Ble I blan

Ti anan en msié avek son madam. Alor I dir ek son madam koumsa zot pou al planté dan laforé. Son madam i dir li oui. Son madam, létan ki zot pankor al dan laforé I vir viré kot lakour . I marsé, kot I marsé I zouene tou zanimo. I pran I amasé. I fer en gran park I met ladan, I songnen. Tou zanimo ki I zouene létan I pé marsé, I amasé I met ladan I songnen meme. Son msié I dir ek li:

• “Mon madame, bé sa bane zanimo ki ou amasé ou songnen, bé en zour zot pa pou oulé manz nou zanfan”.

Son madam i dir li:

• “Non, zot pa pou manz nou zanfan parski noune met zot dan en gran park an fer ki zot pa pou kapab sorti”.

Relman en zour zanimo zot grosi. Sa madam I dir ek son zanfan:

• “Mon done zot en boule, pou zot zoué kot lakour. Mé Selman pa bézouen vine zoué kot sa park. Zoué touzour lameme dan lari. Nou pou sorti nou pou ale dan boi pou al rode lavi pou done zot”.

Bane marmay zot répone:

• Oui maman”.

Apré sa, msié et madam zot ale dan laforé pou ale travay; pou planté. Dérier marmay zot zoué boule. Pa konen ki manier zot in fer, boule ine arivé tome dan sa park an fer. Prézan, marmay zot oulégagne zot boule dan sa park an fer. Ki manier zot pou fer.

Sa park I anan son laport. Marmay zot vini, zot ouver sa laport. Koman zot ouver laport, I sorti en s agro bebet ki lans lo zot pou manz zot. Marmay zot tayé. Sa bebet in anan lake, zot tou zot pas derier li, zot tionbo son laké. Zot fer li tourbiyon. Apré zot santé. Zot dir:

Maman o, papa o

Vine oir blan é blan

Blan é blé

Blé é blan.

Maman ek papa zot ékouté dan laforé. Anba marmay zot santé meme.

Zot papa I dir ek zot maman:

• “Si mon dir ou pou dir nou zanfan anba ine gagne aksidan, sa bane bebet ine sorti, zot oulé dévore bane zanfan kot lakour, oua dir mouan non”.

Sa madame I répone li:

• “Ou, sak foua ou pa oulé travay, koumsa meme ki ou dir. Ou dir touzour ki zanfan zot ine gagne aksidan anba; bebet in sorti I oulé manz zot. Sa zamen mon kroir. Travay don !.

Anba marmay zot kontinien santé meme:

Maman o, papa o

Vine oir blan é blan

Blan é blé

Blé e blan.

Sa zome I dir:

• “Bé, non fame ékout bien sa sanson”.

Sa madame I ékouté meme, apré I dir:

• “O, vré vré, komsi mon tane en santé dan louan”.

Sa zome I fou son fame en kou-d-pios dan son latet. I dir:

• “Akoz I ti dir mouan pou dir marmay pane gagne okene aksidan ou pa tandé manier marmay pé santé anba”.

Prézan tou lé dé zot komans désane, zot désane, zot désane. Zot osi zot prézan viré zot santé:

Lakaz, o mon piti

Tiam, tiambo son

Laké, nou pé vini

Tiam, Tiambo son laké

Nou pé vini.

An désandan, zot tane marmay pé santé ankouri nmeme. Prézan ki zot degage. Alafen zot ariv kot son piti.

Konman zot ine arivé, zot dir tou zot piti ine tianbo laké sa bebet, zot pé valsé dan lari.

Tou-d- suit sa msié I tay laba andan, I pran fizi, I tire, I touy sa bebet. Aprézan I dir ek son bane zanfan:

• “Ler mon ti mont dan boua, pa mon ti dir ek zot pa bézouen zot zoué boule obor sa park: zoué zot boule touzour louen – dan lari”.

Zot dir:

• “Be, nou boule ine tome dan park, bé ki oun fer. Bé noune bézouen ale tire”.

Sa madam I dir

• “Mon ti dir non; pa zoué obor sa park; pa bézouen ouver sa laport”.

Sa madame I dir zot en lot foi pa fer ankor.