Borny Ek Bosi

Alors en fwa, ti annan de frer. Enn ti apel Borny, lot Bosi. Borny ti pli gran frer e i pa ti war kler. Bosi, dezyenm frer, ti annan en gro bos lo son ledo. En zour, Borny ti dir avek Bosi ki ti war kler,

“Annou al marse partou dan bwa. Nou ava al rod en plas travay. Nou pti larzan pe fini. Ki mannyer nou pou fer pour nou viv? Annou!”

Bosi ti dakor e zot ti ale. Zot ti mars pour aprosan de san met. Bosi i dir,

“Mon frer, mon war en lakord ater.”

Borny i dir,

“Anmase mon frer, i ava servi nou en zour”

Bosi i anmase. Zot mars ankor trwa san pye distans. Bosi i dir avek Borny,

“Mon war en vye bourik.”

Borny i dir li,

“Pran sa lakord, pas dan son likou. Mon pa ti dir ou ki nou pou bezwen sa lakord, e ben?”

Bosi ti vin ankoler e i ti dir,

“Akfer sa vye bourik lagal, zis pour fatig mwan. Ou pa war kler, mon pe anmenn ou lo mon ledo e ou trouv ankor louvraz pour donn mwan.”

Toudmenm, i koste kot sa bourik pour atrap li. Bourik i kriye. Zot ti en pe per me toudmenm Bosi i atrap li, i anmenn li avek zot. Kat san pye pli lwen, Bosi i dir avek Borny,

“Mon war en kote barik.”

Borny i dir,

“Mon frer anmase. I ava servi nou en zour.”

Bosi byen ankoler, i dir,

“Bebi, ou pa war kler. Mon pe anmenn ou, la ou oule ki mon anmenn sa kote barik osi. Taler mon ava tir tou ater lanmenm, avek ou barik ek ou bourik. Ou pe byen agas dimoun!”

Toudmenm apre sa pti dispit, Bosi i anmas sa kote barik, i met lo bourik e zot kontinyen zot larout. En pe pli lwen, Bosi i war en lot kote barik. I pa ti anvi dir son frer. Son frer pa ti war kler alor i pa ti war nanryen me toudmenm i ti dir,

“Mon frer, la mon trouv ankor sa lot kote barik avek son vye serk feray.”

Borny lo ledo son frer i dir,

“Mon frer, mon pli vye ki ou, zis mon pa war kler. Mon lesperans i pli for ki pour ou. Anmase, en zour i ava servi nou.”

Bosi i dir,

“Espere! Taler mon a fou ou en koudpwen dan ou lizye! Ou a war kler vitman. E ou a kapab anmenn tou ou bann kosonnyen ou menm!”

Me toudmenm, i anmas sa lot kote barik ek son vye feray, i met lo bourik e zot ale. Apre sa, zot ariv kot en gran lakaz letaz. Bosi i dir avek son frer,

“Mon’n war en gran lakaz e konmsi napa personn ladan. Annou al reste ladan!”

Borny ki pa war kler i dir,

“Pa bon al reste dan sa lakaz. Nou pa ni konnen si bebet ki reste la ouswa zako, zis ou dir mwan annou al reste dan sa lakaz san ki ou konnen.”

La zot dispit ankor e Bosi i dir,

“Si ou pa oule vin avek mwan dan sa lakaz, alor ou a reste lanmenm dan semen avek ou bann badinaz!”

Alor Borny pa oule ki son frer i kit li alor i al reste dan sa lakaz, dan son letaz anler. Borny en fwa ki i ariv laba i dir avek Bosi,

“Pran sa de kote barik, ranpli pour mwan e mont avek anler dan letaz kot nou pe reste. Dan enn met delo e dan lot met labou. Si dan trwa zour nou pa war personn vini, nou ava konnen ki napa personn ki pe servi sa lakaz, alor nou ava kontinyen reste ladan ziska nou lanmor. Nou ava zis esey travay pour nou viv.”

Bosi ti dakor e i dir,

“Wi.”

Zis de zour apre, alor ki zot ti pe esey dormi, zot tann minwi sonnen lo pandil anba. Letan ki zot zorey ti ankor lo alert, zot tann tapaz anba. Borny ti premye pour tande. Kanmen i ti aveg, son zorey ti tre fen. I arive parfwa, ou konnen, si en dimoun enn son organn pa fonksyonnen, son bann lezot organn i ordinerman fonksyonn pli byen ki pour bann dimoun ki normal. Alor Borny i antann tapaz anba e i dir avek Bosi,

“Mon frer, i annan dimoun anba, ekoute!”

“Wi mon frer, mon tande.”

Salerla anba, ti annan en gro lelou. Loulou i demande,

“Kisennla ki lao dan mon lakaz?”

Borny ek Bosi i reponn ansanm.

“Be ou ki ou ki anba?”

“Mwan lerwa loulou!”

“Lerwa bebet ki anler!”

“Si ou lerwa bebet, gat delo, mon ava konnen si i vre.”

“Si ou lerwa loulou, gat delo avan, mon ava war ater.”

Loulou i gat zis en pti morso. Prezan Borny ek Bosi anler, zot pran sa barik delo, zot larg anba. Zot! Sa lelou i taye depi Lans Bwalo ziska Lans Rwayal. I kalkil en gou e i dir,

“Vre lerwa bebet ki laba?”

Me toudmenm ou konn loulou! Zot abitye viv byen. I anmar leker e i retourn ankor kot sa lakaz letaz e i kriye,

“Si vre lerwa bebet ki lao, fer ou bezwen.”

Anler osi i dir,

“Si vre ou en loulou ki anba, fer ou bezwen mon ava gete.”

Loulou i fer zis en pti zafer. Lao zot pran sa lot kote barik ki annan labou ladan, zot larg anba. Loulou i kriy tou son lafors. I tay depi Lans Bwalo ziska Kaskad. I debout, i kalkil ankor,

“La si mon retournen zot ava manz mwan.”

Me i anmar leker ankor, i retournen e i dir,

“Si vre ou lerwa bebet ki la, kriy en kou, mon a war.”

Lao i reponn,

“Kriy avan mon a war si vre ou loulou.”

Loulou i kriye tou son lafors. La zot pran sa feray barik ki ti avek zot, zot sofe e zot bour dan lagel bourik. Bourik i kriye e i kontinyen koumsa pandan de-z-erdtan! Sa lelou i kriye. I tay depi Lans Bwalo ziska lavil. I kalkile,

“Si mon retournen, sa voyaz zot pou manz mwan.”

I pa retournen osi. Borny laba dan lakaz letaz i dir avek Bosi,

“Si pa ti mwan, kan mon koz avek ou, nou ti a’n ganny manze par loulou. Prezan annou desann nou ava ale. Si nou reste la, loulou i riske ganny lanvi retournen. I a riske dekouver lekel nou e sa i ava nou lafen. Annou ale.”

La zot ale. Zot mars ankor de san pye avek lakaz e ou konnen sa zour, zot lasans ti’n porte. Bosi i war en gro pake larzan dan santye. I dir avek Borny,

“Mon frer, mon’n anmas en kantite larzan, annou partaze.”

Bosi ki war kler, i konte.

“Enn pour ou, enn pour mwan, enn pour Bondye.”

Me Borny, kanmenm i pa war kler, i pa sourd. I pran sa bann larzan, i tate, e prezan i komans partaz en kou li menm.

“Sa pour mwan, sa pour ou, sa pour ki?”

“Pour Bondye.”

“Espere la! Gete la! Bondye pa dan nou zafer partaze!”

Zot ti komans lager akoz sa larzan.

Bosi i kont ankor.

“Sa pour ou, sa pour mwan, sa pour Bondye.”

I dir Borny konte.

“Sa pour ou, sa pour mwan, sa pour ki?”

“Bondye!”

Borny I donn Bosi en koudpwen lo son bos. Son bos i aplati deswit osi. Bosi i dir,

“Ayo! Ayo! Mon frer ou tap mwan! Ou a fer mwan dimal!”

E la Bosi, li osi i donn Borny en koudpwen dan son lizye. Borny i kriye.

“Aaa! Ou tap mwan dan mon lizye! Ou a kas li!”

Prezan ki zot dispit e maltret kanmarad voras. Me Borny i aprezan remarke ki i war kler e i dir,

“A gran mersi Bondye, la mon war kler!”

E prezan zot ti aret dispit deswit. La zot ti partaz byen zot larzan e zot ti kit en ta pour Bondye. La mon pas laba e mon dir avek zot,

“Donn mwan en pti lanmonnen!”

Zot bat mwan en koudpye, anvoy mwan Lans Bwalo.