ALADEN EK LALANP MAZIK

Alors en zour, ti annan en garson. I ti apel Aladen.

En zour, son manman ti dir avek li, “Aladen ou annan en tonton ki viv dan en lot pei. Me ou tonton i en mazisyen. Si en zour ou war li, fer atansyon akoz i pou touy ou.”

Aladen ek son manman ti reste dan lakanpanny, me Ii Aladen i ti kontan zwe kannet dan lavil. En zour, letan i ti pe zwe kannet avek tou son bann zanmi dan lavil, i ti war en gro bato antre dan por. Aladen pa ti konnen ki son tonton mazisyen ti lo sa bato.

Konman son tonton ti war li, i ti rekonnet li.

I ti dir, “Be pa ou menm ou Aladen? Ou menm ou Aladen ou! Mon bezwen ou Aladen. Anmenn mwan kot ou manman.”

Aladen ti dir, “Ou pa pou kapab al kot mon manman .”

I ti dir, “Mon’n dir ou anmenn mwan kot ou manman.”

“Kot mon manman napa ni dipen, ni manze. Napa nanryen. Nou pov. Nou malere. Nou napa nanryen dan lakaz.”

Mazisyen ti dir avek li, “Annou al laboutik. Mon pou aste tou keksoz ki napa kot ou e nou a anmenn kot lakour.”

Ler Aladen ti tann sa, i ti bliy konsey ki son manman ti’n donn li. I ti al avek son tonton mazisyen laboutik.

Vre Mazisyen ti aste en kantite manze ek tou lezot keksoz ki zot ti bezwen. I ti osi aste lenz pour manman Aladen, pour son ser, e pour Aladen. Manman Aladen osi ti kontan ler i ti war tou sa bann keksoz. Li osi i ti’n bliye ki i ti ‘n dir Aladen son tonton ti pou touy li. Zot ti fer lafet. Zot ti manze, bwar e danse. Pli tar, Mazisyen ti dir avek Aladen, “Prezan nou ava al en kou dan bwa. Nou ava al marse dan bwa.”

Zot ti marse ziska zot ti ariv kot en souteren.

Mazisyen ti dir avek Aladen, “Mon a donn ou sa bag ou a met lo ou ledwa. Desann dan souteren e ou ava vwar en lalanp. Pran sa lalanp ou ava anmenn pour mwan. Pa bezwen tous okenn sa bann lezot keksoz ki ou war.”

Dan souteren ti annan dyanman, diferan pyer presye, lor, bizou. Kanmenm Mazisyen ti’n dir li pa pran nanryen li i ti pran kantite ki i ti kapab e met dan son pos, anba son semiz, partou kot i ti kapab.

Mazisyen kot i ti’n asize anler ti panse ki Aladen ti pe pran tro bokou letan. Alor i ti kriye, “Aladen ou’n trouve sa lalanp?” i ti demande.

“Wi,” Aladen ti reponn.

“Be prezan monte.”

Aladen ti monte. Letan i ti ariv obor lagel souteren Mazisyen ti dir li ki fodre i donn li sa lalanp. Aladen ti mazin sa ki son manman ti’n deza dir li. I ti refize pour donn son tonton sa lalanp an dizan ki fodre i fer li monte avan sinon i pa pou donn li lalanp. Mazisyen ti sey tou sa ki i ti kapab pour fer Aladen donn li lalanp avan ki i fer li monte san okenn sikse.

Alor, i ti ferm Aladen dan souteren. Aladen ti konmans plere. Anmezir ki i ti plere i ti tous son bag. San ki i ti pe ekspekte, en gran zeni ti aparet devan li. Sa zeni ti sorti dan sa bag. Aladen ti demann li pour tir li dan sa souteren. Zeni ti tir li dan souteren. Ler i ti ariv kot son manman i ti rakont li tou sa ki ti’n arive avek li.

Apre en pe letan, manze ki Mazisyen ti’n aste ti fini. Tou ti retourn parey avan. Aladen ti deside pour vann sa vye lalanp. I ti al deryer lakwizin pour frot sa vye lalanp rouye. Ler i ti pe frot sa lalanp, en lot zeni ti sorti e demann avek li, “Ki ou bezwen?”

Aladen ti reponn, “Ar! Nou napa manze. Nou napa nanryen dan lakaz. Donn nou en pe nouritir.”

Vre zeni ti donn li en gran latab ranpli avek manze. Zot tou zot ti manze. Lannmen i ti frot lalanp ankor. Sa voyaz i ti demann zeni en gran lakaz. “Mon ti ava kontan en gran lakaz, serviter, manze, bwar ek lor dan sa lakaz pour mon fanmir antye.”

Zeni ti donn zot en gran lakaz, manze, bwar, serviter ek lor.

En zour, Aladen ti deside pour li demann maryaz fiy Lewa. I ti demann son manman pour delivre son let vizit kot pale Lewa. Son manman ti demann zeni en kales an lor ek en rob kouler soley pour li al rann vizit Lewa. Ler Lewa ti war sa papye ki Aladen ti’n ekri son let lo la, sa gro kales an lor ek sa gro madanm dan son zoli lenz, i ti aksepte pour Aladen vin fer vizit kot li.

Lannmen, Aladen ti al fer vizit kot Lewa.

Avan i ti al fer vizit kot Lewa, i ti dir, “Par laverti mon lalanp mazik mon oule ganny en kales ranpli avek lor.”

Son lalanp ti donn li tou sa ki i ti bezwen. Ler Lewa ti war li pe vini dan son kales ranpli avek lor, son lenz sitan zoli ki kouler lor, Lewa ti’n fini kontan pour fer son fiy marye avek sa zonm ris . Lewa ti menm dir ki zot ti kapab fer zot maryaz deswit.

Aladen ti retourn kot son manman. Safwasi i ti demann Zeni pour fer en gran lakaz lo montanny. Zeni ti donn li en gran lakaz ki ti ranpli avek serviter, lor ek tou keksoz ki i devret annan dan en lakaz. Deswit i ti marye avek fiy Lewa. Zot ti fer en gro maryaz e zot ti envit en kantite dimoun.

Ler Mazisyen ti tande ki Aladen ti ankor vivan i ti mazinen ki Aladen ti’n dekouver sekre lalanp. I ti deside pour retourn dan sa lavil kot Aladen ti reste. I ti fer en kantite lalanp nef egzakteman parey sa enn ki ti pour Aladen.

I ti pas dan lavil an dizan, “Mon pe sanz lalanp nef pour vye lalanp.” Partou kot i ti pase i ti dir sa avek bann dimoun. I ti sanz sa bann zoli lalanp pour ganny bann ki ti vye.

Madanm Aladen ti tande ki ti annan en zonm ti pe sanz bann lalanp nef pour bann vye lalanp. Alor i ti deside pour sanz sa vye lalanp Aladen . I ti krwar ki Aladen ti pou kontan.

Zis konman Mazisyen ti’n ganny sa vye lalanp Aladen, i ti al dan en kwen e dir, “Par laverti mon lalanp, mon oule ki lakaz Aladen i al obor sa pti zil laba dan milye lanmer.”

Ler Aladen ti arive sorti lasas i pa ti war son lakaz. I ti al kot Lewa pour gete si son madanm ansanm avek son lakaz ti laba. Lewa ti tre ankoler. I ti donn Aladen zis vennkat er pour retourn avek son fiy.

Aladen pa ti konnen ki pour fer. I ti mars marse san vreman konnen kote i ti pour ale. Apre en serten letan i ti ariv obor lanmer. I ti soke pour war son lakaz lwen obor en pti zil dan milye lanmer. Aladen ti konmans plere. Anmezir ki i ti plere, i ti enkonsyaman frot son de lanmen ansanm .

Toudenkou en zeni ti aparet devan li.

“Ki mon kapab fer pour ou mon met?” i ti demande. Aladen ti sote akoz i ti’n oubliy net apre sa bag.

I ti reponn, “Mon oule ki ou anmenn mwan anndan dan sa lakaz ki laba dan milye lanmer.”

Zeni ti anmenn li dan sa lakaz. Ler i ti ariv anndan i ti war Mazisyen lo lili pe dormi. I ti al kot son madanm e dir avek li, “Ler Mazisyen i leve dir li ou kontan li e ou ti a kontan marye avek li. Dir li ki ou ti a kontan fer en lafet pour selebre sa desizyon. Ler ou remarke ki i pe sou pran sa lapoud ki mon’n donn ou e met dan son ver.”

Ler Mazisyen ti leve, Prenses ti fer tou sa ki Aladen ti’n dir li. Mazisyen ti’n telman kontan ki i pa ti dout nanryen. Lafet ti konmans preske deswit. Aladen li, i ti kasyet dan en kwen e get tou sa ki ti pe pase. Prenses ti dans avek Mazisyen me i pa ti bwar bokou.

Letan i ti remarke ki Mazisyen ti pe konmans sou, i ti met sa lapoud ki Aladen ti’n donn li dan son ver. Zis konman Mazisyen ti fini bwar sa dernyen gout diven, i ti tonm ater. I ti’n mor.

Aladen ti sorti kot i ti ete. I ti pran sa lalanp mazik ki Mazisyen ti gard dan son sang e dir, “Par laverti mon lalanp mazik, mon oule ki mon lakaz i retourn lo montanny kot i ti ete avan.”

Zis konman i ti’n fini dir sa, son lakaz ti retourn lo montanny. Deswit Aladen ti al kot Lewa pour eksplik li ki ti’n arive. Lewa ti byen kontan ki son fiy ti’n retournen e ki pa ti Aladen ki ti’n fer li disparet. Sa zour ti annan en gran lafet dan pale Lewa. Apre sa Aladen ek son fanmir ti viv ere ziska lafen zot lavi.