BOURBONNEN

(M. Raymond Hoarau)

Kont ek Lezann Vol 1., (1990) Lenstiti Kreol, Lans-O-Pen, pp. 91-99

Alors en zour ti annan en Bourbonnen ki ti reste avek son madanm dan en pti lakaz dan en lafore. En zour Bourbonnen ti leve e i ti war ki son poto lakwizin ti’n kase. I ti dir avek son madanm,

“Mon fanm, mon pe al en kou o bor fore, mon ava al koup en brans pour fer poto.”

Alors Bourbonnen ti pran son lars e ti ale. Byento i ti zwenn en pyedibwa ki i ti mazinen ti touskifo, alors i ti monte. I ti swazir en brans e komans koupe, me telman i ti bet i ti asiz lo sa menm bout ki i ti pe koupe san realize. Letan i ti pe koupe en per ti pase. I ti tann tapaz lars e get anler. Ler i ti war Bourbonnen i ti dir,

“E ben, Msye Bourbonnen, ou pou tonbe la.”

Bourbonnen ti riye e dir, “Mon Per be zanmen, toultan mon fer koumsanmenm.”

Alors Per ti les li e i ti kontinyen son semen. Pa mank lekou, brans ki Bourbonnen ti lo la ti krake e tonbe e Bourbonnen ti tonm ansanm ater. ‘Waya!’ Vit, i ti leve e taye. Erezman i pa ti’n ganny dimal. Per pa ti ankor ariv lwen. Bourbonnen ti kriy li e dir,

“Mon Per, Mon Per!”

Per ti vire e reponn,

“Ki i annan Msye Bourbonnen?”

“Mon Per ou konnen sa ki ou’n dir mwan vre in arive?”

Per ti dir, “Be mon pa i ti dir ou Msye Bourbonnen?”

“Mon Per alors dir mwan kan mon pou mor.”

Per ki ti’n war ki sa ti en gran bet, i ti dir, “Zour ou war en bren difil rouz lo ou lanmans palto, konnen ou’n mor.”

La Bourbonnen ti remersye Per e i ti al kot li.

Detrwa zour apre ler Bourbonnen ti pe al lanmes en bomaten senk er, i ti al rod son palto blan dan larmwanr. Ler i ti tire i ti war en bren difil rouz lo la. Deswit i ti kriye,

“Mon fanm, mon fanm mon’n mor.”

Son fanm ti vini an tayan e dir,

“Be Bourbonnen ou pa ase bet, ou’n mor selman ou koze?”

Bourbonnen ti ensiste,

‘Wi, wi Per ki ti dir mwan. I ti dir mwan mon pou tonbe lo brans dibwa e mon ti tonbe. I ti dir mwan zour mon trouv en bren difil rouz lo mon palto konnen mon’n mor. Degaze, al anter mwan, me met mwan an debout e kit mon latet deor.” Alors son fanm ki ti war ki i ti en pov boufon ti fer en zonm fouy en trou e i ti anter Bourbonnen an kitan son latet deor.

Dan pti sis er diswar, fanm ti al anndan e Bourbonnen ti reste deor menm dan son trou. Apepre dan wit er ti pas set voler, pe al rod landrwa pour vole. Enn dan son pase, son ledwa lipye ti tap avek labous Bourbonnen. Bourbonnen ti morde. Voler ti kriye,

“E kisisa ki mord mwan?”

Bourbonnen ti reponn, “Mwan sa!”

“Ki ou?” sa voler ti demande.

“Mwan en voler, mon aste voler, mon vann voler. Deter mwan mon a mars avek ou.”

Alors bann voler ti deter Bourbonnen e zot ti ale. Zot ti marse lannwit antye.

Lo granmaten zot ti apros pale en lerwa. Bourbonnen ti konnen ki bann lerwa ti kontan aste zonm pour travay. Alors i ti dir avek bann voler,

“Bann zanmi, i annan en lerwa ki aste nenport kwa. Ki nou annan pour vann?”

“Nou annan sakenn nou mouswar,” zot ti reponn.

Bourbonnen ti pran le set mouswar e ti al dan lakour lerwa kot i ti demande pour war li. I ti dir avek lerwa,

“Mon rwa mon annan set zonm deor pour vann.”

Lerwa ti demande, “Be zot dakor?”

“Wi”, Bourbonnen ti reponn, “mon a fer ou war ki zot dakor.” Koman i ti dir sa nek Bourbonnen ti lev sa set mouswar ankor pour montre bann voler ki ti pe esper li e i ti kriye, “Ki mon a fer? Mon a vann?”

Salerla bann voler ti’n krwar ki Bourbonnen ti ape demann zot si i a vann mouswar alors zot tou zot ti kriy, “Wi, vann!”

Bourbonnen ti demande, “Tou le set?”

Bann voler ti reponn, “Wi, tou le set!”

Bourbonnen ti fer zot siny avek lerwa, “O.K. “, e apre i ti vire, “Ou war mon rwa? Zot byen dakor.”

Alors deswit lerwa ti donn lord solda pour ouver baro e fer le set zonm antre. I ti donn Bourbonnen senk san roupi pour sak zonm e Bourbonnen ti ale byen kontan. Sa set voler ti’n konpran alors ki Bourbonnen ti’n anbet zot e zot ti sey kriye e fer tapaz me lerwa ti fer met zot dan kaso. La zot ti travay kot lerwa pour apepre senk an. Alafen sa letan zot ti’n travay byen alors lerwa ti dir,

“Zot in byen travay alors mon a les zot ale e mon a donn zot osi sakenn senk san roupi.” Le set voler ti ale e koman zot ti sot deor zot ti dir, “Bourbonnen ou a pour nou ozordi.”

Bourbonnen kot ti ete se li ti’n tann nouvel ki lerwa ti’n larg set zonm e i ti konnen ki ti bezwen son set swadizan dalon ki zot letan ti’n fini. I ti dir avek son fanm,

“Mon fanm sa set boug pou vin touy mwan. Pran mon gran baton, sa ki parey sa ki Bard ti anmennen lontan la, e met obor mon kannape. Mwan mon pou fer krwar mon’n mor. Ler ou war sa set voler vini, kriy lasasen dir mon’n mor.”

Relman Bourbonnen ti tonm vant anler lo son pti kannape an fezan krwar in mor avek son baton lanmenm ater obor. Fanm ti war voler pe vini e i ti komanse, “Ar wi zot. Mon pov mari in perdi lavi. Ki mon pou fer?”

Voler kot zot ti pe vini ti tann lasasen e zot ti aprose. Enn ti dir, “Bonzour, Madanm.”

Madanm Bourbonnen ankor an pleran ti reponn, “Ar Msye, bonzour Msye. Ki ou kapab fer pour mwan?”

“Ki mon kapab fer pour ou?” sa zonm ti reponn, “Oli Bourbonnen?”

“Ar Msye i lanmenm, in mor. Antre zot a war li. Mon pa ni konnen ki mon pou fer.”

Sef voler ti antre. I ti dir, “Madanm kantmenm in mor i dwa nou,” e avek sa i ti pran baton ki ti ater e donn Bourbonnen en bon kou. Bourbonnen ti sote. I ti kriye,

“Mersi, mersi” apre i ti dir avek son madanm, “Mon fanm, baton lev lanmor i lanmenm ou pa fer nanryen ou les etranze vin ley mwan, mersi msye mersi.”

Voler ti reste bet. Ki sa kalite baton ki lev lanmor?”

Fanm ti kontinyen, “Ar, Bourbonnen mon’n telman trakase ki mon’n bliy baton net net net.”

Sef voler i ekoute. I ti dir, “Bourbonnen vann mwan sa baton.”

Deswit Bourbonnen ti reponn, “Be zanmen, plito mon donn ou mon lavi.”

“Bourbonnen nou a donn ou nou senk san roupi sakenn, vann nou.”

Bourbonnen ti fer sanblan i kalkile e finalman i ti dir, “Mon a vann zot mon baton lo en kondisyon. Si i ariv zot kek keksoz, retourn avek e mon a rann zot zot larzan.”

Sef voler ti dakor e apre ki i ti’n donn Bourbonnen trwa mil senk san roupi zot ti ale byen fyer avek zot baton ki lev lanmor. Zot tou zot ti pe mazinen ki kantite larzan zot ti a kapab fer avek sa baton.

Byento zot ti ariv dan en lavil. Partou zot ti war ki paviyon ti an bern. Sef voler ti demann avek en solda ki ti pe arive e solda ti dir li ki fiy Mer lavil ti’n fek mor. Sef voler ti dir, “Ar be sa pa difisil. Fer nou war li.”

Alors solda ti fer zot antre kot fiy ti’n ekspoze. Ti annan en kantite dimoun enkli Mer li menm. Sef voler ti pran baton e donn en kou lo vant. Nanryen pa ti arive. Dimoun ti’n reste ebete. Dezyenm voler ti aras sef baton an dizan, “E ou la pa koumsa ou ti tap Bourbonnen. Vir lot bout” e i ti tape ‘boum’. Napa nanryen menm. Mer ti komans ankoler. Trwazyenm voler, katriyenm, tou ti tape ziska vant ti pros pour desire me fiy pa ti leve menm. Zot nek Mer ti leve, soufle e dan en pti moman solda ti arive e zet tou le set zonm dan kaso pour fer zot travay.

Ler ti’n ariv letan pour zot sorti, Mer ti donn zot sakenn senk san roupi pour lapenn zot ti’n byen travay e les zot ale. Zot ti dir, “Bourbonnen fer ou sir, sa voyaz napa manke. Ou’n tronp nou de fwa, trwazyenm fwa ou ki pou gannyen.”

Salerla Bourbonnen lontan ti’n ganny nouvel e i ti pe riye ler i ti mazin betiz sa set voler. I ti’n fini kalkile ki pou fer akoz i ti konnen ki zansla ti pe sorti pour li. I ti al dan lanmal e tir en vye sapo, sa ki zot apel lapo kay. Ti parey en sapo lapay me ti pli dir. Bourbonnen ti pran en larzan ki i ti’n ranmase e i ti diriz kot en pti lotel. I ti al war met lotel e dir,

“Msye mon pou donn ou en larzan. I annan set mon kanmarad ki ape vin bwar. Ler mon larzan i fini, fer mwan en pti siny, mwan mon a montre ou mon sapo e dir, “Mon pey ou an loner mon vye sapo. Ou ou a dir, “Mersi byen Msye.”

Met lotel ti dakor e i ti pran larzan. Bourbonnen ti ale. I ti vir vire dan semen ziska i ti war sa set voler pe vini. Koman zot ti war li sef ti dir, “Bourbonnen nou a fini ozordi.” Bourbonnen ti pe esper sanmenm. Nek i ti demande, “Premye keksoz, oli mon baton?”

Sef ti reponn, “Mon’n kit laba, ou’n fer nou ganny dezagreman avek.”

Bourbonnen ti dir, “Mon ti dir zot retourn avek. Akoz zot pa’n fer li?”

Voler ti’n fini per. Sef ti dir, “Be nou ava ….” me Bourbonnen ti koup zot konversasyon pour dir,

“Pa fer nanryen aprezan. Antre nou a bwar en pti keksoz an-sanm.”

Zot ti dakor, byen soulaze ki Bourbonnen pa ti’n dir plis lo zafer baton e komans bwar. Zot ti pran wiski, brenndi, wiski, brenndi enn apre lot ziska zot ti’n bon degre. Bourbonnen pa ti bwar bokou e i ti les zot anmize. Ler ti’n dan apepre set er diswar met lotel ti vini e lev lanmen avek Bourbonnen. Bourbonnen ti dir,

“Ar be bann dalon, annou ale e demen nou a vin ankor.” Le set voler ti leve. Apenn si zot ti kapab marse.

“O.K., Msye Bourbonnen. Bourbonnen ti pas par devan zot. Zot ti pe esper li peye pour ale. Me zis zot ti war li lev son vye sapo avek met lotel e dir,

“Mon pey ou an loner mon vye sapo.”

Imedyatman met lotel ti dir, “Mersi byen Msye.”

Bann voler ti get kanmarad e dir, “Get sa boug ou menm, in pey avek sa vye sapo.” Koman zot ti tonm deor sef voler ti dir, “Bourbonnen vann mwan sa sapo.” I ti pe mazinen ki kantite keksoz zot ti a kapab gannyen avek.

Me Bourbonnen ti reponn, “Be zanmen. Oli baton? Pa zot in perdi? La zot pou fer parey avek mon sapo. Ditou, mon pa pou donn zot mon sapo.”

Sef voler ti ensiste, “Bourbonnen nou a donn ou sakenn senk san roupi.” Apre en bon pe letan, Bourbonnen ti dir,

“Dakor. Mon a vann zot, me selman si i ariv zot keksoz, retourn avek e mon a rann zot zot larzan, parske sa i mon lavi.”

“Wi Bourbonnen” e byen satisfe zot ti pey li, pran sapo e ale.

Depi sa zour sa set voler ti enstal zot dan en lotel. Zot ti manze bwar e diverti kontan e lo bout en semenn zot depans ti’n desot dis mil roupi. Met lotel ki ti krwar ki zot ti set “gentlemen” ti les zot. I ti dir ki zot pa pou vol li. Ti’n ariv en ler ki sa set voler ti’n fatige avek sa lavi diverti e ti demann zot al vole, alors sef ti al kot me lotel e dir,

“Msye, nou pe ale. Mon pey ou an loner mon vye sapo” e i ti montre met lotel sa vye sapo ki i ti’n aste avek Bourbonnen.

Met lotel ti dir, “Pardon?”

Voler ti repete, “Mon pey ou an loner mon vye sapo.”

Zot met lotel ti’n fin ankoler. I ti kriye, “Ki sa? Sa vye zafer? Sa vye sapo? Be sa pa vo ni menm senkant sou.”

“Non Msye,” voler ti dir, “Mon pey ou an loner mon vye sapo. ” Me sa ti fer met lotel pli ankoler ankor. I ti teleform gard ki ti atrap tou le set e ankor en fwa zet zot dan kaso. Zot ti kondann de trwa mwan prizon.

Kan zot letan ti’n fmi, Bourbonnen osi ti’n pare pour zot. I ti rod son razwar gran kouto e fit li byen. Dan son laport lasanm i ti koup en pti kare e apre i ti dir avek son madanm,

“Mon fanm ler sa bann zonm i vini, dir zot vin war mwan enn par enn akoz mon tre tre okipe. Dir zot met zis zot latet par sa pti kare.” Fanm ti dakor e Bourbonnen ti al tak li dan son lasanm avek son razwar. Byento voler ti arive. Avek lakoler sef ti demande,

Bourbonnen?”

Madanm Bourbonnen ti reponn, “Msye pa fer tapaz. La i okipe en kantite. Si zot oule war li al enn par enn e get li par sa pti kare.”

Sef voler ti al premye. Koman i ti met latet par pti kare, Bourbonnen ti pran son razwar e ti koup son bout nennen. Zot sef voler ti tir latet deswit e met son de lanmen kot son nennen. Son barn kanmarad ler ti war li pase an tayan ti demann li, “Ki i annan?” Me pov li pa ti kapab koz byen vi ki nennen ti’n koupe alors i ti mangonnen, “Al war ou a konnen.” Alors dezyenm ti ale.

“Yenk!” li osi ti ganny koup nennen konman i ti prezant latet. Letan i ti sorti, lanmen lo nennen lezot ti dir antre zot, “Dwatet in donn zot keksoz e zot in kasyet dan labous pour nou pa war. Annou ale nou osi.” Trwazyenm ti ale e ler i ti retournen an tayan, leres kat ti war en gout disan avek son lanmen e setaki ti dir, “Pa mwan, mon lipye anmenn mwan” e zot ti taye. Dan zot pe degaze zot pa ti war en gran transe e tou le kat ti tonbe e kas likou. Depi sa zour Bourbonnen ti viv byen san okenn traka sa set voler e zot ti nepli konsider li en zonm bet.