BOUKE ROZ EDWAR EK TORO

Alor en zour ti trouve annan en rwa, ti annan trwa fiy. Alor sa fiy, premye son papa I demann li koman I kontan li, I dir:

• Papa mon kontan ou koman disik.

Dezienm I dir:

• Papa mon kontan ou koman dimyel.

Demann twazienm I dir:

• Papa mon kontan ou koman disel. Alor trwa fiy, alor son papa pa ti kontan sa enn ki kontan li koman disel. Zot tou zot ti gnor sa enn dernyen ki ti kontan son papa parey disel.

Alor enn fwa son papa pou al dan en pei. I al kot premye… kot premye piti, I dir;

• Ma fiy ki mon anmennen pour ou?

I dir :

• Anmenn en zoli rob pour mwan. Pli zoli ki ou trouve, I annan.

I demann dezienm, I dir:

• Papa anmenn enn zoli bizou.

I demann trwazienm, I dir:

• Papa anmenn mwan en bouke rozedwar.

Alor papa I anbarke I ale. Ler in ale, in rode, in gangnen tou sa de. In gangn rob pour premye, in gangn pour dezienm. I nonmen, I pa ankor gangnen pour trwazienm. Dan marse I trouv en lale, I sivre sa lale. I trouv en kantite fler, I antre, I trouv rozedwar kantite. I war en gro toro dan laplenn. I ariv kot sa sato I war en gro toro, i ariv kot sa sato I kriye:

• Met sato, bonzour mesye, bonzour madanme

Ndou!

• Bonswar,

Ndou!

• Anfen I war zis sa toro menm. Toro I get li, toro I manz son zerb menm.

I dir;

• Anfen ozordi mone ariv la, mon sa pour mon fiy, mon lepok in arive pour mwan ale.

I vini, I koup en bouke. Personn pa dir li naryen, I pran son semen I ale.

Zour I arive ki i gangn en let. Ki komkwa in koup sa fler, fodre I war son met sa fler kot sa sato pandan wit zour.

Anfen I montre sa fiy, son dernyen fiy, sa ki kontan li koman disel I dir:

Get aksidan ki oune fer mwan fer.

Fiy I gete I dir:

• Papa mon ti dir ou anmenn sa, pa dir ou al vole, antouleka si I pou ariv en aksidan, plito mwan ava al laba kot in dir.

• I anna en zoli sato me mon pa’n war son met.

I dir;

• Papa mon ava ale.

• Toudmenm fiy I anbarke. I ariv kot sato, I war toro lanmenm. I antre I ariv anndann, I antre dan lakaz I kriy:

• – Bonzour…. Bonswar……

• Douk! Trwazer I sonnen I war dite pare, I pa ti efreye. I asize I bwar dite. Osito I sorti I asize I war lo latab tou zafer edmi I bate I manze.

• Dan never toro in antre. I war toro I ale, I al dan en basen I bengnen. Toro I vini I tonm obor li I war lili in pare. I war toro I tonm lanmenm obor lili ater obor lili. Konmdi marmay parey andikape. Tonbe I dormi. I koze li tousel I dir:

• Lekel mon met isi, kine dir mwan vine isi.

Toro pa pran ka ek li. Obout wit zour I gangn en let ki sorti kot son ser konmkwa son ser pou marye. I pa konnen ek lekel pou dir. Plere . Toro demann li:

Kine ariv ou?

I dir:

• Mone gagn en let mon ser pou marye.

I dir:

• Ou pou al kot ou ser. Fer sir ki ou pe fer, ekout byen sa ki mon pe dir ou. (I dir) al laba pran lenz ki ou oule. La lakle tel landrwa pran ouver pran, pran tou ou keksoz. Selman de zour apre fodre ou tournen. Ekout mon parol ki mon pou dir ou. Ler ou ariv laba ou pou zwenn en pake agogo. Sa bann agogo pou sikann ou. Ler ou a tann mwan kriy premye kou dan minui, ekout byen. Ler ki mon kriy dezienm kou, ler ki mon kriy twazienm kou pou obor peron ou papa, dir “papa,voila mon amand toreau est arrive”. Dir pou ou delivre mwan. Pa konpran menm.

I ale. Toro I kriye ler nariv minui. Kriye dan dezer bomaten. Ler I ariv dan katrer toro I kriy deryen kou, bann zenn I dir ek li:

• Dir papa voila mon gro toro.

• Pa dir mon aman toro I dir:

• – voila mon gros toreau est arive.

• Toro I antre anndan I fer fann kler partou. Briz a bati… toro I pran son simen I ale. Ki ou a fer bezwen tourn ankor. I per sa bebet I a vine manz li. I al ankor I ariv se li. Sa ti fiansay premye . La prezan pou vine maryaz. Pare pour maryaz. Toro I dir ankor parey. I ale.

I fer parey menm ankor. I pa dir “ Papa voila mon amand toreau est arrive”. Papa la mon gro toro et arive”. Agogo pe mont son resor. Agogo in demon. Toro I fer fann kler menm anndan ankor. A trwazienm fwa, maryaz in fini, prezan pour tourdnos. Desann pour fer tourdnos. Toro I dir ek li:

• I fer trwazienm fwa.

Toudmenm I asize I fer son rezon. Toro I kriye dan minui. Dan dezer toro I kriye, I ekout byen menm. I pa bwar ditou osi. I pa pran ka osi ek zenn zan. Degre agogo in terib. Agogo in war laviann fre. Ler Katrer I sonnen toro I kriye. I dir:

• Papa voila mon amand toreau est arive.

• Sa resanz, sa toro ki ti lo li, ti en prens sa toro, tine gangn malediksyon ek en lanz. I degaze sa fiy in dir:

“Papa voila mon amand toreau est arrive”, in aranz li dan son mannyer. Sa lewa I tay anndan pour li pran son resanz, son gran resanz bwaver pour mete, I manke resanz, I get anba lili I war en potsanm, pou met son kas, bann lewa lontan ti servi kas. I bag sanmennm sa potsanm. I get kote laba I pa war son resanz kot I ete, I ti annan son kwizinyen ti met lenz anpandan lakwizin, I bag sanmenm, palto kwizinyen ek kanson kwiziyen I anbarke I al zwenn sa prens. In klate , fann kler partou osi, pa war personn ankor.

Mon pas laba mon dir sa fiy, oune mal fer oune byen fer?

I dir mwan:

• Mon byen fer, mon bann ser kine mal fer. Mon kontan mon papa parey disel pou li al rod mon byen pou anmenn dan lakour.

• Tap mon en koud pye mon tonm la.