti kravat nwanr ti parey en pti papiyon ki ti apoz kot son likou.

Sa de zantiyonm pa ti koz bokou. Annefe ti annan enn ki pa ti koz ditou. Ler i ti donn son komann i ti zis lev son ver e barmenn ti anmenn menm labwason. I ti servi Mimi dan menm fason. Sa enn an nwanr ti paret apresye laparans Tazi. I ti menm atrap son lanmen e anbras son bout ledwa. Me i ti dir li ki i regrete i pa ti pou kapab reste lontan. Petet i ti a rankontre li en lot fwa, akoz i ti frekant “Lotel Anpir.” Tazi ti reponn ki i ti dezapwente akoz ti anvi danse.

Pour konsol sa zoli manrmzel e fer li obliy son sagren, i ti tir en biye dan son pos, atrap son lanmen, poz sa biye ladan e ferm son lanmen. Tazi ti’n pare. I ti donn son pli zoli souriy pandan ki msye ti leve e sorti. I ti deside pour li pa danse, zis detann e ekout lanmizik.

De lot kote Mimi ti apresye sa pti grog ki msye an blan ti’n donn li. Mizisyen ti pe larg, “Fanm ki napa mari vini dimen, vini tanto, dan zironmon kot Tonton Pyer.” Zansla ti pe anpaye, sirtou bann matlo ki ti pe troke. Mimi ti anvi leve, ladans ti’n so, me sa msye an blan pa ti lev li. Ti pou malelve pour demann li. An zeneral bann madanm pa ti fer sa…

En sel kou ti mont en loder pisanli, telman konsantre ki otomatikman Tazi ek Mimi ti tir zot mouswar e bous zot nennen. Ti sa menm loder ki ti’n monte lakwizin, apremidi letan zot ti pe manze. Zot ti regard kanmarad. Lezot dimoun pa ti paret afekte, pa menm msye akote. En kouran ler glise ti monte sort i anba latab kot zot lipye. Mimi ti frisonnen. I ti regrete i ti ‘n met sa rob dekolte. Son lapo ti’n pitakle avek laserpoul. Me sa lafreser pa ti dir lontan. Apre en pti moman tou ti retourn normal.

Vals, mazok, polka, kontredans ti swiv kanmarad dan en lanbyans ki zis Seselwa ki ti kapab anmennen. Ti preske minwi ler en lager ti deklare ant de fanm. Tazi ek Mimi ti deside pour ale. Pa ti vo lapenn ou ganny en blese ler ou pa ti ni menm dan sa bann zafer. Zot ti leve. Msye an blan ti leve li osi. Ler zot ti desann peron i ti deryer zot. Tazi ti dakor ki Mimi ti’n kros son enn. I pa ti zalou. Son bi ti’n monte boner. Sa enn ti pour Mimi. Zot ti marse. Msye ti swiv zot deryer. Zot pa ti koze. Zot ti fatige e Beler pa ti lwen. Zot lili ti pe esper zol. Sa ti en lavantaz reste pre anvil. Ou ti kapab anmize ziska tar san mazin transpor.

Anmontan tou keksoz ti’n tris. Mimi ti pe konmans baye e akoz baye i atrape Tazi ti fer parey. Apre zot ti riye. En gro lisyen nwanr ti pas zis devan zot, pre pour zet zot ater. Tazi ti larg en langaz obsenn apre i ti dir “eskiz mwan. I’n zis sape.”

Anmontan menm si zot pa ti koze, Tazi ek Mimi sakenn ti’n plonze dan son refleksyon. Tazi li ti pe mazinen ki Mimi petet sa voyaz ti a profit son sans e debous zorey sa zonm. Ti rar ki Mimi ti fer en bon lapes. Toultan i ti krose epi les sape. Si i ti dan son plas i ti pou fer sa zonm konnen. I ti pou regret son betiz. Me Mimi son zanmi ti pli bet ki en sat plenn. Olye al koz ek sa zonm, i ti pe ale devan konmsi i pa bezwen personn. I ti vreman bet sa Mimi. Kekfwa sa non sat ki ti pe afekte li koumsa. Si i pa ti son bon zanmi lontan li Tazi ti pou’n tap son lanmen. La plito i pa ti dir Ii nanryen.

Mimi li i ti’n fatige e ansonmey. La sa zonm ti pe swiv li. I pa ti konnen kimannyer i ti’n tonm dan sa pyez. Sa pa ti en lavi. Son manmam ti maltret li sak fwa i ti pas kot li. I ti dir li i degoutan, e sa zonm ki i ti mars avek ti pou fer li perdi son lavi. Konmsi i ti tann son manman pe dir Ii, “Ale mon piti, ou pa oule ekout mwan. Ou menm ki pou vin rakont mwan letan i a’n tro so.” Me selman ti napa travay e i ti kontan viv byen. I pa ti kapab fye lo Tazi. Son zanmi ti’n fer bokou pour li ler i ti malad e napa nanryen. Tazi ti parey en ser pour li. I ti’n rod manze e aste latizann. Me i ti voudre sa zonm ti’n swiv Tazi olye li. Tazi ti annan plis parman. Me i pa ti dir nanryen.

Msye gran blan personn pa konnen ki ti pe pase dan son latet. Toutakou, sa lafreser ki ti’n angourdi zot lazanm dan lotel ti retourn ankor. Mimi ti tous Tazi. “Tazi, ou ganny fre?”

“En, en.” Tazi ti reponn.

“Be akoz mon ganny fre koumsa?” Mimi ti ensiste. “Petet mon malad.”

Zis sa letan en lisyen ti konmans irle, swivi par en dizenn lezot lisyen, en lanmizik efreyan dan sa minwi. Me zot ti pre kot zot. En loder pisanli ti monte. Ti fer trwazyenm fwa ki sa ti’n arive. “Mimi,” Tazi ti sipliye, “demen aras sa bann kosonnyen. Mon pa kapab siport sa loder.”

Zot ti’n arive. Tazi ti tir lakle dan son kaba e ouver laport. Tou le de ti antre anndan swivi par Msye. Tazi ti alim en labouzi. Mimi ti travers lasal e diriz dan lot lasanm akote. Zonm ti swiv li. Li osi ler ti ariv anba i ti al alim en labouzi e deside pour li dezabiye e met en lenz ki pour donn li en pti pe plis lasaler. I ti ganny telman fre ki son ledan ti pe bat ansanm. I ti pas en robdesanm lo li ek en kimono afler. I ti pou bezwen sof son lasanm. I ti bos reso ki ti annan detrwa morso sarbon ladan e tir li dan kwen. I ti alim dife. Petet apre lafreser ti a pase.

Pandan sa letan msye an blan ti pe asize lo lili pe esper li. Mimi ti tann Tazi pe vir vire lot kote. I pa ti ankor dormi akoz plans ti pe krake. En pti lasaler ti sorti kot reso.

“Granmersi!” Mimi ti dir ” Ou pa ganny fre?” Zonm ti sakouy latet pour dir non.

“Mon bet.” Mimi ti dir dan limenm. “Avek tou sa lenz lo li. I pa kapab ganny fre! Taler i a ganny tro so avek sa reso.”

Dan lot lasanm Tazi ti ankor pe tripote. Parey son labitid i pa ti kapab siport dezord. Son rob ki i ti fek tire ti anpandan dan portmanto. I ti les Ii pas ler pangar i ti a mwazi. Lenz ti enportan pour Tazi, sirtou akoz kalite travay ki i ti fer. Menm dan sa enn er bomaten i pa ti pou les son lenz alatrenn.

I ti retir son kouvreli, pliye e poz lo sez. Pandan tou sa letan i ti pe mazin Mimi. Ki sa enbesil ti pe fer? I ti anvi konnen kimannyer son zanmi ti pe debrouye. Mimi pa ti annan labitid anmenn dimoun kot li. Ti rar ki i ti fer sa. I pa ti konnen ki Tazi, son bon dalon, ti annan en trou dan separasyon lakaz kot i ti tyek son mouvman.

Tazi ti tyeke. I ti kil deryer. I ti get en dezyenm fwa. Menm zafer. Tazi ti frisonnen. I ti pe fol, pa posib! Eski sanmenm sa ki dokter ti apel lafoli? Ki i ti pou fer? Apel Mimi? Dir li? Mimi ti pou ankoler. I ti pou konnen ki i ti get li par trou. I ti pou fase avek li. I ti pou perdi tou konfyans. Me Mimi ti son zanmi. Les li si lannmen i ti kit li. I pa ti pou kapab dormi e kit son zanmi dan sa la.

Mimi ti avans kot lili me msye pa ti fer okenn zar. Ti drol. Menm letan i ti tann lavwa Tazi, “Mimi, mon ser, vin en pti moman!”

“Ar wi sa Tazi,” Mimi ti mangonnen. “La pa lot ki i zalou! I fek ganny sa ki pour li taler. Zot we!” Me i ti dir for, “Koze mon a tande!”

“Non.” Tazi ti ensiste. “Sa i zis pour ou zorey. Vini, mon pa pou tard ou.”

Mimi ti reser son kimono, met son savat latwal e travers lot kote. “Tazi! Ou konnen mon annan kliyan! Ki sa kalite zwe?”

“Sa pa en zwe, Mimi mon ser! Sa i serye. Sansan zanmen mon ti pou fatig ou!”

“Ki annan? Dir mwan! Mon pa kapab kit sa zonm laba pour mwan vin asiz kot ou!”

“Sanmenm sa ki mon oule dir ou. Sa zonm pa kapab reste isi. En konan ki ou’n anmennen.”

“Tazi gete!” Mimi ti reponn. “Ou oule dir mwan ou zalou ziska sa degre. Kote ou’n war sa? Ou pa’n ni menm vin lot kote?”

“Mimi eskiz mwan akoz mon en pe endiskre. Me zis get sa. Avans isi.”

Mimi ti avans kot Tazi ti’n endik li, sa pti trou dan klwazon. I ti plak son lizye avek sa pti trou dan plans. Ar wi! Sa ki i ti war ti fer Ii tranble. Zafer ti pe asiz lo son lili. Ki i ti pou fer? “Tazi ki mon pou fer?” I ti demann son bon dalon. “Fodre mon fer en plan vitman.”

Apre detrwa segonn Tazi ti mont avek en solisyon. “Mimi, ou a retoum lot kote. En pti moman apre mon pou apel ou. Mon asir ou ki keksoz pou mars byen.”

“Tazi, si ou ti mon zanmi zanmen ou ti pou dir mwan retourn laba. Mon per Tazi! Ou konpran? Mon per!”

En tapaz sat dan pisan li deor! Tazi ek Mimi ti ser kanmarad pandan ki sa piyanter ti antre partou. Lot kote en drol lavwa ti pe apel Mimi. Mimi ti reponn an tranblan, “Mon pe vi ni seri. Mon pe koz en pti kou avek Tazi. Mon pa pou tarde.”

“Ale vit!” Tazi ti dir avek Mimi. “Taler nou tou le de nou pou pri parey Iera dan pyez.”

Mimi ti anmar leker. I ti retourn kot li. Ti annan en loder lanmor dan son lasanm – loder en melanz fler avek en loder dekonpozisyon. Zonm ti’n alonze lo lili pe esper li.

“Zis en pti moman,” Mimi ti dir. I ti ouver en pti lanmal. Ladan ti annan en lakrwa atase avek en zepeng. I ti atas anndan son robdesanm.

Dan son leker Mimi ti pe priye ki ler Tazi pou kriy li. Pa zis sa: Eski Tazi ti pou reisi fer sa bebet ale ? I ti sir ki si Tazi ti tarde, en katastrof ti pou arive. Son vant ti gronnyen. I ti sey fer lapriyer dan son leker. Me ti telman lontan i pa ti’n priye ki i pa ti konnen ki pou dir Bondye. Si i ti annan en pe delo beni i ti a kapab fann en pe partou, me i ti’n arete al legliz. I pa ti fye avans kot lili. I ti al kot reso e met ankor enn de bout sarbon ladan. Avek en morso kartron i ti vant lasann, zis pour gard li okipe. Zot akoz Tazi pa ti kriye? Ki i ti pe fer? Plito i ti’n ekout son manman. Si i ti’n fer sa zanmen i ti pou dan sa la. I ti anvi kriye, bos son seve. Tansyon ti pe monte. I pa ti konnen ziska ki ler i ti pou kapab tenir.

Pandan sa letan Tazi ti pe swiv tou mouvman Mimi par trou. I pa ti oule kriy li deswit akoz i ti fek sorti kot li e sa ti kapab kre problenm. I ti espere ki Mimi pa dekontrole. Pov Mimi! I ti obzerv li letan i pe vant dife.Tazi ti kriy li zis koman i ti fini kot dife. “Mimi, vini mon ser!”

Mimi ti sote menm si i ti pe espere.

“Tazi, ase fatig mwan! Ki annan ankor? Koz for mon a tande!”

Lavwa Tazi ti vin pli for sa voyaz

“Mon ser ou pa war ki pe pase deor? Tir ou latet par lafnet, gete. Dife dan simityer!”

Ti fer en laklerte parey zekler. En nespes koze dan nennen ti rezonnen. “Ar wi! Zot in bril tou mon pake!” Pa konnen kote sa zafer ti pase. Ti napa en latras.

Tazi ki ti ankor pe get par trou ti realize ki degre zot ti’n sanse. Mimi li ti dan en leta sok. I ti debout ebete. Ler i ti realize ki zafer ti’n fini pase i ti tay lot kote kot son zanmi, malad avek lafreyer. Zot ti may kanmarad e ser for. E zot pa ti konnen lekel ki ti pli per. Eski sa bebet ti pou retournen la ki i ti ‘n dekouver ki pa ti vre? Ki zot ti pou fer? Zot ti sey deside ansanm ki zot ti pou fer. Ti annan detrwa bout lansan zot ti’n aste kot malbar. Tanzantan zot ti bril sa pour sas movezer. Tazi ti alim son reso li osi. Zot ti partaz lansan an de. Ti annan bann petal roz sek dan en soukoup lo latab. Sa osi ti ganny brile dan de reso ansanm avek lansan.

Gradyelman lafreser ti disparet. Loder lansan melanze ek parfen roz ti ranpli lakaz. Ti dan de er bomaten. Tazi zot de Mimi ti asize Io lili Tazi. Mimi ti pe mazinen si i pou dormi ankor lo sa ki pour Ii. I ti pou bezwen aste en lot lili ek matla avek sa larzan ki ti rar parey korn lisyen. Tazi ti remarke ki son zanmi ti enkyet. I ti kontan Mimi, menm si lapliparditan zot ti an konpetisyon. I ti sagren pour Mimi. I ti riske perdi son zanmi. Sak pti mouvman deor ti fer sa de zanmi tranble, lisyen dan lari, sat lo twa lakaz, menm son grele ki zot ti telman abitye avek. Zot tou le de zot ti mazin menm keksoz. Ki kantite letan sa lafreyer ti pou dire, en semenn? En mwan? En an? Toultan? Akoz zot de, pa en lot? Kestyon ki nou toultan demande ler en maler i ariv nou me zanmen ler boner i montre nou son figir.

Letan ti pas telman dousman. Pandil dan salon ti sonn sak ler ek demi er. Ti kat er ler ti paret annan en sanzman lwen dan letan. Zot ti tann loraz dan lwen. Petet lapli ti pou tonbe. Ti vre akoz grenwir ti larg zot lanmizik pour anons son larive. Loraz ti vin pli for. Lakaz ti tranble. Zekler ti desir lannwit.

Tazi ek Mimi ti alonze lo lili, koste avek kamnarad, kouver anba en sel tapi, zanmi pour lavi dan boner koman dan maler. Bondye ti larg son lapli pour lav son later e fer tou keksoz nef.