BRAV TIZAN

Victor Mussard

En zour ti annan en zonm ki ti annan en garson ki ti apel Tizan. Sa zonm ti en saser e i ti al fer lasas touzour avek son fles. Alor en zour i apel Tizan e i montre li en montanny ek son fles i dir li : “Mon piti, ou vwar sa montanny ki laba.” E i montre li son fles i dir li : “Pa tous sa fles parski i a kapab ariv ou maler.”

Papa Tizan i ariv mor. Tizan ek son manman i tonm dan lanmizer. Tizan i veye ler son manman pa la i vol fles. Me ler son manman i arive i vwar ki fles pa la i konmans trakase parski i konnen ki Tizan ki’n pran sa fles e i’n al kot sa montanny ki son papa ti anpes li ale e ki i’n ariv ketsoz.

Ler Tizan ti’n ariv lo latet montanny i get anba dan laplenn i vwar ketsoz ki pe bouze. Tizan i desann e ler i arive i vwar trwa zannimo : leg, lyon ek fourmi. Sa trwa zannimo ti’n ganny en bef e zot ti pe partaze me ti en partaz ki pa tonm ditou dakor. Zot ti pe fer en dispit e ler zot ti vwar Tizan zot ti kriy li. Me brav Tizan ler i ti trouv lyon i kal deryer i pa ti tro tro fye. Me apre i ti koste e i ti donn sakenn en par egal. I donn tou lezo fourmi e i dir li kan i a fini i a ganny sanmenm sa pour fer son lakaz. I donn lyon tou lavyann e leg tou trip. Zot tou zot ti byen kontan ek partaz. Zot ti fer Tizan en ti kado sakenn. Fourmi ti donn li en bout son lapat, lyon en son pwal e leg en son plim e Tizan ti byen satisfe e apre i kontinyen son semen.

Letan i pe ale i vwar en lavil ki annan paviyon an nwar e li Tizan i oule konnen ki i annan. I antre dan lavil e i konmans enformen. Bann zabitan i dir li fiy lerwa in disparet depi kenz an dan en pei ki selman zean ki reste. Alor Tizan i demann lapermisyon lerwa pour li al sers son fiy e lerwa ti byen kontan, i dir ek Tizan : “Si mon fiy i retournen mon a fer li marye ek ou.” Tizan i ale ale ale. I get son plim leg e i dir : “Par laverti mon plim leg mon oule ki mon a vin en leg” e i vin en leg. I apoz zis lo lafenet sa prenses e ler prenses i vwar Tizan i per. Me Tizan i dir li : “Pa bezwen per, mon a vin sers ou.” Me prenses i dir zean pre pour arive e ki si i zwenn li la i pou manz li vivan. Alor Tizan i pran son lapat fourmi e i dir : “Par laverti mon lapat fourmi mon oule ki mon a vin en fourmi.”

Deswit i ti vin en fourmi e i kol ek lapat lili. Zean i arive. Konman prenses i vwar zean i konmans plere. Zean i demann li: “Akoz ki ou plere, mon fiy ? I annan dimoun ki’n vin kot mwan akoz mon santi loder lavyann fre.” Prenses i reponn an tranblan: “Non…selman mon per !” Zean i demann li ankor : “Be akoz ki ou per?” Prenses i dir : “Mon per pangar kan ou pa la dimoun i a vin pran mwan.” Zean i riye : “Pour dimoun tir ou la fodre mon a mor. Me pour touy mwan fodre zot al fer lager avek en tig blan. Ler zot a’n touy sa tig fodre ki zot ava ouver son vant, dan son vant zot a trouv en kabri, dan vant sa kabri zot a trouv en pizon e dan vant sa pizon zot a trouv en dizef. E fodre pran sa dizef kas lo mon fron e mon lakaz pou vin mon latonm. Ou vwar mannyer i difisil avan ki mon mor.” Prezan zean i dir ek prenses ki i bezwen ale.

Konman i ale Tizan i vin kot prenses e i dir ek li ler zean i retournen kraz en boutey met dan son manze parski ler i a retournen i pou deza konmans malad. Tizan par laverti son plim leg i ariv dan pei tig blan. Sa landrwa kot tig ti ete dan bor sato lerwa ki ti antoure avek miray e baro ti reste touzour ferme. Tizan i vwar en gard e i demann li lapermisyon pour li al touy tig. Lerwa ti donn li lapermisyon e Tizan ti osi demann li en zonm e zot ti donn li enn ki fou e i ti apel Zozef-Fou. Tizan i dir ek Zozef-Fou: “Mwan mon pou sanz an en lyon e letan mon ava pe fer lager ek tig blan anvoy manze dan mon lagel e dan lagel tig anvoy gale. Tizan ek Zozef-Fou i al kot tig blan. Tig i vwar lyon. I ti’n fini ankoler. Sa de bebet i konmans lager e Zozef-Fou i konmans fer son devwar. I nouri lyon e i donn tig gale. Alafen lyon i touy tig, i ouver son vant i vwar kabri, i ouver kabri e pizon i ale. Tizan i dir : “Par laverti mon plim leg mon oule ki mon a atrap sa pizon” e i ganny li osi. I ouver vant pizon e i pran dizef. Tizan ek Zozef-Fou zot retourn kot lerwa ki ti byen kontan. Alor Tizan i retourn dan pei zean. Ler i arive zean in deza malad, nek Tizan i pran sa dizef i kas lo fron zean ki mor en sel kou e son lakaz osi i pran dife.

Alor Tizan i anvoy konmisyon kot lerwa pour anvoy sers zot e en bato ti vini me par malsans kaptenn sa bato ti en prens e ler i vwar sa prenses i fou, i oule marye ek sa fiy li menm e i pous Tizan dan lanmer. Me par laverti son lapat fourmi i ti sanz an fourmi e i ti kol ek fon bato. Bann zonm ti kriye pourdir i annan en zonm ki’n tonm dan delo. Kaptenn pa ni antren.

Ler zot arive papa prenses ti byen kontan me ler kaptenn i rakont li pourdir Tizan i tonm dan lanmer i ti byen sagren. Me Zozef-Fou ti konmans rakont bann serviter pourdir kaptenn ki’n zet Tizan dan delo e pandan sa letan maryaz prenses ek kaptenn ti’n pe konmans fer. Tizan ler maryaz ti pe al beni i pase e lerwa i vwar li e la Tizan i rakont lerwa ki mannyer kaptenn ti fer ek li. Lerwa ti byen ankoler. Nek i fer apel prens e i dir li: “Prens, si en dimoun i oule touy son kanmarad pour li ganny son plas ki fodre fer ek li ?” Prens i dir : “Mon rwa sa i fasil, nek ou pran li, ou anmar li lo de seval ki a desir li an de.” Nek lerwa i dir li: “Ou’n pronons ou prop kondannasyon” e solda ti vin pran li e zot fer parey i ti dir.

Tizan li i marye avek prenses. Zozef-Fou ti vin son serviter.

Source :

Creolica, 26 juin 2007 – Sirandann ! Zanbaget ! Contes créoles des Seychelles, Sibylle Kriegel & Ingrid Neumann-Holzschuh (eds). Collectés par A. Bollée et I. Neumann-Holzschuh. pp. 18-20